ເກີດ​ອຸບັດເຫດ​ການ​ຄົມມະນາຄົມ​ຢູ່​ໃນ​ປະເທດ​ຕ່າງໆ

223 19 ມິ.ຖ. 2019 ຂ່າວຕ່າງປະເທດ
ເກີດ​ອຸບັດເຫດ​ການ​ຄົມມະນາຄົມ​ຢູ່​ໃນ​ປະເທດ​ຕ່າງໆ

    ຂ່າວສານ​ຫວຽດນາມ ລາຍ​ງານ​ວ່າ ໄດ້​ເກີດ​ອຸບັດເຫດ​ການ​ຄົມມະນາຄົມ​ຄັ້ງ​ຮ້າຍ​ແຮງ ເມື່ອ​ເວລາ​ເຊົ້າ​ມືດ​ຂອງ ວັນ​ທີ 17 ມິຖຸນາ​ນີ້ ໂດຍ​ເກີດ​ຂຶ້ນ​ຢູ່​ທາງ​ຫຼວງ​ໝາຍ​ເລກ 6 ໃນ​ຍ່ານ​ທີ່​ແລ່ນ​ຜ່ານ ແຂວງ​ຫວ່າ​ບິ່ງ (ພາກ​ເໜືອ​ຫວຽດ ນາມ) ເມື່ອ​ລົດ​ຂົນສົ່ງ​ຂະໜາດ 5 ໂຕນ ຄັນ​ໜຶ່ງ ໝາຍ​ເລກ​ທະບຽນ UN-8500 ທີ່​ແລ່ນ​ໄປ​ໃນ​ທິດ​ທາງ ເຊີນ​ລາ - ຮ່າ​ໂນ້ຍ ໄດ້​ຕຳ​ກັບ​ລົດ​ໂດຍສານ​ຕຽງ​ນອນ​ຄັນ​ໜຶ່ງ ທີ່​ພວມ​ແລ່ນ​ໄປ​ໃນ​ທິດ​ກົງກັນຂ້າມ ກັບ​ລົດ​ຂົນສົ່ງ​ດັ່ງກ່າວ ສົ່ງ​ຜົນ​ໃຫ້​ມີ​ຜູ້​ເສຍ​ຊີວິດ 3 ຄົນ ແລະ​ບາດເຈັບ​ອີກ 37 ຄົນ.

   ທີ່​ອາ​ຟະ​ຣິກ​ກາ​ໃຕ້: ແຫຼ່ງ​ຂ່າວ​ຈາກ​ກະຊວງ​ຄົມມະນາຄົມ ຂົນສົ່ງ ຂອງ​ອາ​ຟະ​ຣິກ​ກາ​ໃຕ້ ໃຫ້​ຮູ້​ວ່າ ລົດ​ບັດ​ໂດຍສານ​ຂະໜາດ​ນ້ອຍ (minibus) ຄັນ​ໜຶ່ງ ໄດ້​ຕຳ​ລັບ​ລົດ​ໂດຍສານ ຂະໜາດ​ໃຫຍ່​ຄັນ​ໜຶ່ງ ຊຶ່ງ​ເກີດ​ຂຶ້ນ​ຢູ່​ເທິງ​ທາງ​ດ່ວນ​ໃນ​ແຂວງ ລິມ​ໂປ​ໂປ ຂອງ​ອາ​ຟະ​ຣິກ​ກາ​ໃຕ້ ເມື່ອ​ວັນ​ທີ 16 ມິຖຸນາ​ນີ້ ສົ່ງ​ຜົນ​ໃຫ້​ມີ​ຜູ້​ເສຍ​ຊີວິດ 24 ຄົນ ແລະ​ບາດເຈັບ​ອີກ 3 ຄົນ. ຜູ້​ທີ່​ເສຍ​ຊີວິດ​ເຫຼົ່ານັ້ນ ເປັນ​ຜູ້ໂດຍສານ​ຢູ່​ໃນ​ລົດ​ບັດ​ໂດຍສານ​ຂະໜາດ​ນ້ອຍ ຊຶ່ງ​ບັນທຸກ​ຜູ້ໂດຍສານ ເກີນ​ກຳນົດ​ເຖິງ 10 ຄົນ.

  ທີ່​ອິນ​ໂດ​ເນ​ເຊຍ: ເຈົ້າ​ໜ້າທີ່​ຕຳຫຼວດ​ໃນ​ທ້ອງຖິ່ນ​ໃຫ້​ຮູ້​ວ່າ ມີ​ຜູ້​ເສຍ​ຊີວິດ 12 ຄົນ ແລະ​ບາດເຈັບ​ອີກ 43 ຄົນ ຈາກ​ອຸບັດເຫດ​ການ​ຄົມມະນາຄົມ ທີ່​ເກີດ​ຂຶ້ນ​ເມື່ອ​ວັນ​ທີ 17 ມິຖຸນາ​ນີ້ ເມື່ອ​ຜູ້ໂດຍສານ​ຄົນ​ໜຶ່ງ​ຢູ່​ເທິງ​ລົດ​ບັດ ແຍ່ງ​ເອົາ​ພວງມາໄລ ຫຼັງ​ຈາກ​ເກີດ​ການ​ຜິດ​ຖຽງ​ກັບ​ຄົນ​ຂັບ​ລົດ. ອຸບັດເຫດ​ດັ່ງກ່າວ​ເກີດ​ຂຶ້ນ ໃນ​ເວລາ​ທີ່​ລົດ​ບັດ​ດັ່ງກ່າວ ປ່ຽນ​ທິດ​ທາງ​ແລ່ນ​ຢ່າງ​ກະທັນຫັນ ແລະ​ແລ່ນ​ເຂົ້າ​ໄປ​ໃນ​ເລນ​ຂອງ​ທິດ​ທາງ​ກົງກັນຂ້າມ ແລະ​ຕຳ​ກັບ​ລົດຍົນ 2 ຄັນ ເຮັດ​ໃຫ້​ລົດ​ຂົນ ສົ່ງ​ຄັນ​ໜຶ່ ພິກ​ປີ້ນ. ເກດ​ການ​ດັ່ງກ່າວ ເກີດ​ຂຶ້ນ​ຢູ່​ເທິງ​ເສັ້ນທາງ​ດ່ວນ ຢູ່​ໃນ ຈາ​ວາ​ຕາເວັນຕົກ.

   ທີ່​ເວ​ເນ​ຊູ​ເອ​ລາ: ມີ​ຜູ້​ເສຍ​ຊີວິດ 18 ຄົນ ຈາກ​ທີ່​ມີ​ຜູ້ໂດຍສານ​ທັງ​ໝົດ 60 ຄົນ ຢູ່​ໃນ​ລົດ​ບັດ​ຄັນ​ໜຶ່ງ ຊຶ່ງ​ເກີດ​ຂຶ້ນ​ໃນ​ວັນ​ທີ 16 ມິຖຸນາ ຢູ່​ໃນ​ພື້ນ​ທີ່​ລັດ ຊູ​ເລຍ ຂອງ​ເວ​ເນ​ຊູ​ເອ​ລາ. ອຸບັດເຫດ​ດັ່ງກ່າວ​ເກີດ​ຂຶ້ນ ເມື່ອ​ລົດ​ບັດ​ຄັນ​ດັ່ງກ່າວ​ເກີດ​ຕີນ​ແຕກ  ເຮັດ​ໃຫ້​ຄົນ​ຂັບ​ລົດ​ເກີດ​ເສຍ​ຫຼັກ ແລະ​ແລ່ນ​ອອກ​ໄປ​ນອກ​ຂອບ​ທາງ ແລ້ວ​ຕົກລົງ​ໄປ​ໃນ​ເຫວ.

ຂ່າວທີ່ກ່ຽວຂ້ອງ