ເຫດການ​ຮຸນ​ແຮງ​ຢູ່​ໃນ​ນີ​ເຊຣີ

358 19 ມິ.ຖ. 2019 ຂ່າວຕ່າງປະເທດ
ເຫດການ​ຮຸນ​ແຮງ​ຢູ່​ໃນ​ນີ​ເຊຣີ

    ອົງການ​ກູ້​ໄພ​ສຸກ​ເສີນ​ຂອງ​ນີ​ເຊຣີ ແຈ້ງ​ໃຫ້​ຮູ້ເມື່ອ​ວັນ​ທີ 17 ມິຖຸນາ​ນີ້​ວ່າ  ມີ​ຜູ້​ເສຍ​ຊີວິດ 30 ຄົນ ຈາກ​ເຫດການ​ໂຈມ​ຕີ​ສະລະ​ຊີບ​ລາຍ​ໜຶ່ງ ທີ່​ດຳເນີນ​ການ​ໂດຍ​ພວກ​ມື​ປືນ​ທີ່​ຂຶ້ນ​ກັບ​ກຸ່ມ ໂບ​ໂກ ຮາ​ຣາມ ຊຶ່ງ​ເກີດ​ຂຶ້ນ​ຢູ່​ໃນ​ເມືອງ ກອນ​ດູ​ກາ (ພາກ​ຕາເວັນ​ອອກ​ສ່ຽງ​ເໜືອ​ນີ​ເຊຣີ).

    ຂ່າວ​ແຈ້ງວ່າ ມີ​ວາງ​ລະເບີດ 3 ຄົນ ໄດ້​ຈຸດ​ສະ​ນວນ​ລະເບີດ ຢູ່​ດ້ານ​ນອກ​ເຂດ​ທີ່​ມີ​ຄົນ​ເຕົ້າໂຮມ​ຢູ່​ເປັນ​ຈຳນວນ​ຫຼາຍ ເພື່ອ​ຊົມ​ການ​ເຕະບານ​ນັດ​ໜຶ່ງ ເມື່ອ​ຄ່ຳ​ຄືນ​ຂອງ​ວັນ​ທີ 16 ມິຖຸນາ.

ກຸ່ມ​ມື​ປືນ ໂບ​ໂກ ຮາ​ຣາມ ເລີ່ມ​ເຄື່ອນ​ໄຫວ​ລຸກ​ຮື​ຂຶ້ນ​ຢູ່​ໃນ​ເຂດ​ທິດຕາເວັນອອກ​ສ່ຽງ​ເໜືອ​ນີ​ເຊຣີ ມາ​ແຕ່​ປີ 2009 ດ້ວຍ​ກົນອຸບາຍ​ເພື່ອ​ສ້າງຕັ້ງ​ອັນ​ທີ່​ເອີ້ນ​ວ່າ ລັດ​ອິດ​ສະ​ລາມ ຫຼັງ​ຈາກ​ນັ້ນ​ກໍ​ໄດ້ ເປີດ​ກວ້າງ​ພື້ນ​ທີ່​ການເຄື່ອນໄຫວ​ໄປ​ຍັງ​ນີ​ເຊ ກາ​ເມີ​ຣູນ ແລະ ຈາດ ທີ່​ເປັນ​ປະເທດ​ໃກ້​ຄຽງ. ເຫດການ​ທີ່​ພົວພັນ​ເຖິງ ໂບ​ໂກ ຮາ​ຣາມ ໄດ້​ສົ່ງ​ຜົນ​ໃຫ້​ມີ​ຜູ້​ເສຍ​ຊີວິດ​ປະມານ 27.000 ຄົນ ແລະ​ມີ​ຜູ້​ຕ້ອງ​ໄດ້​ອົບ​ພະ​ຍົບ​ອອກ​ໄປ​ຈາກ​ເຮືອນ​ຊານ 1,8 ລ້ານ​ຄົນ.

ຂ່າວທີ່ກ່ຽວຂ້ອງ