ນັກຮຽນລາວ ຍາດໄດ້ຫຼຽນລາງວັນວິທະຍາສາດທີ່ປະເທດໄທ

761 19 ມິ.ຖ. 2019 ຂ່າວໜ້າ​ໜຶ່ງ
ນັກຮຽນລາວ ຍາດໄດ້ຫຼຽນລາງວັນວິທະຍາສາດທີ່ປະເທດໄທ

    ກະ­ຊວງ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ ໃນ​ນາມ​ເປັນ​ຈຸດ​ປະ­ສານ​ງານ​ວຽກ​ງານ​ອາ​ຊຽນ​ດ້ານ​ວິ­ທະ­ຍາ­ສາດ ເຕັກ​ໂນ​ໂລ​ຊີ ແລະ ນະ​ວັດ­ຕະ​ກຳ ໄດ້​ນຳ­ພາ​ຄະ­ນະ​ຜູ້​ຕິດ­ຕາມ ແລະ ນັກ­ຮຽນ​ຈາກ​ໂຮງ­ຮຽນ ມສ ວຽງ​ຈັນ ແລະ ໂຮງ­ຮຽນ​ກຽດ​ຕິ​ສັກ ລວມ​ທັງ​ໝົດ 10  ຄົນ ເຂົ້າ​ຮ່ວມ​ກິດ­ຈະ­ກຳ​ໂຄງ­ການ​ວິ­ທະ­ຍາ­ສາດ​ໜຸ່ມ​ນ້ອຍ​ອາ​ຊຽນ​ບວກ 3 ເປັນ​ໂຄງ­ການ​ໜຶ່ງ​ທີ່​ບັນ­ດາ​ປະ­ເທດ​ສະ­ມາ­ຊິກ​ອາ​ຊຽນ​ຜັດ­ປ່ຽນ​ກັນ​ເປັນ​ເຈົ້າ­ພາບ​ໃນ​ແຕ່​ລະ​ປີ ສຳ­ລັບ​ປີ 2019 ເປັນ​ຄັ້ງ​ທີ 8 ໂດຍ​ແມ່ນ​ປະ­ເທດ​ໄທ​ເປັນ​ເຈົ້າ­ພາບ​ຈັດ​ຂຶ້ນ​ວັນ​ທີ 9-15 ມິ­ຖຸ­ນາ 2019 ທີ່​ແຂວງ​ປະ­ທຸມ​ທາ­ນີ ພາຍ​ໃຕ້​ຫົວ­ຂໍ້ “ບົດ­ບາດ​ຂອງ​ຊາວ​ໜຸ່ມ​ໃນ​ການ​ສື່­ສານ​ເອົາ​ວຽກ​ວິ­ທະ­ຍາ­ສາດ​ເຂົ້າ​ໃນ​ການ­ຈັດ­ຕັ້ງ​ປະ­ຕິ­ບັດ​ເປົ້າ​ໝາຍ​ໃນ​ການ​ພັດ­ທະ­ນາ​ແບບ​ຍືນ​ຍົງ”.

    ຈຸດ­ປະ­ສົງ​ຂອງ​ໂຄງ­ການ ເພື່ອ​ຊຸກ­ຍູ້​ສົ່ງ­ເສີມ​ໃຫ້​ນັກ­ຮຽນ​ເກີດ​ມີ​ຄວາມ​ສົນ­ໃຈ​ກ່ຽວ​ກັບ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ​ຫຼາຍ​ຂຶ້ນ​ດ້ວຍ​ການ​ເຮັດ​ໃຫ້​ນັກ­ຮຽນ​ມີ​ຄວາມ​ຢາກ​ຮູ້ ໂດຍ​ຜ່ານ​ການ​ແລກ­ປ່ຽນ​ບົດ­ຮຽນ​ປະ­ສົບ​ການ ແລະ ການ​ເຮັດ​ທົດ​ລອງ​ຕົວ​ຈິງ ພ້ອມ​ທັງ​ເປັນ​ການ​ປູກ​ຈິດ​ສຳ­ນຶກ​ໃຫ້​ນັກ­ຮຽນ​ມີ​ຄວາມ​ມັກ​ຮັກ​ໃນ​ອາ­ຊີບ​ຕ່າງໆ​ຂອງ​ຂະ­ແໜງ­ການ​ກ່ຽວ​ກັບ​ວິ­ທະ­ຍາ­ສາດ ແລະ ເຕັກ​ໂນ​ໂລ​ຊີ​ໃນ​ອະ­ນາ­ຄົດ ນອກ​ນີ້ ຍັງ​ເປັນ​ການ​ສ້າງ​ໂອ­ກາດ​ໃຫ້​ນັກ­ຮຽນ​ໄດ້​ເສີມ​ສ້າງ​ສາຍ​ພົວ­ພັນ​ມິດ­ຕະ­ພາບ​ທີ່​ດີ ແລະ ເຂົ້າ​ຮ່ວມ​ບັນ­ດາ​ກິດ­ຈະ­ກຳ​ຕ່າງໆ ເຊັ່ນ: ນຳ​ສະ­ເໜີ​ຜົນ­ງານ​ປະ­ດິດ​ສ້າງ​ເປັນ​ຂອງ​ຕົນ​ເອງ​ເປັນ​ໂປ​ສ​ເຕີ (Poster Presentation) ເຮັດ​ທົດ​ລອງ​ຕົວ​ຈິງ​ໃນ​ຫ້ອງ​ທົດ​ລອງ ຮ່ວມ​ທັດ­ສະ­ນະ​ສຶກ​ສາ​ສະ­ຖານ­ທີ່​ວິ­ທະ­ຍາ­ສາດ​ຕ່າງໆ ແລະ ເຂົ້າ​ຮ່ວມ​ກິດ­ຈະ­ກຳ​ແລກ­ປ່ຽນ​ວັດ­ທະ­ນາ​ທຳ​ຮ່ວມ​ກັນ ໃນ​ປີ​ນີ້​ນອກ­ຈາກ​ນັກ­ຮຽນ​ບັນ­ດາ​ປະ­ເທດ​ສະ­ມາ­ຊິກ​ອາ​ຊຽນ​ແລ້ວ​ຍັງ​ມີ​ນັກ­ຮຽນ​ປະ­ເທດ​ບວກ 3 ຄື: ຈີນ ຍີ່­ປຸ່ນ ແລະ ສ ເກົາ­ຫຼີ ເຂົ້າ​ຮ່ວມ​ນຳ​ອີກ.

    ຜ່ານ​ການ​ເຂົ້າ​ຮ່ວມ​ແຂ່ງ­ຂັນ​ບັນ­ດາ​ກິດ­ຈະ­ກຳ​ຄັ້ງ​ນີ້ ນັກ­ຮຽນ​ຈາກ​ໂຮງ­ຮຽນ ມສ ວຽງ​ຈັນ ສາ­ມາດ​ຍາດ​ໄດ້​ຫຼຽນ​ເງິນ 1 ຫຼຽນ ຈາກ​ການ​ນຳ​ສະ­ເໜີ​ໂພ​ສ​ເຕີ ແລະ ໂຮງ­ຮຽນ​ກຽດ​ຕິ​ສັກ ຍາດ​ໄດ້​ຫຼຽນ​ທອງ 1 ຫຼຽນ ຈາກ​ການ​ເຮັດ​ທົດ​ລອງ​ໃນ​ຫ້ອງ​ປະ­ຕິ­ບັດ​ການ ຕາງ­ໜ້າ​ຈາກ​ໂຮງ­ຮຽນ ມສ ວຽງ​ຈັນ ແລະ ໂຮງ­ຮຽນ​ກຽດ​ຕິ​ສັກ ໄດ້​ຮັບ​ຫຼຽນ​ທອງ​ຄົນ​ລະ 1 ຫຼຽນ ຈາກ​ການ​ເຮັດ​ວຽກ​ເປັນ​ກຸ່ມ​ຮ່ວມ​ກັບ​ປະ­ເທດ​ອື່ນໆ ແລະ ຕາງ­ໜ້າ​ຈາກ​ໂຮງ­ຮຽນ​ກຽດ​ຕິ​ສັກ​ໄດ້​ຮັບ​ລາ­ງວັນ​ກຽດ­ຕິ­ຍົດ 1 ລາ­ງວັນ.

ຂ່າວທີ່ກ່ຽວຂ້ອງ