ກຳປັ່ນ​ບັນທຸກ​ສິນຄ້າ​ສອງ​ລຳ​ທີ່​ຖືກ​ໂຈມ​ຕີ​ຢູ່​ໃນ​ອ່າວ​ໂອ​ມານ ໄດ້​ເຂົ້າ​ທຽບ​ທ່າ​ທີ່ UAE

120 19 ມິ.ຖ. 2019 ຂ່າວຕ່າງປະເທດ
ກຳປັ່ນ​ບັນທຸກ​ສິນຄ້າ​ສອງ​ລຳ​ທີ່​ຖືກ​ໂຈມ​ຕີ​ຢູ່​ໃນ​ອ່າວ​ໂອ​ມານ ໄດ້​ເຂົ້າ​ທຽບ​ທ່າ​ທີ່ UAE

    ກຳປັ່ນ​ບັນທຸກ​ນ້ຳມັນ​ສອງ​ລຳ ຄື​ກຳປັ່ນ Front Altair ຂອງ​ນອກ​ແວ ແລະ Kokuka Courageous ຂອງ​ຍີ່ປຸ່ນ ທີ່​ຖືກ​ໂຈມ​ຕີ​ຢູ່​ໃນ​ອ່າວ​ໂອ​ມານ ເມື່ອ​ວັນ​ທີ 13 ມິຖຸນາ ​ທີ່​ຜ່ານ​ມາ​ນັ້ນ ໄດ້​ເຂົ້າ​ທຽບ​ທ່າ​ກຳປັ່ນ ຂອງ​ສະຫະລັດ ອາ​ຣັບ ເອ​ມີ​ເຣດ ຢ່າງ​ປອດ​ໄພ ໃນ​ວັນ​ທີ 16 ມິຖຸນາ​ນີ້ ໂດຍ​ກຳປັ່ນ​ທັງ​ສອງ​ລຳ​ດັ່ງກ່າວ ຈະ​ໄດ້​ຮັບ​ການ​ຕີ​ລາຄາ​ເຖິງ​ລະດັບ​ຄວາມ​ເສຍ​ຫາຍ ກ່ອນ​ທີ່​ຈະ​ໄດ້​ຂົນ​ຂ່ຽນ​ສິນຄ້າ​ອອກ​ໄປ. ການ​ຕີ​ລາຄາ​ລະດັບ​ຄວາມ​ເສຍ​ຫາຍ​ນັ້ນ ຈະ​ໄດ້​ເລີ່ມ​ຂຶ້ນ ຫຼັງ​ຈາກ​ທີ່​ເຈົ້າ​ໜ້າທີ່​ໃນ ຊາ​ຈາ ຊຶ່ງ​ເປັນ​ໜຶ່ງ​ໃນ 7 ລັດ​ຂອງ UAE ເຮັດ​ສຳເລັດ​ວຽກ​ງານ​ກວດກາ​ດ້ານ​ຄວາມ​ສະຫງົບ.

     ໃນ​ເວລາ​ນີ້ ສ ອາ​ເມ​ຣິ​ກາ ແລະ​ອີ​ຣານ ຍັງ​ຄົງ​ຖິ້ມ​ໂທດ​ໃສ່​ກັນ ໃນ​ກໍລະນີ​ທີ່​ກຳປັ່ນ​ບັນທຸກ​ນ້ຳມັນ​ສອງ​ລຳ​ຖືກ​ໂຈມ​ຕີ​ຢູ່​ໃນ​ອ່າວ​ໂອ​ມານ ເຖິງ​ແມ່ນ​ວ່າ​ປະທານ​ບໍລິສັດ​ຂົນສົ່ງ Kokuka Sangyo ຂອງ​ຍີ່ປຸ່ນ ກ່າວ​ເມື່ອ​ວັນ​ທີ 14 ມິຖຸນາ​ທີ່​ຜ່ານ​ມາ​ວ່າ​ມີ “ອຸປະກອນ​ການບິນ” ໂຈມ​ຕີ​ກຳປັ່ນ​ບັນທຸກ​ນ້ຳມັນ Kokuka Courageous ຢູ່​ໃນ​ອ່າວ​ໂອ​ມານ ນັ້ນ​ກໍ​ຕາມ. ໃນ​ຂະນະ​ດຽວ​ກັນ ປະທານ​ບໍລິສັດ​ຂົນສົ່ງ Kokuka Sangyo ກໍ​ໄດ້​ປະຕິເສດ​ຕໍ່​ຄວາມ​ເປັນ​ໄປ​ໄດ້​ວ່າ ກຳປັ່ນ​ນັ້ນ​ຖືກ​ໂຈມ​ຕີ​ດ້ວຍ​ອາວຸດ​ໃຕ້​ນ້ຳ ທັງ​ນີ້​ກໍ​ເພາະວ່າ ຄວາມ​ເສຍ​ຫາຍ​ທີ່​ເກີດ​ຂຶ້ນ​ກັບ​ກຳປັ່ນ ແມ່ນ​ໃນ​ສ່ວນ​ທີ່ຢູ່​ເທິງ​ໜ້ານ້ຳ​ທະເລ ຊຶ່ງ​ຫາ​ກວ່າ​ເປັນ​ຍ້ອນ​ອາວຸດ​ໃຕ້​ນ້ຳ ແມ່ນ​ຄວາມ​ເສຍ​ຫາຍ​ຈະ​ເກີດ​ຢູ່​ໃນ​ສ່ວນ​ທີ່ຢູ່​ໃຕ້​ໜ້ານ້ຳ.

     ກຳປັ່ນ Kokuka Courageous ຖືກ​ໂຈມ​ຕີ​ໃນ​ຂະນະ​ທີ່​ພວມ​ຂົນສົ່ງ ເມ​ທານ​​ອລ (methanol) ຈຳນວນ 25.000 ໂຕນ ມຸ່ງ​ໜ້າ​ໄປ​ຍັງ​ທ່າ​ກຳປັ່ນ Khor Fakkan ຂອງ UAE ເມື່ອ​ວັນ​ທີ 13 ມິຖຸນາ​ທີ່​ຜ່ານ​ມາ. ກຳປັ່ນ​ບັນທຸກ​ນ້ຳມັນ​ອີກ​ລຳ​ໜຶ່ງ ໄດ້ແກ່​ກຳປັ່ນ Front Altair ຂອງ​ນອກ​ແວ ກໍ​ຖືກ​ໂຈມ​ຕີ​ຢູ່​ໃນ​ເຂດ​ດັ່ງກ່າວ​ໃນ​ວັນ​ດຽວ​ກັນ.

ຂ່າວທີ່ກ່ຽວຂ້ອງ