ບັນດາ​ປະເທດ​ທີ່​ທຸກ​ຍາກ​ພວມ​ແບກ​ຫາບ​ທີ່​ໜັກໜ່ວງ​ກ່ຽວ​ກັບ​ຜູ້​ລີ້​ໄພ

558 21 ມິ.ຖ. 2019 ຂ່າວຕ່າງປະເທດ
ບັນດາ​ປະເທດ​ທີ່​ທຸກ​ຍາກ​ພວມ​ແບກ​ຫາບ​ທີ່​ໜັກໜ່ວງ​ກ່ຽວ​ກັບ​ຜູ້​ລີ້​ໄພ

    ໃນ​ບົດ​ລາຍ​ງານ​ປະຈຳ​ປີ ທີ່​ໃສ່​ຫົວຂໍ້​ວ່າ “ບັນດາ​ທ່າ​ອ່ຽງ​ທົ່ວ​ໂລກ” ນັ້ນ ອົງການ ສະຫະ​ປະຊາ​ຊາດ (​ສປຊ) ແຈ້ງ​ໃຫ້​ຮູ້ເມື່ອ​ວັນ​ທີ 19 ມິຖຸນາ​ນີ້​ວ່າ ບັນດາ​ປະເທດ​ພວມ​ພັດທະນາ ນັ້ນ​ເອງ ຫາກ​ບໍ່​ແມ່ນ​ບັນດາ​ປະເທດ​ຝ່າຍ​ຕາເວັນຕົກ​ທີ່​ລ້ຳ​ລວຍ ທີ່​ພວມ​ແບກ​ຫາບ​ວິ​ກິດ​ການ ຜູ້​ຍ້າຍ​ຖິ່ນ​ຖານ​ຢູ່​ໃນ​ໂລກ ໃນ​ເມື່ອ​ພວມ​ຮັບ​ເອົາ​ສ່ວນ​ໃຫຍ່ ໃນ​ຈຳນວນ 70,8 ລ້ານ​ຄົນ ທີ່​ຕ້ອງ​ໜີ​ອອກ​ໄປ​ຈາກ​ບ້ານ​ເກີດ​ເມືອງ​ນອນ ໄລ່​ມາ​ຮອດ​ທ້າຍ​ປີ  2018 ຍ້ອນ​ສົງຄາມ ແລະ​ຖືກ​ກະທຳ​ໃນ​ທາງ​ບໍ່​ດີ ຢູ່​ໃນ​ບ້ານ​ເກີດ​ເມືອງ​ນອນ​ຂອງ​ພວກ​ເຂົາ.

     ບົດ​ລາຍ​ງານ​ດັ່ງກ່າວ ໃຫ້​ຮູ້​ວ່າ ເດັກນ້ອຍ​ກວມ​ເອົາ​ເຄິ່ງ​ໜຶ່ງ ໃນ​ຈຳນວນ​ຜູ້​ທີ່​ຕ້ອງ​ໜີ ອອກ​ໄປ​ຈາກ​ບ້ານ​ເກີດ​ເມືອງ​ນອນ​ໃນ​ທົ່ວ​ໂລກ. ໄລ່​ມາ​ຮອດ​ທ້າຍ​ປີ 2018 ຈຳນວນ​ຄົນ​ທີ່​ຕ້ອງ​ໄດ້​ໜີ ໄປ​ໄກ​ຈາກ​ບ້ານ​ເກີດ​ເມືອງ​ນອນ ໄດ້​ເພີ່ມ​ຂຶ້ນ​ຫຼາຍ​ຢ່າງ​ບໍ່​ເຄີຍ​ມີ​ມາ​ກ່ອນ ໃນ​ຮອບ​ເກືອບ 70 ປີຜ່ານມາ ຄື​ມີ​ເຖິງ​ເກືອບ 70,8 ລ້ານ​ຄົນ.

     ທ່ານ ຟີ​ລິບ​ໂປ ກຣັນ​ດີ ຂ້າ​ຫຼວງ​ໃຫຍ່​ຂອງ​ອົງ​ສະຫະ​ປະຊາ​ຊາດ ກ່ຽວ​ກັບ​ຜູ້​ລີ້​ໄພ (UNHCR) ກ່າວ​ຕໍ່​ກອງ​ປະຊຸມ​ຖະແຫຼງ​ຂ່າວ​ວ່າ ຖ້າ​ຫາ​ກວ່າ​ສະພາບ​ການ​ການເມືອງ ຢູ່​ໃນ​ປະເທດ​ເວ​ເນ​ຊູ​ເອ​ລາ ບໍ່​ໄດ້​ຮັບ​ການ​ແກ້​ໄຂ ກໍ​ອາດ​ເຮັດ​ໃຫ້​ຊາວ​ເວ​ເນ​ຊູ​ເອ​ລາ ຫຼັ່ງໄຫຼ​ໄປ​ຍັງ​ຕ່າງປະເທດ​ເຖິງ 5 ລ້ານ​ຄົນ ພາຍ​ໃນ​ທ້າຍ​ປີ​ນີ້. ຊາວ​ເວ​ເນ​ຊູ​ເອ​ລາ​ເຫຼົ່ານັ້ນ ຕົ້ນ​ຕໍ່​ແມ່ນ​ມຸ່ງ​ໜ້າ​ເຂົ້າ​ໄປ​ໃນ​ປະເທດ ໂກ​ລົມ​ບີ ເປ​ຣູ ແລະ​ເອ​ກົວ​ດໍ ກາຍເປັນ​ກະແສ​ຜູ້​ໜີ​ອອກ​ນອກ​ປະເທດ​ໃຫຍ່​ເປັນ​ອັນ​ດັບ​ສອງ ຮອງ​ຈາກ​ກະແສ​ຊາວ​ຊີ​ຣີ ທີ່​ເຂົ້າ​ໄປ​ໃນ​ປະເທດ​ຕວກ​ກີ.

    ທ່ານ ກຣັນ​ດີ ເວົ້າ​ວ່າ ມີ​ຄວາມ​ເປັນ​ຈິງ​ທີ່​ວ່າ ສ່ວນ​ໃຫຍ່​ຂອງ​ຜູ້​ລີ້​ໄພ ຫຼື​ຍ້າຍ​ຖິ່ນ​ຖານ ເຂົ້າ​ໄປ​ຍັງ​ປະເທດ​ໃກ້​ຄຽງ ແລະ​ສິ່ງ​ດັ່ງກ່າວ​ມີ​ຄວາມ​ໝາຍວ່າ ສ່ວນ​ໃຫຍ່​ຂອງ​ພວກ​ເຂົາ ພວມ​ລີ້​ໄພ​ຢູ່​ໃນ​ບັນດາ​ປະເທດ​ທີ່​ທຸກ​ຍາກ ຫຼື​ບັນດາ​ປະເທດ​ທີ່​ມີ​ລາຍ​ຮັບ​ປານ​ກາງ.

     ບົດ​ລາຍ​ງານ​ໃຫ້​ຮູ້​ວ່າ ຈາກ​ຈຳນວນ​ຄຳ​ຮ້ອງ​ຂໍ​ລີ້​ໄພ 254.3000 ສະບັບ ໃນ​ປີ 2018 ນັ້ນ  ສ ອາ​ເມ​ຣິ​ກາ ເປັນ​ປະເທດ​ທີ່​ຮັບ​ເອົາ​ຄຳ​ຮ້ອງ​ຂໍ​ລີ້​ໄພ​ຫຼາຍ​ທີ່​ສຸດ​ໃນ​ໂລກ. ເຖິງ​ຢ່າງໃດ​ກໍ​ຕາມ ທ່ານ ກຣັນ​ດີ ກໍ​ໃຫ້​ຮູ້​ວ່າ ສ ອາ​ເມ​ຣິ​ກາ ຍັງ​ຄົງ​ບໍ່​ແກ້​ໄຂ​ຄຳ​ຮ້ອງ​ຂໍ​ລີ້​ໄພ​ທີ່​ຍັງ​ຄ້າງ​ຢູ່ 800.000 ສະບັບ.

    ບົດ​ລາຍ​ງານ​ຂອງ ​ສປຊ ໃຫ້​ຮູ້​ວ່າ ກວ່າ 2/3 ຂອງ​ຈຳນວນ​ຜູ້​ລີ້​ໄພ​ໃນ​ທົ່ວ​ໂລກ ແມ່ນ​ມາ​ຈາກ 5 ປະເທດ ໄດ້ແກ່ ຊີ​ຣີ ອາ​ຟະ​ກາ​ນິດ​ສະຖານ ຊູ​ດານ​ໃຕ້ ມຽນ​ມາ ແລະ ໂຊ​ມາລີ.

ຂ່າວທີ່ກ່ຽວຂ້ອງ