ອິນ​ເດຍ​ຂຶ້ນ​ພາສີ​ກັບ​ສິນຄ້າ​ຂອງ ສ ອາ​ເມ​ຣິ​ກາ

150 19 ມິ.ຖ. 2019 ຂ່າວຕ່າງປະເທດ
ອິນ​ເດຍ​ຂຶ້ນ​ພາສີ​ກັບ​ສິນຄ້າ​ຂອງ ສ ອາ​ເມ​ຣິ​ກາ

    ໜັງສືພິມ Economic Times ສະບັບ​ອອກ​ວັນ​ທີ 15 ມິຖຸນາ​ນີ້ ອ້າງ​ຕາມ​ຄຳ​ເວົ້າ​ຂອງ​ເຈົ້າ​ໜ້າທີ່​ອິນ​ເດຍ​ທ່ານ​ໜຶ່ງ ໃຫ້​ຮູ້​ວ່າ ຈະ​ບໍ່​ມີ​ເວລາ​ຊັກ​ຊ້າ​ໃດໆຕື່ມ​ອີກ ໃນ​ການ​ປະຕິບັດ​ການ​ເກັບ​ພາສີ​ເພື່ອ​ຕອບ​ໂຕ້​ຕໍ່ ສ ອາ​ເມ​ຣິ​ກາ ຊຶ່ງ​ຕາມ​ນັ້ນແລ້ວ ລະດັບ​ພາສີ​ໃໝ່ ຈະ​ເລີ່ມ​ມີ​ຜົນ​ບັງຄັບ​ໃຊ້ ນັບ​ແຕ່​ວັນ​ທີ 16 ມິຖຸນາ​ນີ້​ເປັນຕົ້ນ​ໄປ.

     ອິນ​ເດຍ ໄດ້​ຕົກລົງ​ຂຶ້ນ​ພາສີ​ກັບ​ສິນຄ້າ​ຈຳນວນ 29 ລາຍການ ທີ່​ນຳ​ເຂົ້າ​ຈາກ ສ ອາ​ເມ​ຣິ​ກາ ຫຼັງ​ຈາກ​ທີ່​ໄດ້​ໂຈະ​ມາ​ຫຼາຍ​ເທື່ອ ນັບ​ແຕ່​ໄດ້​ປະກາດ​ແຜນການ​ນີ້​ໄປ ເມື່ອ​ປີ​ທີ່​ຜ່ານ​ມາ. ໃນ​ຂະນະ​ດຽວ​ກັນ ສຳນັກ​ຂ່າວສານ Press Trust ໃຫ້​ຮູ້​ວ່າ ກະຊວງ​ການ​ເງິນ​ຂອງ​ອິນ​ເດຍ ຈະ​ມີ​ແຈ້ງ​ການ​ຢ່າງເປັນ​ທາງ​ການ​ອອກ​ມາ​ໂດຍ​ໄວ ເຖິງ​ວ່າ​ອິນ​ເດຍ​ໄດ້​ແຈ້ງ​ຂໍ້​ຕົກລົງ​ໄປ​ຍັງ ສ ອາ​ເມ​ຣິ​ກາ ແລ້ວ​ກໍ​ຕາມ.

     ການ​ດຳເນີນ​ການ​ດັ່ງກ່າວ ຖື​ວ່າ​ເພື່ອ​ເປັນ​ການ​ຕອບ​ໂຕ້​ຕໍ່​ການ​ທີ່ ສ ອາ​ເມ​ຣິ​ກາ ບໍ່​ຍົກເວັ້ນ​ອິນ​ເດຍ ອອກ​ໄປ​ຈາກ​ລະດັບ​ພາສີ​ທີ່​ສູງ​ກວ່າ ກັບ​ຜະລິດ​ຕະ​ພັນ​ເຫຼັກ​ກ້າ ແລະ ອາ​ລູ​ມີ​ນຽມ. ເຖິງ​ຢ່າງໃດ​ກໍ​ຕາມ ອິນ​ເດຍ​ໄດ້​ໂຈະ​ມາ​ຫຼາຍ​ເທື່ອ ສຳລັບ​ການ​ຂຶ້ນ​ພາສີ​ຕໍ່​ສິນ​ຄາ​ຂອງ ສ ອາ​ເມ​ຣິ​ກາ ເພາະວ່າ​ການ​ເຈລະຈາ​ລະຫວ່າງ​ສອງ​ປະເທດ ໄດ້​ເຮັດ​ໃຫ້​ມີ​ຄວາມ​ຫວັງ​ກ່ຽວ​ກັບ​ວິທີ​ການ​ແກ້​ໄຂ.

     ເຖິງ​ແນວ​ນັ້ນ​ກໍ​ຕາມ ການ​ຕົກລົງ​ຂອງ​ປະທານາທິບໍດີ ສ ອາ​ເມ​ຣິ​ກາ ໂດ​ນາ​​ລ ທຣຳ ໃນ​ການ​ຢຸດຕິ​ໂຄງການ​ສິດທິ​ພິເສດ​ດ້ານ​ການ​ຄ້າ​ຕໍ່​ອິນ​ເດຍ ໃນ​ຂອບ​ຂອງ​ໂຄງການ​ສິດທິ​ພິເສດ​ທົ່ວ​ໄປ (GSP) ນັບ​ແຕ່​ວັນ​ທີ 5 ມິຖຸນາ​ນີ້​ເປັນຕົ້ນ​ໄປ ເບິ່ງ​ຄື​ວ່າ​ເປັນ​ການ​ຈຸດ​ສະ​ນວນ ໃຫ້​ແກ່​ການ​ດຳເນີນ​ການ​ໃໝ່​ຫຼ້າ​ສຸດ​ຂອງ​ອິນ​ເດຍ.

     ລະບົບ GSP ຍົກເວັ້ນ​ພາສີ​ໃຫ້​ແກ່ “ຜະລິດ​ຕະ​ພັນ​ຈຳນວນ​ໜຶ່ງ​ທີ່​ແນ່ນອນ” ທີ່​ນຳ​ເຂົ້າ​ໄປ​ໃນ ສ ອາ​ເມ​ຣິ​ກາ ຖ້າ​ຫາ​ກວ່າ​ຕອບ​ສະໜອງ​ຕາມ​ມາດຖານ​ທີ່​ເໝາະ​ສົມ ໃນ​ນັ້ນ​ມີ​ການ “ອະນຸຍາດ​ໃຫ້  ສ ອາ​ເມ​ຣິ​ກາ ເຂົ້າ​ເຖິງ​ຕະຫຼາດ​ຢ່າງ​ຍຸຕິ​ທຳ ແລະ​ສົມ​ເຫດ​ສົມ​ຜົນ.”

     ຕົວ​ເລກ​ຂອງ​ສະພາ​ແຫ່ງ​ຊາດ ສ ອາ​ເມ​ຣິ​ກາ ໃຫ້​ຮູ້​ວ່າ ອິນ​ເດຍ​ເປັນ​ປະເທດ​ທີ່​ໄດ້​ຮັບ​ຜົນ​ປະ​ໂຫຍ​ຫຼາຍ​ສຸດ​ຈາກ​ໂຄງການ GPS ຂອງ ສ ອາ​ເມ​ຣິ​ກາ ຕະຫຼອດ​ເວລາ​ຫຼາຍ​ທົດ​ສະ​ວັດ ດ້ວຍ​ການ​ສົ່ງ​ອອກ​ສິນຄ້າ​ຍົກເວັ້ນ​ພາສີ​ເປັນ​ມູນ​ຄ່າ 5,7ຕື້ ໂດ​ລາ​ສະຫະລັດ ເຂົ້າ​ໄປ​ໃນ ສ ອາ​ເມ​ຣິ​ກາ ໃນ​ປີ 2017. ໃນ​ຂະນະ​ດຽວ​ກັນ ຕົວ​ເລກ​ຢ່າງ​ເປັນ​ທາງ​ການ ໃຫ້​ຮູ້​ວ່າ ມູນ​ຄ່າ​ການ​ແລກປ່ຽນ​ສິນຄ້າ ແລະ​ການ​ບໍລິການ ຂອງ ສ ອາ​ເມ​ຣິ​ກາ ກັບ​ອິນ​ເດຍ ໃນ​ປີ 2018 ຄາດ​ວ່າ​ບັນລຸ 142,1 ຕື້​ໂດ​ລາ​ສະຫະລັດ ໃນ​ຂະນະ​ທີ່​ຂາດ​ດຸນ​ການ​ຄ້າ​ຂອງ ສ ອາ​ເມ​ຣິ​ກາ ກັບ​ອິນ​ເດຍ ຢູ່​ທີ່ 24,3 ຕື້​ໂດ​ລາ​ສະຫະລັດ.

ຂ່າວທີ່ກ່ຽວຂ້ອງ