ປະທານ​ປະເທດ​ຈີນ ພົບ​ປະ​ກັບ​ປະທານາທິບໍດີ​ຕາ​ຈິ​ກິດ​ສະຖານ

299 19 ມິ.ຖ. 2019 ຂ່າວຕ່າງປະເທດ
ປະທານ​ປະເທດ​ຈີນ ພົບ​ປະ​ກັບ​ປະທານາທິບໍດີ​ຕາ​ຈິ​ກິດ​ສະຖານ

    ວັນ​ທີ 15 ມິຖຸນາ​ນີ້ ທ່ານ​ສີ​ຈິ້ນ​ຜິງ ປະທານ​ປະເທດ​ຈີນ ໄດ້​ພົບ​ປະ​ກັບ​ທ່ານ​ເອ​ໂມ​ມາລີ ຣາ​ມອນ​ນອບ ປະທານາທິບໍດີ​ຕາ​ຈິ​ກິດ​ສະຖານ ຢູ່​ນະຄອນຫຼວງ​ດູ​ຊັນ​ແບ ໂດຍ​ປະມຸກ​ລັດ​ທັງ​ສອງ ໄດ້​ຕີ​ລາຄາ​ຢ່າງ​ສູງ​ຕໍ່​ການ​ພົວພັນ​ລະຫວ່າງ​ຈີນ ກັບ​ຕາ​ຈິ​ກິດ​ສະຖານ ກໍ​ຄື​ໝາກຜົນ​ການ​ຮ່ວມ​ມື​ລະຫວ່າງ​ສອງ​ປະເທດ​ໃນ​ຂົງເຂດ​ຕ່າງໆ ການ​ຮ່ວມ​ກັນ​ວາງ​ແຜນ​ພັດທະນາ​ໃໝ່ ໃນ​ການ​ຂະຫຍາຍ​ການ​ພົວພັນ​ລະຫວ່າງ​ສອງ​ຝ່າຍ ເຫັນ​ດີ​ເປັນ​ເອກະ​ພາບ​ກັນ​ລົງ​ເລິກ​ການ​ພົວພັນ​ຄູ່​ຮ່ວມ​ຍຸດ​ທະ​ສາດ​ຮອບດ້ານ ທີ່​ມີ​ຄວາມ​ຈິງ​ໃຈ​ຕໍ່​ກັນ ໄວ້​ເນື້ອ​ເຊື່ອ​ໃຈ​ກັນ ແລະ​ ການ​ຮ່ວມ​ມື​ແບບ​ຕ່າງ​ຝ່າຍ​ຕ່າງ​ມີ​ຜົນ​ປະໂຫຍດ ສຸມ​ກຳລັງ​ເພື່ອ​ພັດທະນາ​ມິດຕະພາບ​ລະຫວ່າງ​ຂອງ​ສອງ​ປະເທດ​ໃນ​ທຸກໆ​ສະພາວະ​ການ ຊຸກຍູ້​ການ​ສ້າງ​ປະຊາ​ຄົມ​ຮ່ວມ​ຊາຕາກຳ​ມວນ​ມະນຸດ ບັນລຸ​ການ​ພັດທະນາ ແລະ ​ຄວາມ​ຈະເລີນ​ຮຸ່ງເຮືອງ​ຮ່ວມ​ກັນ.

     ພາຍຫຼັງ​ພົບ​ປະກັນ ປະມຸກ​ລັດ​ທັງ​ສອງ ໄດ້​ເຂົ້າ​ຮ່ວມ​ພິທີ​ເປີດ​ຮູບ​ຈຳລອງ​ໂຄງການ​ຕຶກ​ລັດ​ຖະ​ສະພາ ແລະ ຕຶກ​ຫ້ອງການ​ລັດຖະບານ ທີ່​ຈີນ​ຊ່ວຍເຫຼືອ​ກໍ່ສ້າງ​ໃຫ້​ແກ່​ຕາ​ຈິ​ກິດ​ສະຖານ. ຫຼັງ​ຈາກ​ນັ້ນ ປະມຸກ​ລັດ​ສອງ​ປະເທດ ໄດ້​ລົງ​ນາມ​ໃນ “ຖະແຫຼງການ​ຮ່ວມ ​ສປ ຈີນ - ຕາ​ຈິ​ກິດ​ສະຖານ ກ່ຽວ​ກັບ​ລົງ​ເລິກ​ການ​ພົວພັນ​ຄູ່​ຮ່ວມ​ຍຸດ​ທະ​ສາດ​ຮອບດ້ານ​ຕື່ມ​ອີກ.” ແລະ​ໄດ້​ເປັນ​ສັກຂີ​ພິຍານ​ໃນ​ພິທີ​ແລກປ່ຽນ​ເອກະສານ​ຮ່ວມ​ມື​ສອງ​ຝ່າຍ​ຫຼາຍ​ສະບັບ.

ຂ່າວທີ່ກ່ຽວຂ້ອງ