ຍອດ​ຈຳນວນ​ຜູ້ນຳ​ໃຊ້​ເຄືອ​ຂ່າຍ​ອິນ​ເຕີ​ເນັດ​ລະບົບ 5G ຢູ່​ໃນ ສ ເກົາຫຼີ ໄດ້​ຂຶ້ນ​ສູ່​ເປົ້າ 1 ລ້ານ​ລາຍ

509 19 ມິ.ຖ. 2019 ຂ່າວຕ່າງປະເທດ
ຍອດ​ຈຳນວນ​ຜູ້ນຳ​ໃຊ້​ເຄືອ​ຂ່າຍ​ອິນ​ເຕີ​ເນັດ​ລະບົບ 5G ຢູ່​ໃນ ສ ເກົາຫຼີ ໄດ້​ຂຶ້ນ​ສູ່​ເປົ້າ 1 ລ້ານ​ລາຍ

   ກະຊວງ​ວິທະຍາສາດ ແລະ​ເຕັກ​ໂນ​ໂລ​ຊີ​ຂອງ ສ ເກົາຫຼີ  ແຈ້ງ​ໃຫ້​ຮູ້​ວ່າ ຍອດ​ຍອດ​ຈຳນວນ​ຜູ້ນຳ​ໃຊ້​ເຄືອ​ຂ່າຍ​ອິນ​ເຕີ​ເນັດ​ເຄື່ອນ​ທີ່​ລະບົບ 5G ໄດ້​ຂຶ້ນ​ສູ່​ເປົ້າ 1 ລ້ານ​ລາຍ ໃນ​ວັນ​ທີ 10 ມິຖຸນາ​ທີ່​ຜ່ານ​ມາ ຊຶ່ງ​ເປັນ​ເວລາ 69 ວັນ ຫຼັງ​ຈາກ​ທີ່​ປະເທດ​ດັ່ງກ່າວ ກາຍເປັນ​ປະເທດ​ທຳ​ອິດ​ໃນ​ໂລກ ທີ່​ເປີດ​ຕົວ​ການ​ບໍລິການ​ການ​ຄ້າ 5G ເມື່ອ​ວັນ​ທີ 3 ເມສາ​ທີ່​ຜ່ານ​ມາ.

ການ​ເພີ່ມ​ຂຶ້ນ​ຂອງ​ປະລິມານ​ຜູ້ນຳ​ໃຊ້ ມີ​ຂຶ້ນ​ທ່າມກາງ​ທີ່​ປະລິມານ ສະຖານີ​ແຜ່​ຄື້ນ 5G ຢູ່​ໃນ ສ ເກົາຫຼີ​ບັນລຸ 61.246 ແຫ່ງ ເມື່ອ​ຕົ້ນ​ອາທິດ​ທີ່​ຜ່ານ​ມາ ເປັນ​ການ​ເພີ່ມ​ຂຶ້ນ​ເກືອບ 7% ຫຼື​ເທົ່າ​ກັບ 3.980 ສະຖານີ ນັບ​ແຕ່​ວັນ​ທີ 8 ພຶດສະພາ​ເປັນຕົ້ນ​ມາ.

     ໃນ​ຂະນະ​ດຽວ​ກັນ ວັນ​ທີ 15 ມິຖຸນາ​ນີ້ ກຸ່ມ​ບໍລິສັດ ວໍ​ດາ​ໂຟນ ຊຶ່ງ​ເປັນ​ບໍລິສັດ​ທຸລະ​ກິດ​ໂທລະ​ຄົມ​ຂ້າມ​ຊາດ ໄດ້​ເປີດ​ນຳ​ໃຊ້​ເຄືອ​ຂ່າຍ​ອິນ​ເຕີ​ເນັດ​ເຄື່ອນ​ທີ່​ລະບົບ 5G ຊຸດ​ທຳ​ອິດ​ຢູ່​ໃນ​ແອ​​ັສ​ປາຍ​ຢ່າງ​ເປັນ​ທາງ​ການ ໂດຍ​ກວມ​ເອົາ 15 ຕົວ​ເມືອງ. ແອ​​ັສ​ປາຍ​ໄດ້​ກາຍເປັນ​ໜຶ່ງ​ໃນ​ປະເທດ​ເອີ​ຣົບ ໃນ​ງວດ​ທຳ​ອິດ​ທີ່​ເປີດ​ນຳ​ໃຊ້​ເຄືອ​ຂ່າຍ​ອິນ​ເຕີ​ເນັດ​ເຄື່ອນ​ທີ່​ລະບົບ 5G. ຂ່າວ​ແຈ້ງວ່າ ບໍລິສັດ​ຫົວ​ເຫວີຍ ແມ່ນ​ຜູ້​ທີ່​ສະໜອງ​ເຄື່ອງ​ປະກອບ​ເຄືອ​ຂ່າຍ​ອິນ​ເຕີ​ເນັດ​ຂອງ​ກຸ່ມ​ບໍລິສັດ​ວໍ​ດາ​ໂຟນ ຊຶ່ງ​ສອງ​ຝ່າຍ​ໄດ້​ຮັກສາ​ສາຍ​ພົວພັນ​ການ​ຮ່ວມ​ມື​ມາ​ເປັນ 10 ກວ່າ​ປີ​ແລ້ວ.

ຂ່າວທີ່ກ່ຽວຂ້ອງ