ຂ່າວຫຼ້າສຸດ

ຈຳນວນ​ຜູ້​ເສຍ​ຊີວິດ​ຍ້ອນ​ອາກາດ​ຮ້ອນ​ຢູ່​ໃນ​ອິນ​ເດຍ ເພີ່ມ​ຂຶ້ນ

340 21 ມິ.ຖ. 2019 ຂ່າວຕ່າງປະເທດ
ຈຳນວນ​ຜູ້​ເສຍ​ຊີວິດ​ຍ້ອນ​ອາກາດ​ຮ້ອນ​ຢູ່​ໃນ​ອິນ​ເດຍ ເພີ່ມ​ຂຶ້ນ

    ເຈົ້າ​ໜ້າທີ່​ອິນ​ເດຍ ແຈ້ງ​ໃຫ້​ຮູ້ເມື່ອ​ວັນ​ທີ 19 ມິຖຸນາ​ນີ້​ວ່າ  ຈຳນວນ​ຜູ້​ເສຍ​ຊີວິດ ຍ້ອນ​ອາກາດ​ຮ້ອນ​ອົບເອົ້າ ຢູ່​ໃນ​ລັດ ພິຫານ (ພາກ​ຕາເວັນ​ອອກ​ຂອງ​ອິນ​ເດຍ) ໃນ 4 ມື້​ທີ່​ຜ່ານ​ມາ ໄດ້​ເພີ່ມ​ຂຶ້ນ​ເປັນ 92 ຄົນ. ເຈົ້າ​ໜ້າທີ່​ສາທາລະນະ​ສຸກ​ເວົ້າ​ວ່າ ຜູ້​ເສຍ​ຊີວິດ​ດັ່ງກ່າວ ເກືອບ​ທັງ​ໝົດ​ແມ່ນ​ມີ​ອາຍຸ​ສູງ​ກວ່າ 50 ປີ ແລະ​ ເຂົ້າ​ໄປ​ປິ່ນປົວ​ຢູ່​ໃນ​ໂຮງໝໍ ໃນ​ສະພາບ​ທີ່​ບໍ່​ຮູ້ສຶກ​ຕົວ ແລະ​ ມີ​ອາການ​ໄຂ້​ຮ້ອນ ຮາກ ແລະ​ຖ່າຍໜັກ.

     ອຳນາດ​ການ​ປົກຄອງ​ທ້ອງຖິ່ນ ໄດ້​ປະກາດ​ແຈ້ງ​ເຕືອນ​ໄປ​ຍັງ​ປະຊາຊົນ​ຢູ່​ໃນ​ເຂດ​ທີ່​ໄດ້​ຮັບ ຜົນ​ກະທົບ ວ່າ​ໃຫ້​ຢູ່​ໃນ​ເຮືອນ​ໃນ​ເວລາ​ກາງເວັນ ດື່ມນ້ຳ​ໃຫ້​ຫຼາຍ ແລະ​ ຈຳກັດ​ການເຄື່ອນໄຫວ ກໍ່ສ້າງ​ໃນ​ແຕ່​ລະ​ມື້. ໂຮງຮຽນ​ແຫ່ງ​ຕ່າງໆ​ຢູ່​ໃນ​ລັດ​ພິຫານ ໄດ້​ຖືກ​ສະເໜີ​ໃຫ້​ປິດ​ການ​ຮຽນ​ການ​ສອນ ໄປ​ຮອດ​ວັນ​ທີ 22 ມິຖຸນາ​ນີ້.

      ປະກົດ​ການ​ອາກາດ​ຮ້ອນ​ອົບເອົ້າ ແລະ​ອັນຕະລາຍ​ໃນ​ໄລຍະ​ນີ້ ເກີດ​ຂຶ້ນ​ໃນ​ເວລາ​ດຽວ​ກັນ ທີ່​ລັດ​ພິຫານ ພວມ​ສູ້​ຢັນ​ກັບ​ສະພາບ​ທີ່​ມີ​ເດັກນ້ອຍ​ຕາຍ​ເປັນ​ຈຳນວນ​ຫຼາຍ ຍ້ອຍ​ເກີດ​ອາການ​ອັກເສບ ສະໝອງ​ຮຸນ​ແຮງ (AES). ຕົວ​ເລກ​ທີ່​ບັນທຶກ​ໄດ້ ໃຫ້​ຮູ້​ວ່າ ມີ​ເດັກນ້ອຍ​ເສຍ​ຊີວິດ​ໄປ​ແລ້ວ 114 ຄົນ ແລະ ​ມີ​ອີກ​ຫຼາຍ​ຮ້ອຍ​ຄົນ ພວມ​ປິ່ນປົວ​ຢູ່​ໃນ​ໂຮງໝໍ ເມື່ອ​ພະຍາດ AES ເກີດ​ການ​ລະບາດ ໃນ​ເດືອນ​ທີ່​ຜ່ານ​ມາ ຢູ່​ໃນ​ພື້ນ​ທີ່​ລັດ​ດັ່ງກ່າວ.

     ບັນດາ​ຊ່ຽວຊານ​ເວົ້າ​ວ່າ ພະຍາດ AES ເປັນ​ຜົນ​ກະທົບ​ຕົ້ນຕໍ​ແມ່ນ​ຕໍ່​ເດັກນ້ອຍ​ທີ່​ມີ​ອາຍຸ ຕ່ຳ​ກວ່າ 15 ປີ ໂດຍ​ມີ​ອາການ​ໄຂ້ ແລະ​ ກະທົບ​ຕໍ່​ລະບົບ​ປະສາດ ເຊັ່ນ​ເຮັດ​ໃຫ້​ເກີດ​ຄວາມ​ສັບສົນ ບໍ່​ຮູ້​ທິດ​ທາງ ລະເມີ ຫຼື​ຮາກ ແລະ ​ມີ​ອາການ​ຊັກ.

ຂ່າວທີ່ກ່ຽວຂ້ອງ