ຊອກຫາວິທີຄຸ້ມຄອງເຂື່ອນໄຟຟ້ານ້ຳຕົກ ໃຫ້ມີຄວາມປອດໄພ

1.427 19 ມິ.ຖ. 2019 ຂ່າວໜ້າ​ໜຶ່ງ

    ໂດຍ​ໄດ້​ຮັບ​ການ​ສະ­ໜັບ­ສະ­ໜູນ​ຈາກ​ບໍ­ລິ­ສັດ​ໄຟ­ຟ້າ​ນ້ຳ​ເທີນ 2 ວັນ​ທີ 14 ມິ­ຖຸ­ນາ 2019 ກົມ​ຄຸ້ມ​ຄອງ​ພະ­ລັງ­ງານ ກະ­ຊວງ​ພະ­ລັງ­ງານ ແລະ ບໍ່​ແຮ່ ຈັດ​ກອງ​ປະ­ຊຸມ​ຖອດ​ຖອນ​ບົດ­ຮຽນ​ກ່ຽວ​ກັບ​ການ​ບໍ­ລິ­ຫານ​ຈັດ­ການ  ໄລ­ຍະ​ລະ­ດູ­ຝົນ​ໃນ​ຊຸມ​ປີ​ທີ່​ຜ່ານ​ມາ​ຂອງ​ເຂື່ອນ​ໄຟ­ຟ້າ​ນ້ຳ­ຕົກ​ໃນ​ລາວ ຄັ້ງ​ທີ 1 ຂຶ້ນ​ທີ່​ໂຮງ­ແຮມ​ແລນ​ມາກ ນະ­ຄອນ­ຫຼວງ​ວຽງ​ຈັນ ມີ​ທ່ານ ຄຳ​ມະ­ນີ ອິນ​ທິ​ລາດ ລັດ­ຖະ­ມົນ­ຕີ ກະ­ຊວງ​ພະ­ລັງ­ງານ ແລະ ບໍ່​ແຮ່ ຜູ້­ອຳ­ນວຍ­ການ​ຮອງ​ຜູ້­ອຳ­ນວຍ­ການ​ບໍ­ລິ­ສັດ​ໄຟ­ຟ້າ ພ້ອມ​ດ້ວຍ​ຜູ້­ຕາງ­ໜ້າ​ຈາກ​ກົມ ສູນ ແລະ ຂະ­ແໜງ­ການ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ຄຳ​ມະ­ນີ ອິນ​ທິ​ລາດ ກ່າວ​ວ່າ: ກອງ​ປະ­ຊຸມ​ຄັ້ງ​ນີ້​ແນ­ໃສ່​ແລກ­ປ່ຽນ​ບົດ­ຮຽນ ແລະ ປຶກ­ສາ​ຫາ­ລື​ຫຼາຍ​ຫົວ­ຂໍ້​ເຊັ່ນ: ການ​ຕິດ­ຕາມ​ກວດ­ກາ​ຄວາມ​ປອດ​ໄພ​ຂອງ​ເຂື່ອນ ການ​ບໍ­ລິ­ຫານ​ຈັດ­ການ​ນ້ຳ ອຸ​ທົກ​ກະ​ສາດ ອຸ­ຕຸ­ນິ­ຍົມ ລະ­ບົບ​ການ​ສື່­ສານ​ການ​ປ່ອຍ​ນ້ຳ ແລະ ແຜນ​ຮອງ​ຮັບ​ກໍ­ລະ­ນີ​ສຸກ​ເສີນ ນອກ​ນັ້ນ ຍັງ​ເປັນ​ໂອ­ກາດ​ດີ​ໃຫ້​ບັນ­ດາ​ໂຄງ­ການ​ເຂື່ອນ​ຕ່າງໆ​ໄດ້​ແລກ­ປ່ຽນ​ປະ­ສົບ​ການ ແລະ ຍົກ​ບັນ­ຫາ​ຕ່າງໆ​ທີ່​ຕິດ​ພັນ​ກັບ​ການ​ຜະ­ລິດ​ໃນ​ຫຼາຍ​ສະ­ຖາ­ນະ​ການ ພ້ອມ​ນີ້ ກອງ​ປະ­ຊຸມ​ໄດ້​ລວມ​ເອົາ​ບັນ­ດາ​ບໍ­ລິ­ສັດ​ທີ່​ດຳ­ເນີນ​ໂຄງ­ການ​ເຂື່ອນ​ໃນ​ລາວ​ເພື່ອ​ເປັນ​ການ​ວາງ​ແນວ­ທາງ​ໃນ​ການ​ຮ່ວມ​ມື ແລະ ການ​ສື່­ສານ ເພື່ອ​ຮັບ­ປະ­ກັນ​ຄວາມ​ປອດ​ໄພ ແລະ ຄວາມ​ພ້ອມ​ຂອງ​ບັນ­ດາ​ເຂື່ອນ​ໃນ​ລາວ ໜຶ່ງ​ໃນ​ຫົວ­ຂໍ້​ທີ່​ສຳ­ຄັນ​ແມ່ນ​ສ້າງ​ລະ­ບົບ​ການ​ສື່­ສານ​ລະ­ຫວ່າງ​ບໍ­ລິ­ສັດ ແລະ ລັດ­ຖະ­ບານ ໂດຍ​ສະ­ເພາະ​ອຳ­ນາດ​ການ​ປົກ­ຄອງ​ທ້ອງ­ຖິ່ນ ເພື່ອ​ຮັບ­ປະ­ກັນ​ການ​ສົ່ງ​ຂໍ້​ມູນ​ໃຫ້​ຊຸມ​ຊົນ​ທັນ​ຕໍ່​ສະ­ພາບ​ການ​ເພື່ອ​ກຽມ­ພ້ອມ​ຖ້າ​ມີ​ກໍ­ລະ­ນີ​ສຸກ​ເສີນ ເຊິ່ງ​ກອງ​ປະ­ຊຸມ​ຄັ້ງ​ນີ້​ເພື່ອ​ຊອກ​ຫາ​ວິ­ທີ​ຄຸ້ມ​ຄອງ​ເຂື່ອນ​ໄຟ­ຟ້າ​ນ້ຳ­ຕົກ​ໃຫ້​ມີ​ຄວາມ​ປອດ​ໄພ ເພື່ອ​ເຮັດ​ໃຫ້​ມີ​ການ​ພັດ­ທະ­ນາ​ເຂື່ອນ​ໄຟ­ຟ້າ​ນ້ຳ­ຕົກ​ຢູ່​ລາວ​ມີ​ຄວາມ​ຍືນ​ຍົງ ສະ­ນັ້ນ ຈຶ່ງ​ຮຽກ­ຮ້ອງ​ມາ​ຍັງ​ຜູ້​ດຳ­ເນີນ​ໂຄງ­ການ​ຈະ​ຕ້ອງ​ປະ­ຕິ­ບັດ​ຕາມ​ກົດ​ລະ­ບຽບ​ທີ່​ກ່ຽວ​ກັບ​ຄວາມ​ປອດ​ໄພ​ຂອງ​ເຂື່ອນ ເພື່ອ​ຜົນ​ປະ­ໂຫຍດ​ສ່ວນ​ລວມ ແລະ ການ​ພັດ­ທະ­ນາ​ໂຄງ­ການ​ເຂື່ອນ​ໄຟ­ຟ້າ​ນ້ຳ­ຕົກ​ໃຫ້​ເປັນ​ແບບ­ຢ່າງ​ທີ່​ດີ​ໃນ​ດ້ານ​ສັງ­ຄົມ ແລະ ສິ່ງ­ແວ­ດລ້ອມ.

ຂ່າວທີ່ກ່ຽວຂ້ອງ