ອິນ​ໂດ​ເນ​ເຊຍ ແລະ ມາ​ເລ​ເຊຍ ສົ່ງ​ຕູ້​ຄອນ​ເທນ​ເນີ​ບັນຈຸ​ຂີ້​ເຫຍື້ອ​ກັບ​ຄືນ​ໄປ​ຍັງ​ຕົ້ນ​ທາງ

468 19 ມິ.ຖ. 2019 ຂ່າວຕ່າງປະເທດ
ອິນ​ໂດ​ເນ​ເຊຍ ແລະ ມາ​ເລ​ເຊຍ ສົ່ງ​ຕູ້​ຄອນ​ເທນ​ເນີ​ບັນຈຸ​ຂີ້​ເຫຍື້ອ​ກັບ​ຄືນ​ໄປ​ຍັງ​ຕົ້ນ​ທາງ

   ກະຊວງ​ສິ່ງແວດລ້ອມ ແລະ​ປ່າໄມ້ ຂອງ​ອິນ​ໂດ​ເນ​ເຊຍ ແຈ້ງ​ໃຫ້​ຮູ້ເມື່ອ​ວັນ​ທີ 17 ມິຖຸນາ​ນີ້​ວ່າ ອິນ​ໂດ​ເນ​ເຊຍ ຈະ​ສົ່ງ​ຕູ້​ຄອນ​ເທນ​ເນີ (container) ບັນຈຸ​ຂີ້​ເຫຍື້ອ​ທີ່​ເປັນ​ພິດ​ອັນຕະລາຍ ຈຳນວນ 5 ຕູ້ ກັບ​ຄືນ​ໄປ​ຍັງ​ຕົ້ນ​ທາງ ທີ່ ສ ອາ​ເມ​ຣິ​ກາ.

    ແຈ້ງ​ການ​ດັ່ງກ່າວ​ໃຫ້​ຮູ້​ວ່າ ຕູ້​ຄອນ​ເທນ​ເນີ​ເຫຼົ່ານັ້ນ ໄດ້​ຍົກ​ຂຶ້ນ​ໄປ​ໃນ​ກຳປັ່ນ​ແລ້ວ ແລະ​ ຈະ​ເຂົ້າ​ທຽບ​ທ່າ​ຂອງ ສ ອາ​ເມ​ຣິ​ກາ ໃນ​ບໍ່​ຊ້າ​ນີ້ ເຖິງ​ວ່າ​ໃນ​ເບື້ອງ​ຕົ້ນ ພວກ​ຕູ້​ຄອນ​ເທນ​ເນີ​ດັ່ງກ່າວ ມີ​ຕົ້ນ​ທາງ​ອອກ​ມາ​ຈາກ​ກາ​ນາ​ດາ​ກໍ​ຕາມ.

    ກ່ອນ​ໜ້າ​ນີ້ ມີ​ລວມ​ແລ້ວ 65 ຕູ້​ຄອນ​ເທນ​ເນີ ທີ່​ບັນຈຸ​ຂີ້​ເຫຍື້ອ ຊຶ່ງ​ຖືກ​ຖື​ວ່າ “ເປັນ​ມິດ​ກັບ​ສິ່ງແວດລ້ອມ” (ເຈ້ຍ ໄມ້ ເຄື່ອງ​ຕັດຫຍິບ ແລະ​ເກີບ) ໄດ້​ຖືກ​ສົ່ງ​ເຂົ້າ​ໄປ​ໃນ ອິນ​ໂດ​ເນ​ເຊຍ. ເຖິງ​ຢ່າງໃດ​ກໍ​ຕາມ ຫຼັງ​ຈາກ​ທີ່​ໄດ້​ກວດກາ​ເບິ່ງ​ແລ້ວ ເຫັນ​ວ່າ​ມີ​ຢ່າງ​ໜ້ອຍ 5 ຕູ້​ຄອນ​ເທນ​ເນີ ບັນຈຸ​ຂີ້​ເຫຍື້ອ​ທີ່​ເປັນ​ພິດ​ອັນຕະລາຍ.

    ກ່ອນ​ໜ້າ​ນີ້ ມາ​ເລ​ເຊຍ ກໍ​ໄດ້​ປະຕິບັດ​ມາດ​ຕະການ​ທີ່​ຄ້າຍຄື​ກັບ​ການ​ທີ່​ອິນ​ໂດ​ເນ​ເຊຍ ປະຕິບັດ​ດັ່ງກ່າວ. ໃນຕໍ່ໜ້າ​ນີ້ ມາ​ເລ​ເຊຍ​ຍັງ​ຈະ​ສົ່ງ 60 ຕູ້​ຄອນ​ເທນ​ເນີ ທີ່​ບັນຈຸ​ຂີ້​ເຫຍື້ອ 3.000 ໂຕນ ກັບ​ໄປ​ຍັງ 14 ປະເທດ ໃນ​ນັ້ນ​ມີ ອົດ​ສະ​ຕຣາ​ລີ ກາ​ນາ​ດາ ແລະ ສ ອາ​ເມ​ຣິ​ກາ.

    ນອກຈາກ​ສອງ​ປະເທດ​ດັ່ງກ່າວ​ແລ້ວ ໃນ​ໄລຍະ​ຫຼັງໆ​ມາ​ນີ້ ກໍ​ໄດ້​ເກີດ​ມີ​ຄວາມ​ເຄັ່ງ​ຕຶງ ທາງ​ດ້ານ​ການ​ທູດ ລະຫວ່າງ ກາ​ນາ​ດາ ກັບ​ຟີ​ລິບ​ປິນ ຫຼັງ​ຈາກ​ທີ່​ກາ​ນາ​ດາ ປະຕິເສດ​ຮັບ​ເອົາ 69 ຕູ້​ຄອນ​ເທນ​ເນີ ບັນຈຸ​ຂີ້​ເຫຍື້ອ ຊຶ່ງ​ບໍ່​ສາມາດ​ປຸງ​ແຕ່ງ​ຄືນໃໝ່​ໄດ້. ຟີ​ລິບ​ປິນ ໄດ້​ຖອນ​ເອກ​ອັກ​ຄະ​ລັດ​ຖະ​ທູດ ແລະ​ກົງ​ສູນ​ໃຫຍ່​ຂອງ​ຕົນ ອອກ​ໄປ​ຈາກ​ກາ​ນາ​ດາ. ໃນ​ເວລາ​ຕໍ່​ມາ ກາ​ນາ​ດາ ຕ້ອງ​ໄດ້​ຮັບ​ເອົາ​ຂີ້​ເຫຍື້ອ​ດັ່ງກ່າວ​ກັບ​ຄືນ.

ຂ່າວທີ່ກ່ຽວຂ້ອງ