ຂ່າວຫຼ້າສຸດ

ນາຍົກລັດຖະມົນຕີ​ຫວຽດນາມ ພົບ​ປະ​ເຮັດ​ວຽກ​ກັບ​ຄະນະ​ປະຈຳ​ສະມາຄົມ​ນັກ​ຂ່າວ​ຫວຽດນາມ

341 21 ມິ.ຖ. 2019 ຂ່າວຕ່າງປະເທດ
ນາຍົກລັດຖະມົນຕີ​ຫວຽດນາມ ພົບ​ປະ​ເຮັດ​ວຽກ​ກັບ​ຄະນະ​ປະຈຳ​ສະມາຄົມ​ນັກ​ຂ່າວ​ຫວຽດນາມ

    ເນື່ອງ​ໃນ​ໂອກາດ​ລະນຶກ​ວັນ​ສື່​ມວນ​ຊົນ​ປະຕິວັດ​ຫວຽດນາມ ຄົບຮອບ 94 ປີ (21/6/1925-21/6/2019) ນັ້ນ ນາຍົກລັດຖະມົນຕີ​ຫວຽດນາມ ຫງວ​​ຽນ​ຊວນ​ຟຸກ ໄດ້​ພົບ​ປະ​ເຮັດ​ວຽກ​ກັບ ຄະນະ​ປະຈຳ ສະມາຄົມ​ນັກ​ຂ່າວ​ຫວຽດນາມ ຊຶ່ງ​ມີ​ຂຶ້ນ​ຢູ່​ທີ່​ສຳນັກງານ​ຂອງ​ລັດຖະບານ​ຫວຽດນາມ ໃນ​ນະຄອນຫຼວງ​ຮ່າ​ໂນ້ຍ ເມື່ອ​ວັນ​ທີ 19 ມິຖຸນາ​ນີ້.

     ໃນ​ໂອກາດ​ດັ່ງກ່າວ ທ່ານ ທວັ້ນ​ຫຶ້ວ ຮອງ​ຫົວໜ້າ​ຄະນະ​ໂຄສະນາ​ສຶກ​ສາ​ສູນ​ກາງ ທັງ​ເປັນ ປະທານ​ສະມາຄົມ​ນັກ​ຂ່າວ​ຫວຽດນາມ ໄດ້​ລາຍ​ງານ​ກ່ຽວ​ກັບ​ສະພາບ​ການເຄື່ອນໄຫວ ຂອງ​ສະມາຄົມ ນັກ​ຂ່າວ​ຫວຽດນາມ ໃນ​ໄລຍະ​ທີ່​ຜ່ານ​ມາ ໂດຍ​ທ່ານ​ໄດ້​ແຈ້ງ​ໃຫ້​ຮູ້​ວ່າ​ປັດຈຸບັນ​ນີ້ ສະມາຄົມ​ນັກ​ຂ່າວ ຫວຽດນາມ ມີ​ສະມາຊິກ 24.000 ກວ່າ​ຄົນ.

     ທ່ານ ທວັ້ນ​ຫຶ້ວ ເວົ້າ​ວ່າ ສະມາຄົມ​ນັກ​ຂ່າວ​ຫວຽດນາມ ແລະ​ວົງ​ການ​ສື່​ມວນ​ຊົນ​ໃນ​ທົ່ວ​ປະເທດ ຍາມ​ໃດ​ກໍ​ໄດ້​ຮັບ​ຄວາມ​ເອົາໃຈໃສ່ ຊີ້​ນຳ​ນຳພາ​ຈາກ​ພັກ ແລະ​ລັດ; ພະຍາຍາມ​ສູ້​ຊົນ​ຢ່າງ​ບໍ່​ຢຸດ​ຢັ້ງ ໃນ​ການ​ປະກອບສ່ວນ​ທີ່​ສຳຄັນ ເຂົ້າ​ໃນ​ພາລະກິດ​ການ​ປະຕິວັດ​ຂອງ​ພັກ. ການເຄື່ອນໄຫວ​ຂອງ ສະມາຄົມ​ນັກ​ຂ່າວ​ຫວຽດນາມ ໃນ​ຂັ້ນ​ຕ່າງໆ ນັບ​ແຕ່​ສູນ​ກາງ ໄປ​ຮອດ​ທ້ອງຖິ່ນ ໄດ້​ມີ​ການ ປ່ຽນແປງ​ໃໝ່​ຢ່າງ​ບໍ່​ຢຸດ​ຢັ້ງ ໃນ​ດ້ານ​ເນື້ອ​ໃນ​ຮູບ​ແບບ​ການເຄື່ອນໄຫວ ຢືນຢັນ​ຖານະ​ທີ່​ຕັ້ງ ແລະ​ບົດບາດ ຂອງ​ສະມາຄົມ​ນັກ​ຂ່າວ​ຫວຽດນາມ ຢູ່​ໃນ​ລະບົບ​ການເມືອງ ແລະ ​ຊີວິດ​ການ​ເປັນ​ຢູ່ ໃນ​ສັງຄົມ​ໄປ​ເທື່ອ​ລະ​ກ້າວ ປະກອບສ່ວນ​ຢ່າງ​ຕັ້ງໜ້າ ມີ​ປະສິດທິພາບ ເຂົ້າ​ໃນ​ພາລະກິດ​ການ​ກໍ່ສ້າງ ການ​ປ່ຽນແປງ​ໃໝ່ ແລະ ​ການ​ພັດທະນາ​ປະເທດ​ຊາດ.

     ນາຍົກລັດຖະມົນຕີ ຫງວ​​ຽນ​ຊວນ​ຟຸກ ໄດ້​ກ່າວ​ຢູ່​ໃນ​ການ​ພົບ​ປະ​ເຮັດ​ວຽກ​ດັ່ງກ່າວ ໂດຍ​ທ່ານ​ໄດ້​ເນັ້ນ​ໜັກ​ວ່າ ບັນດາ​ນັກ​ຂ່າວ ເປັນ​ຜູ້​ທີ່​ເຮັດ​ວຽກ​ຢູ່​ໃນ​ສະໜາມຮົບ​ດ້ານ​ແນວ​ຄິດ ປະຕິບັດ​ໜ້າທີ່​ອັນ​ສຳຄັນ ສົ່ງ​ຂໍ້​ມູນ​ຂ່າວສານ​ກ່ຽວ​ກັບ​ແນວທາງ ນະໂຍບາຍ​ຂອງ​ພັກ ແລະ​ລັດ ໄປ​ຍັງ​ປະຊາຊົນ ແລະ​ສ່ອງ​ແສງ​ຢ່າງ​ມີ​ຊີວິດ​ຊີວາ ຊື່​ຕົງ ກ່ຽວ​ກັບ​ຊີວິດ​ໃນ​ສັງຄົມ.

     ນາຍົກລັດຖະມົນຕີ ຫງວ​​ຽນ​ຊວນ​ຟຸກ ຢືນຢັນ​ວ່າ ບັນດາ​ຜົນງານ ແລະ​ໄຊຊະນະ ໃນ​ທຸກໆ​ດ້ານ​ຂອງ​ເສດຖະກິດ-ສັງຄົມ ຂອງ​ປະເທດ​ຊາດ​ຫວຽດນາມ ໃນ​ໄລຍະ​ທີ່​ຜ່ານ​ມາ ໄດ້​ມີ​ການ​ເຂົ້າ​ຮ່ວມ​ຢ່າງ​ຕັ້ງໜ້າ ແລະ​ສຳຄັນ ຂອງ​ວົງ​ການ​ສື່​ມວນ​ຊົນ ຕົ້ນຕໍ​ກໍ​ແມ່ນ​ບົດບາດ​ເດີນ​ໜ້າ ຢູ່​ໃນ​ວຽກ​ງານ​ສະກັດ​ກັ້ນ ແລະ​ຕ້ານ​ປະກົດ​ການ​ຫຍໍ້ທໍ້ ຕ້ານ​ການ​ສໍ້​ລາດ​ບັງ​ຫຼວງ ແລະ​ ຕ້ານ​ການ​ຟູມ​ເຟືອຍ. ນາຍົກລັດຖະມົນຕີ ຫງວ​​ຽນ​ຊວນ​ຟຸກ ກໍ​ໃຫ້ການ​ຕີ​ລາຄາ​ວ່າ ຖັນ​ແຖວ​ນັກ​ຂ່າວ ສະມາຊິກ​ສະມາຄົມ​ນັກ​ຂ່າວ​ຫວຽດນາມ ນັບ​ມື້​ນັບ​ມີ​ຄວາມ​ໜັກ​ແໜ້ນ ໃນ​ດ້ານ ທາດ​ແທ້​ທາງ​ດ້ານ​ການເມືອງ ຄວາມ​ຮູ້​ທາງ​ດ້ານ​ວິຊາ​ການ ຄວາມ​ເປັນ​ມື​ອາຊີບ ໄດ້​ຮັບ​ການ​ຍົກ​ສູງ ຢ່າງ​ຕໍ່​ເນື່ອງ ແລະ​ທ່າ​ອ່ຽງ​ການ​ເຂົ້າ​ເຖິງ​ເຕັກ​ໂນ​ໂລ​ຊີ​ໃໝ່ ຢູ່​ໃນ​ການເຄື່ອນໄຫວ​ຂອງ​ສື່​ມວນ​ຊົນ ໄດ້​ຮັບ​ການ​ປະຕິບັດ​ຢ່າງ​ມີ​ປະສິດທິພາບ.

     ໃນ​ຂະນະ​ດຽວ​ກັນ ນາຍົກລັດຖະມົນຕີ ຫງວ​​ຽນ​ຊວນ​ຟຸກ ກໍ​ເຫັນ​ວ່າ ປັດຈຸບັນ​ນີ້ ຍັງ​ມີ​ອົງການ​ສື່​ມວນ​ຊົນ​ບໍ່​ໜ້ອຍ ທີ່​ຍັງ​ບໍ່​ທັນ​ເສີມ​ຂະຫຍາຍ​ທ່າ​ໄດ້​ປຽບ​ຂອງ​ສື່​ມວນ​ຊົນ ໃນ​ການ​ກຳນົດ​ທິດ​ທາງ ນຳພາ​ດ້ານ​ຂໍ້​ມູນ​ຂ່າວສານ ຍິ່ງ​ໄປ​ກວ່າ​ນັ້ນ ຍັງ​ຖືກ​ສື່​ສັງຄົມ​ຄອບ​ງຳ ແລ່ນນຳ​ສື່​ສັງຄົມ ນຳໄປ​ສູ່​ການ​ເກີດ​ມີ​ຄວາມ​ຜິດພາດ​ທີ່​ໜ້າ​ເສຍດາຍ.

ຂ່າວທີ່ກ່ຽວຂ້ອງ