ມຽນ​ມາ - ຫວຽດນາມ ຊຸກຍູ້​ການ​ຮ່ວມ​ມື​ທາງ​ດ້ານ​ເສດຖະກິດ ການ​ຄ້າ ແລະ ການ​ລົງທຶນ

190 19 ມິ.ຖ. 2019 ຂ່າວຕ່າງປະເທດ
ມຽນ​ມາ - ຫວຽດນາມ ຊຸກຍູ້​ການ​ຮ່ວມ​ມື​ທາງ​ດ້ານ​ເສດຖະກິດ ການ​ຄ້າ ແລະ ການ​ລົງທຶນ

     ຂ່າວສານ​ຫວຽດນາມ ລາຍ​ງານ​ວ່າ ໃນ​ຂອບ​ຂອງ​ການ​ຢ້ຽມຢາມ​ມຽນ​ມາ ເປັນ​ເວລາ 3 ວັນ (16-18 ມິຖຸນາ) ນັ້ນ ຮອງ​ນາຍົກລັດຖະມົນຕີ​ຫວຽດນາມ ເວືອງ​ດິ່ງ​ເຮ້ ໄດ້​ພົບ​ປະ​ເຈລະຈາ​ກັບ ຮອງ​ປະທານາທິບໍດີ​ມຽນ​ມາ ມິນ ສະ​ເວ ຊຶ່ງ​ມີ​ຂຶ້ນ​ໃນ​ວັນ​ທີ 17 ມິຖຸນາ​ນີ້.

     ໃນ​ເວລາ​ແລກປ່ຽນ​ຄວາມ​ຄິດ​ຄວາມ​ເຫັນ ກ່ຽວ​ກັບ​ການ​ພົວພັນ​ລະຫວ່າງ​ສອງ​ປະເທດ ມຽນ​ມາ ແລະ ​ຫວຽດນາມ ສອງ​ຝ່າຍ​ໄດ້​ສະແດງ​ຄວາມ​ເພິງ​ພໍໃຈ ຕໍ່​ບາດກ້າວ​ພັດທະນາ​ຢ່າງ​ແຂງແຮງ ໃນ​ຂົງເຂດ​ຕ່າງໆ ເຊັ່ນ ການເມືອງ ປ້ອງ​ກັນ​ຊາດ ປ້ອງ​ກັນ​ຄວາມ​ສະຫງົບ ເສດຖະກິດ ການ​ຄ້າ ການ​ລົງທຶນ ພະລັງງານ ການທ່ອງທ່ຽວ ແລະ​ ອື່ນໆ.

ສອງ​ຝ່າຍ​ກໍ​ຕີ​ລາຄາ​ສູງ ຕໍ່​ການ​ຮັກສາ​ບັນດາ​ກົນ​ໄກ​ການ​ຮ່ວມ​ມື​ໄວ້​ຢ່າງ​ສະ​ໝ່ຳ​ສະເໝີ ໃນ​ນັ້ນ​ມີ ການຈັດຕັ້ງ​ສະໄໝ​ປະຊຸມ​ຄັ້ງ​ທີ 9 ຂອງ​ຄະນະ​ກຳມະການ​ປະສົມ ກ່ຽວ​ກັບ​ການ​ຮ່ວມ​ມື​ແບບ​ສອງ​ຝ່າຍ ຂອງ​ສອງ​ປະເທດ ຢ່າງ​ສຳເລັດ​ຜົນ ຊຶ່ງ​ຈັດ​ຂຶ້ນ​ທີ່​ນະຄອນຫຼວງ​ຮ່າ​ໂນ້ຍ (ຫວຽດນາມ) ເມື່ອ​ເດືອນ ມີນາ​ທີ່​ຜ່ານ​ມາ.

    ເນື່ອງ​ໃນ​ໂອກາດ​ນີ້ ສອງ​ຝ່າຍ​ໄດ້​ສຸມ​ໃສ່​ແລກປ່ຽນ​ຄວາມ​ຄິດ​ຄວາມ​ເຫັນ ກ່ຽວ​ກັບ​ມາດ​ຕະການ ຊຸກຍູ້​ການ​ຮ່ວມ​ມື ທາງ​ກ້ານ​ເສດຖະກິດ ການ​ຄ້າ ແລະ ​ການ​ລົງທຶນ ລະຫວ່າງ​ມຽນ​ມາ ກັບ​ຫວຽດນາມ ຊຶ່ງ​ເປັນ​ເສົາຄ້ຳ​ທີ່​ສຳຄັນ ແລະ​ ເປັນ​ຈຸດ​ທີ່​ຮຸ່ງ​ໃສ ໃນ​ການ​ພົວພັນ​ລະຫວ່າງ​ສອງ​ປະເທດ.

ຂ່າວທີ່ກ່ຽວຂ້ອງ