ຈຳນວນ​ຜູ້​ເສຍ​ຊີວິດ​ຍ້ອນ​ສົງຄາມ​ພາຍ​ໃນ​ຢູ່​ລີ​ບີ ຂຶ້ນ​ເປັນ​ເກືອບ 700 ຄົນ

273 20 ມິ.ຖ. 2019 ຂ່າວຕ່າງປະເທດ
ຈຳນວນ​ຜູ້​ເສຍ​ຊີວິດ​ຍ້ອນ​ສົງຄາມ​ພາຍ​ໃນ​ຢູ່​ລີ​ບີ ຂຶ້ນ​ເປັນ​ເກືອບ 700 ຄົນ

     ອົງການ​ອະນາໄມ​ໂລກ (WHO) ແຈ້ງ​ໃຫ້​ຮູ້​ຜ່ານ​ສື່​ສັງຄົມ Twitter ເມື່ອ​ວັນ​ທີ 18 ມິຖຸນາ​ນີ້​ວ່າ ໄລ່​ມາ​ຮອດ​ເວລາ​ນີ້ ລວມ​ແລ້ວ​ມີ​ຜູ້​ເສຍ​ຊີວິດ 691 ຄົນ (ໃນ​ນັ້ນ​ເປັນ​ສາມັນ​ຊົນ 41 ຄົນ) ແລະ​ບາດເຈັບ​ອີກ 4.012 ຄົນ (ໃນ​ນັ້ນ​ເປັນ​ສາມັນ​ຊົນ 135 ຄົນ) ຈາກ​ການ​ຕໍ່ສູ້​ຢູ່​ພາຍ​ໃນ ແລະ​ອ້ອມແອ້ມ​ນະຄອນຫຼວງ​ຕຣີ​ໂປ​ລີ ຂອງ​ລີ​ບີ.

     ກອງທັບ​ຢູ່​ທາງ​ພາກ​ຕາເວັນ​ອອກ​ຂອງ​ລີ​ບີ ທີ່​ນຳພາ​ໂດຍ​ນາຍ​ພົນ ຄາ​ລີ​ຟາ ຮາ​​ຟ​ຕາ ຜູ້​ບັນຊາ​ການ​ກອງ​ກຳລັງ​ກອງທັບ​ພາກ​ຕາເວັນ​ອອກ (GLA) ໄດ້​ດຳເນີນ​ບັ້ນ​ຮົບ ມາ​ຕັ້ງແຕ່​ຕົ້ນ​ເດືອນ ເມສາ​ທີ່​ຜ່ານ​ມາ ເພື່ອ​ແນໃສ່​ບຽດ​ຢຶດ​ເອົາ​ນະຄອນຫຼວງ​ຕຣີ​ໂປ​ລີ ບ່ອນ​ຊຶ່ງ​ມີ​ອຳນາດ​ການ​ປົກຄອງ ທີ່​ໄດ້​ຮັບ​ການ​ສະໜັບສະໜູນ​ຈາກ​ສະຫະ​ປະຊາ​ຊາດ (​ສປຊ) ຕັ້ງ​ຢູ່.

     ເມື່ອ​ວັນ​ທີ 16 ມິຖຸນາ​ທີ່​ຜ່ານ​ມາ ທ່ານ ຟາ​ເຢ​​ສ ອາ​​ລ-ເຊີ​ຣາ​​ສ ນາຍົກລັດຖະມົນຕີ ຂອງ​ລັດຖະບານ​ສາມັກຄີ​ແຫ່ງ​ຊາດ (GNA) ຂອງ​ລີ​ບີ ທີ່​ໄດ້​ຮັບ​ການ​ຮັບ​ຮູ້​ຈາກ​ສາກົນ ໄດ້​ສະເໜີ​ຈັດການ​ເລືອກ​ຕັ້ງ​ທົ່ວ​ໄປ ແລະ​ເລືອກ​ຕັ້ງ​ປະທານາທິບໍດີ ກ່ອນ​ທ້າຍ​ປີ​ນີ້ ເພື່ອ​ຢຸດຕິ​ວິ​ກິດ​ການ ຢູ່​ໃນ​ລີ​ບີ. ນາຍົກລັດຖະມົນຕີ ອາ​​ລ-ເຊີ​ຣາ​​ສ ໄດ້​ນຳ​ສະເໜີ​ແນວ​ຄວາມ​ຄິດ​ລິ​ເລີ່ມ ເພື່ອ​ຢຸດຕິ​ວິ​ກິດ​ການ ແລະ​ຮຽກຮ້ອງ​ໄປ​ຍັງ​ປະຊາຊົນ​ລີ​ບີ ໃຫ້ການ​ສະໜັບສະໜູນ ຊຶ່ງ​ແນວ​ຄວາມ​ຄິດ​ນີ້ ແມ່ນ​ອີງໃສ່​ການ ປະສານ​ສົມທົບ​ກັບ ​ສປຊ ເພື່ອ​ຈັດ​ຕັ້ງ​ກອງ​ປະຊຸມ​ແຫ່ງ​ຊາດ ແນໃສ່​ເຕົ້າໂຮມ​ທຸກໆ​ກຳລັງ ທາງ​ການເມືອງ ແລະ​ຕົວ​ແທນ​ຂອງ​ປະຊາຊົນ ຢູ່​ໃນ​ທຸກໆ​ເຂດ​ຂອງ​ປະເທດ.

    ເຖິງ​ຢ່າງໃດ​ກໍ​ຕາມ ນາຍົກລັດຖະມົນຕີ ອາ​​ລ-ເຊີ​ຣາ​​ສ ກໍ​ໃຫ້​ຮູ້​ວ່າ ທ່ານ​ບໍ່​ພ້ອມ​ທີ່​ຈະ​ເຈລະຈາ ກັບ​ນາຍ​ພົນ ຄາ​ລີ​ຟາ ຮາ​​ຟ​ຕາ ເພື່ອ​ຢຸດຕິ​ບັ້ນ​ຮົບ​ທີ່​ແນໃສ່​ນະຄອນຫຼວງ​ຕຣີ​ໂປ​ລີ ຕະຫຼອດ​ສອງ​ເດືອນ ທີ່​ຜ່ານ​ມາ​ນັ້ນ.

ຂ່າວທີ່ກ່ຽວຂ້ອງ