ຂ່າວຫຼ້າສຸດ

ສ ອາ​ເມ​ຣິ​ກາ ສົ່ງ​ທະຫານ​ເພີ່ມ​ເຕີມ 1.000 ຄົນ ໄປ​ຍັງ​ເຂດ​ຕາເວັນ​ອອກ​ກາງ

197 19 ມິ.ຖ. 2019 ຂ່າວຕ່າງປະເທດ
ສ ອາ​ເມ​ຣິ​ກາ ສົ່ງ​ທະຫານ​ເພີ່ມ​ເຕີມ 1.000 ຄົນ ໄປ​ຍັງ​ເຂດ​ຕາເວັນ​ອອກ​ກາງ

   ທາງ​ການ ສ ອາ​ເມ​ຣິ​ກາ ຖະແຫຼງ​ເມື່ອ​ວັນ​ທີ 17 ມິຖຸນາ​ນີ້​ວ່າ ສ ອາ​ເມ​ຣິ​ກາ ໄດ້​ຕົກລົງ​ເພີ່ມ ທະວີ​ທະຫານ​ຕື່ມ​ອີກ 1.000 ຄົນ ໄປ​ຍັງ​ເຂດ​ຕາເວັນ​ອອກ​ກາງ ທ່າມກາງ​ທີ່​ຄວາມ​ເຄັ່ງ​ຕຶງ​ກັບ ອີ​ຣານ​ເພີ່ມ​ຂຶ້ນ ແລະ​ເກີດ​ມີ​ການ​ໂຈມ​ຕີ​ກຳປັ່ນ​ບັນທຸກ​ນ້ຳມັນ ຢູ່​ໃນ​ເຂດ​ດັ່ງກ່າວ.

    ທ່ານ ພາ​ຕຣິກ ຊາ​ນາ​ຮັນ ຜູ້​ຮັກສາ​ການ​ລັດຖະມົນຕີ​ປ້ອງ​ກັນ​ປະເທດ ສ ອາ​ເມ​ຣິ​ກາ ຢືນຢັນ​ວ່າ ການ​ສົ່ງ​ທະຫານ​ເພີ່ມ​ເຕີມ​ດັ່ງກ່າວ ແມ່ນ​ເພືອ​ຈຸດປະສົງ “ປ້ອງ​ກັນ​ຕົວ” ຕໍ່​ໄພ​ຄຸກ​ຄາມ ຢູ່​ໃນ​ທະເລ ເທິງ​ອາກາດ ແລະ​ເທິງ​ບົກ ຢູ່​ໃນ​ເຂດ​ຕາເວັນ​ອອກ​ກາງ. ຄຽງ​ຄູ່​ກັນ​ນັ້ນ ທ່ານ ຊາ​ນາ​ຮັນ ກໍ​ເຫັນ​ວ່າ ການ​ດຳເນີນ​ການ​ຂອງ​ອີ​ຣານ ພວມ​ຄຸກ​ຄາມ​ຕໍ່​ຜົນ​ປະໂຫຍດ ແລະ ​ກອງ​ກຳລັງ​ຂອງ ສ ອາ​ເມ​ຣິ​ກາ ຢູ່​ໃນ​ເຂດ​ດັ່ງກ່າວ.

    ເມື່ອ​ວັນ​ທີ 13 ມິຖຸນາ​ທີ່​ຜ່ານ​ມາ ກຳປັ່ນ Kokuka Courageous ຂອງ​ຍີ່ປຸ່ນ ຊຶ່ງ​ບັນທຸກ ເມ​ທານ​​ອລ 25.000 ໂຕນ ໄດ້​ຖືກ​ໂຈມ​ຕີ​ຢູ່​ໃນ​ອ່າວ​ໂອ​ມານ ໃນ​ຂະນະ​ທີ່​ພວມ​ແລ່ນ​ມຸ່ງ​ໜ້າ​ໄປ​ຍັງ ທ່າ​ກຳປັ່ນ​ຂອງ​ສະຫະລັດ ອາ​ຣັບ ເອ​ມີ​ເຣດ (UEA). ກຳປັ່ນ​ບັນທຸກ​ນ້ຳມັນ​ອີກ​ລຳ​ໜຶ່ງ ຄື​ກຳປັ່ນ Front Altair ຂອງ​ນອກ​ແວ ກໍ​ຖືກ​ໂຈມ​ຕີ​ຢູ່​ໃນ​ເຂດ​ດັ່ງກ່າວ​ໃນ​ວັນ​ດຽວ​ກັນ.

ຂ່າວທີ່ກ່ຽວຂ້ອງ