ຂ່າວຫຼ້າສຸດ

ແມ່ຍິງ​ຫຼາຍ​ແສນ​ຄົນ​ເຂົ້າ​ຮ່ວມ​ການ​ນັດ​ຢຸດ​ງານ​ຢູ່​ໃນ​ປະເທດ​ສະ​ວິດ

176 19 ມິ.ຖ. 2019 ຂ່າວຕ່າງປະເທດ
ແມ່ຍິງ​ຫຼາຍ​ແສນ​ຄົນ​ເຂົ້າ​ຮ່ວມ​ການ​ນັດ​ຢຸດ​ງານ​ຢູ່​ໃນ​ປະເທດ​ສະ​ວິດ

     ແມ່ຍິງ​ຫຼາຍ​ແສນ​ຄົນ ໄດ້​ເຂົ້າ​ຮ່ວມ​ການ​ນັດ​ຢຸດ​ງານ​ຄັ້ງ​ໃຫຍ່ ຢູ່​ໃນ​ທົ່ວ​ປະເທດ​ສະ​ວິດ ເມື່ອ​ວັນ​ທີ 14 ມິຖຸນາ​ນີ້ (ເປັນ​ໂອກາດ​ຄົບຮອບ 28 ປີ ຫຼັງ​ເກີດ​ການ​ນັດ​ຢຸດ​ງານ​ຄັ້ງ​ປະຫວັດສາດ ເມື່ອ​ປີ 1991)  ເພື່ອ​ສະແດງ​ຄວາມ​ສະໜັບສະໜູນ​ຕໍ່​ຄວາມ​ສະເໝີພາບ​ລະຫວ່າງ​ເພດ ແລະ​ເພື່ອ​ປົກ​ປ້ອງ​ສິດຜົນປະໂຫຍດ​ຂອງ​ແມ່ຍິງ.

     ຍັງ​ບໍ່​ທັນ​ມີ​ຕົວ​ເລກ​ສະຖິຕິ​ຢ່າງ​ເປັນ​ທາງ​ການ ກ່ຽວ​ກັບ​ປະລິມານ​ຜູ້​ເຂົ້າ​ຮ່ວມ​ການ​ນັດ​ຢຸດ​ງານ​ດັ່ງກ່າວ ຊຶ່ງ​ມີ​ຂຶ້ນ​ໃນ​ຂອບ​ເຂດ​ທົ່ວ​ປະເທດ ແຕ່​ວ່າ ຕາມ​ການ​ຄິດໄລ່ ຂອງ​ສະຫະພັນ​ແຮງ​ງານ​ສະ​ວິດ (USS) ແລ້ວ​ແມ່ນ​ມີ​ຜູ້​ເຂົ້າ​ຮ່ວມ 500.000 ກວ່າ​ຄົນ. ຄະນະ​ຈັດ​ຕັ້ງ​ການ​ນັດ​ຢຸດ​ງານ ຫວັງ​ວ່າ​ຈຳນວນ​ຜູ້​ເຂົ້າ​ຮ່ວມ​ການ​ນັດ​ຢຸດ​ງານ​ໃນ​ປີ​ນີ້ ຢ່າງ​ໜ້ອຍ​ຈະ​ເທົ່າ​ກັບ ຫຼື​ຫຼາຍ​ກວ່າ​ປະລິມານ​ຜູ້​ເຂົ້າ​ຮ່ວມ​ເຫດການ​ທີ່​ເປັນ​ປະຫວັດສາດ​ເມື່ອ​ປີ 1991.

     ຂ່າວ​ແຈ້ງວ່າ ສະມາຊິກ​ລັດ​ຖະ​ສະພາ ແລະ​ສະມາຊິກ​ໃນ​ຄະນະ​ລັດຖະບານ​ຂອງ​ສະ​ວິດ ທີ່​ເປັນ​ເພດ​ຍິງ ຫຼາຍ​ທ່ານ ເຊັ່ນ​ລັດຖະມົນຕີ​ກະຊວງ​ຍຸຕິ​ທຳ ຊີ​ໂມ​ເນັດ​ຕຣາ ຊອມ​ມາ​ຣູ​ກາ ກໍ​ໄດ້​ເຂົ້າ​ຮ່ວມ​ໃນ​ເຫດການ​ດັ່ງກ່າວ ເພື່ອ​ເປັນ​ການ​ຊຸກຍູ້​ຄວາມ​ສະເໝີພາບ​ລະຫວ່າງ​ເພດ.

     ເມື່ອ​ເບິງ​ລວມ​ແລ້ວ ຜູ້​ເຂົ້າ​ຮ່ວມ​ການ​ນັດ​ຢຸດ​ງານ ທີ່​ເດີນ​ຂະ​ບວນ ມີ​ຂຶ້ນ​ໃນ​ບັນ​ຍາ​ການ​ຂອງ​ວັນ​ບຸນ ໂດຍ​ຜູ້​ທີ່​ເຂົ້າ​ຮ່ວມ​ໄດ້​ພາກັນ​ສວມ​ເສື້ອ​ສີມ່ວງ ຊຶ່ງ​ເປັນ​ສີສັນ​ຍາ​ລັກ​ຂອງ​ຂະ​ບວນ​ການ​ຕໍ່ສູ້​ເພື່ອ​ສິດທິ​ຂອງ​ແມ່ຍິງ. ໃນ​ຂະນະ​ດຽວ​ກັນ ເພດ​ຊາຍ​ຈຳນວນ​ຫຼາຍ​ກໍ​ເຂົ້າ​ຮ່ວມ​ໃນ​ການເຄື່ອນໄຫວ​ດັ່ງກ່າວ ເພື່ອ​ສະແດງ​ອອກ​ເຖິງ​ຄວາມ​ສາມັກຄີ​ກັບ​ເພດ​ຍິງ.

ຂ່າວທີ່ກ່ຽວຂ້ອງ