ເກີດ​ແຜ່ນດິນ​ໄຫວ​ແຮງ 6,7 ອົງສາ​ຣິກ​ເຕີ ຢູ່​ໃນ​ຍີ່ປຸ່ນ

260 20 ມິ.ຖ. 2019 ຂ່າວຕ່າງປະເທດ
ເກີດ​ແຜ່ນດິນ​ໄຫວ​ແຮງ 6,7 ອົງສາ​ຣິກ​ເຕີ ຢູ່​ໃນ​ຍີ່ປຸ່ນ

    ກົມ​ສະກັດ​ກັ້ນ ຕ້ານ​ອັກຄີ​ໄພ ແລະ​ຮອງ​ຮັບ​ໄພພິບັດ (FDMA) ຂອງ​ຍີ່ປຸ່ນ ແຈ້ງ​ໃຫ້​ຮູ້ ໃນ​ຕອນ​ເຊົ້າ​ຂອງ​ວັນ​ທີ 19 ມິຖຸນາ​ນີ້​ວ່າ ມີ​ຜູ້​ໄດ້​ຮັບ​ບາດເຈັບ​ຢ່າງ​ໜ້ອຍ 15 ຄົນ ຫຼັງ​ເກີດ​ເຫດການ​ແຜ່ນດິນ​ໄຫວ ແທກ​ຄວາມ​ແຮງ​ສັ່ນ​ສະເທືອນ​ໄດ້ 6,7 ອົງສາ​ຣິກ​ເຕີ ຢູ່​ໃນ​ເຂດ​ທິດ ຕາເວັນ​ອອກ​ສ່ຽງ​ເໜືອ​ຍີ່ປຸ່ນ ຊຶ່ງ​ເກີດ​ຂຶ້ນ​ໃນ​ເວລາ​ຄ່ຳ​ຄືນ​ຂອງ​ວັນ​ທີ 18 ມິຖຸນາ.

     ຂ່າວ​ແຈ້ງວ່າ ຈຸດ​ສູນ​ກາງຂອງ​ແຜ່ນດິນ​ໄຫວ​ດັ່ງກ່າວ ຢູ່​ເລິກ​ລົງ​ໄປ​ໃຕ້​ດິນ 14​ກມ ຢູ່​ໃນ​ບໍລິເວນ​ນອກ​ຝັ່ງ​ທະເລ​ແຂວງ ຢາ​ມາ​ກາ​ຕາ ແລະ​ ເກີດ​ແຮງ​ສັ່ນ​ສະເທືອນ​ຢູ່​ໃນ 4 ແຂວງ ໃນ​ເຂດ​ທິດຕາເວັນອອກ​ສ່ຽງ​ເໜືອ​ຍີ່ປຸ່ນ ອັນ​ປະກອບ​ດ້ວຍ​ແຂວງ ຢາ​ມາ​ກາ​ຕາ ນິ​ອິ​ກາ​ຕາ ມີ​ຢາ​ກິ ແລະ ອີ​ຊີ​ກາ​ວາ. ນີ້​ປັນ​ເຫດການ​ແຜ່ນດິນ​ໄຫວ​ແຮງ​ທີ່​ສຸດ​ຢູ່​ໃນ​ຍີ່ປຸ່ນ ນັບ​ແຕ່​ເກີດ​ເຫດການ ແຜ່ນດິນ​ໄຫວ​ຢູ່​ໃນ ຮອກ​ໄກ​ໂດ ເມື່ອ​ວັນ​ທີ 6 ກັນຍາ ປີ 2018 ເປັນຕົ້ນ​ມາ.

     ຫຼັງ​ເກີດ​ເຫດການ​ແຜ່ນດິນ​ໄຫວ​ດັ່ງກ່າວ ອົງການ​ອຸຕຸນິຍົມ​ຂອງ​ຍີ່ປຸ່ນ (JMA) ໄດ້​ແຈ້ງ​ເຕືອນ ຄວາມ​ສ່ຽງ​ເກີດ​ສຶ​ນາ​ມິ​ອອກ​ມາ ຢູ່​ໃນ​ເຂດ​ດັ່ງກ່າວ ແຕ່​ກໍ​ໄດ້​ຖອນ​ຄຳ​ແຈ້ງ​ເຕືອນ​ນັ້ນ​ໄປ ໃນ​ເວລາ ເຊົ້າ​ມືດ​ຂອງ​ວັນ​ທີ 19 ມິຖຸນາ.

ຂ່າວທີ່ກ່ຽວຂ້ອງ