ເມັກ​ຊິກ ຈັບ​ກຸມ​ຜູ້​ຍ້າຍ​ຖິ່ນ​ຖານ​ຢ່າງ​ຜິດ​ກົດໝາຍ​ເກືອບ 800 ຄົນ

188 19 ມິ.ຖ. 2019 ຂ່າວຕ່າງປະເທດ
ເມັກ​ຊິກ ຈັບ​ກຸມ​ຜູ້​ຍ້າຍ​ຖິ່ນ​ຖານ​ຢ່າງ​ຜິດ​ກົດໝາຍ​ເກືອບ 800 ຄົນ

     ເຈົ້າ​ໜ້າທີ່​ຂອງ​ເມັກ​ຊິກ ແຈ້ງ​ໃຫ້​ຮູ້ເມື່ອ​ວັນ​ທີ 17 ມິຖຸນາ​ນີ້​ວ່າ ກອງ​ກຳລັງ​ທີ່​ກ່ຽວຂ້ອງ ໄດ້​ຈັບ​ກຸມ​ຜູ້​ຍ້າຍ​ຖິ່ນ​ຖານ​ຢ່າງ​ຜິດ​ກົດໝາຍ ຢູ່​ໃນ​ພື້ນ​ທີ່​ລັດ ເວ​ຣາກ​ຣຸ​​ສ (ພາກ​ຕາເວັນ​ອອກ​ຂອງ​ເມັກ​ຊິກ) ລວມ​ແລ້ວ 791 ຄົນ ທີ່​ມາ​ຈາກ​ບັນດາ​ປະເທດ​ໃນ​ເຂດ​ອາ​ເມ​ຣິກ​ກາງ ໃນ​ນັ້ນ​ເປັນ​ເດັກນ້ອຍ 368 ຄົນ ທີ່​ມີ​ອາຍຸ​ຕ່ຳ​ກວ່າ 8 ປີ.

     ແຈ້ງ​ການ​ຂອງ​ສະ​ຖາ​ບັນ​ການ​ຍ້າຍ​ຖິ່ນ​ຖານ​ແຫ່ງ​ຊາດ ຂອງ​ເມັກ​ຊິກ ໃຫ້​ຮູ້​ວ່າ ການ​ຈັບ​ກຸມ​ດັ່ງກ່າວ ມີ​ຂຶ້ນ​ຢູ່​ໃນ​ສະຖານທີ່ 2 ແຫ່ງ ຊຶ່ງ​ຕາມ​ນັ້ນແລ້ວ ບັນດາ​ຜູ້​ຍ້າຍ​ຖິ່ນ​ຖານ ໄດ້​ລັກ​ຂຶ້ນ​ລົດ​ພວງ 4 ຄັນ. ໃນ​ຂະນະ​ດຽວ​ກັນ ຂ່າວສານ AFP ອ້າງ​ຕາມ​ແຫຼ່ງ​ຂ່າວ​ໜຶ່ງ ໃຫ້​ຮູ້​ວ່າ ໃນ​ຈຳນວນ​ຜູ້​ທີ່​ຖືກ​ຈັບ​ກຸມ​ນັ້ນ ມີ​ພົນລະເມືອງ​ຂອງ​ກົວ​ເຕ​ມາລາ 413 ຄົນ ຊາວ​ຮົງ​ດູ​​ຣັສ 330 ຄົນ ແລະ ຊາວ ແອນ ຊານ​ວາ​ດໍ 39 ຄົນ. ມີ​ອີກ​ແຫຼ່ງ​ຂ່າວ​ໜຶ່ງ​ໃຫ້​ຮູ້​ວ່າ ຜູ້​ຖືກ​ສົງ​ໃສ​ວ່າ​ຄ້າ​ມະນຸດ ກໍ​ໄດ້​ຖືກ​ຈັບ​ກຸມ 6 ຄົນ.

     ການ​ດຳເນີນ​ການ​ດັ່ງກ່າວ​ຂອງ​ເມັກ​ຊິກ ມີ​ຂຶ້ນ​ຢູ່​ໃນ​ໄລຍະ 45 ວັນ ໃນ​ການ​ປາບ​ປາມ​ການ​ຍ້າຍ​ຖິ່ນ​ຖານ​ຢ່າງ​ຜິດ​ກົດໝາຍ ຂອງ​ລັດຖະບານ​ເມັກ​ຊິກ ທີ່​ດຳເນີນ​ໄປ​ຢູ່​ໃນ​ເຂດ​ຊາຍ​ແດນ​ທາງ​ທິດໃຕ້​ຂອງ​ປະເທດ​ນີ້ ຄື​ກັບ​ວ່າ​ເປັນ​ສ່ວນ​ໜຶ່ງ​ຂອງ​ຂໍ້​ຕົກລົງ ທີ່​ບັນລຸ​ໄດ້​ກັບ ສ ອາ​ເມ​ຣິ​ກາ ເມື່ອ​ຕົ້ນ​ເດືອນ​ມິຖຸນາ​ນີ້ ທັງ​ນີ້​ກໍ​ເພື່ອ​ເປັນ​ການ​ຫຼີກເວັ້ນ​ຕໍ່​ການ​ທີ່​ປະທານາທິບໍດີ ສ ອາ​ເມ​ຣິ​ກາ ໂດ​ນາ​​ລ ທຣຳ ປະຕິບັດ​ການ​ເກັບ​ພາສີ​ສູງ​ຕໍ່​ສິນຄ້າ​ຂອງ​ເມັກ​ຊິກ. ປັດຈຸບັນ​ນີ້ ເມັກ​ຊິກ​ໄດ້​ໃຫ້​ສັນຍາ ຜັນ​ຂະຫຍາຍ​ການ​ປະຕິບັດ​ງານ​ຂອງ​ພົນທະຫານ 6.000 ຄົນ ຈາກ​ກອງ​ກຳລັງ​ທະຫານ​ປ້ອງ​ກັນ​ແຫ່ງ​ຊາດ ຢູ່​ໃນ​ເຂດ​ຊາຍ​ແດນ​ທີ່​ຕິດ​ກັບ​ປະເທດ ກົວ​ເຕ​ມາລາ.

ຂ່າວທີ່ກ່ຽວຂ້ອງ