ເບີ່ງບ້ານເຂົາເອົາບົດຮຽນ 18-06-2019

772 19 ມິ.ຖ. 2019 ຫົວຂໍ້ຂ່າວອື່ນໆ

      ມື້ນີ້ ຂໍ​ສະເໜີ​ເລື່ອງ​ອົດ​ສະ​ຕຣາ​ລີ ບໍ່​ຕ້ອນຮັບ​ນັກ​ທ່ອງ​ທ່ຽວ​ທີ່​ມີ​ຄະດີ​ໃຊ້​ຄວາມ​ຮຸນ​ແຮງ​ໃນ​ຄອບຄົວ ຕໍ່​ໃສ່​ບັນຫາ​ຄຸກ​ໃນ​ໂຮນ​ລັງ​ຂາດ​ນັກໂທດ ສຸດ​ທ້າຍ​ແມ່ນ​ເລື່ອງ ​ສປ ຈີນ ຍົກ​ສູງ​ຄຸນ​ນະ​ພາບ​ການ​ຄຸ້ມ​ຄອງ​ຊັບ​ສິນ​ທາງ​ປັນຍາ.

     ທີ່​ອົດ​ສະ​ຕຣາ​ລີ: ໃນ​ປັດຈຸບັນ ພື້ນ​ທີ່​ສຳລັບ​ການເຄື່ອນໄຫວ​ຂອງ​ບຸກຄົນ​ທີ່​ມີ​ປະຫວັດ​ໃຊ້​ຄວາມ​ຮຸນ​ແຮງ ໃນ​ຄອບຄົວ​ໄດ້​ຖືກ​ຮັດ​ແຄບ​ເຂົ້າ​ຕື່ມ ເມື່ອ​ທາງ​ການ​ອົດ​ສະ​ຕຣາ​ລີ ໄດ້​ອອກ​ແຈ້ງ​ການ​ຫ້າມ​ນັກ​ທ່ອງ​ທ່ຽວ​ຕ່າງ ປະເທດ​ທີ່​ມີ​ຄະດີ​ໃຊ້​ຄວາມ​ຮຸນ​ແຮງ​ໃນ​ຄອບຄົວ​ເຂົ້າ​ໄປ​ໃນ​ປະເທດ​ອົດ​ສະ​ຕຣາ​ລີ ແຈ້ງ​ການ​ທີ່​ວ່າ​ນີ້ ທ່ານ   ເດວິກ ໂຄ ເລ​ມານ ລັດຖະມົນຕີ​ກະຊວງ​ເຄື່ອນ​ຍ້າຍ​ທີ່​ພັກ​ອາໄສ​ເປັນ​ຜູ້​ປະກາດ​ອອກ​ມາ ໃນ​ຕົ້ນ​ເດືອນ​ມີນາ ປີ​ນີ້ ແຈ້ງ​ການ​ບອກ​ວ່າ: ອົດ​ສະ​ຕຣາ​ລີ ບໍ່​ປ່ອຍ​ໃຫ້​ຜູ້​ມີ​ພຶດຕິ​ກຳ​ໃຊ້​ຄວາມ​ຮຸນ​ແຮງ​ໃນ​ຄອບຄົວ​ລອຍ​ນວນ ແລະ ຈະ​ບໍ່​ຕ້ອນຮັບ​ຄົນ​ປະເພດ​ນີ້​ເຂົ້າ​ອົດ​ສະ​ຕຣາ​ລີ​ເດັດຂາດ ມາດ​ຕະການ​ເກືອດ​ຫ້າມ​ດັ່ງກ່າວ​ນີ້ ສ້າງ​ຂຶ້ນ​ບົນ​ພື້ນຖານ​ກົດໝາຍ​ທີ່​ໃຊ້​ຢູ່​ໃນ​ປັດຈຸບັນ ທີ່​ອະນຸຍາດ​ໃຫ້​ຍົກເລີກ​ວີ​ຊາ​ຂອງ​ນັກ​ທ່ອງ​ທ່ຽວ​ຕ່າງປະເທດ ທີ່​ຖືກ​ຕັດສິນ​ຈຳ​ຄຸກ ແຕ່ 12 ເດືອນ​ຂຶ້ນ​ໄປ ໃນ​ຄະດີ​ໃຊ້​ຄວາມ​ຮຸນ​ແຮງ​ຕໍ່​ແມ່ຍິງ ແລະ ເດັກນ້ອຍ​ໃນ​ຄອບຄົວ ຂໍ້​ກຳນົດ​ເກືອດ​ຫ້າມ​ດັ່ງກ່າວ ມີ​ຜົນ​ບັງຄັບ​ໃຊ້​ນັບ​ແຕ່​ວັນ​ທີ 28 ເດືອນ​ກຸມພາ​ປີ​ນີ້​ເປັນຕົ້ນ​ມາ ໃນ​ໄລຍະ​ຜ່ານ​ມາ ທາງ​ການ​ອົດ​ສະ​ຕຣາ​ລີ ໄດ້​ປະຕິເສດ​ວີ​ຊາ​ຂອງ​ນັກ​ຮ້ອງ ແລະ ນັກ​ມວຍ​ຊື່​ດັງ​ຂອງ​ສະຫະລັດ​ມາ​ແລ້ວ ເນື່ອງ​ຈາກ​ທັງ​ສອງ​ມີ​ຄະດີ​ໃຊ້​ຄວາມ​ຮຸນ​ແຮງ​ໃນ​ຄອບຄົວ.

     ທີ່​ໂຮນ​ລັງ (ເນ​ເທີ​ແລນ) ໃນ​ຂະນະ​ທີ່ຢູ່​ຫຼາຍ​ປະເທດ​ເກີດ​ມີ​ສະພາບ​ແອ​ອັດ​ພາຍ​ໃນ​ຄຸກ ຍ້ອນ​ການ​ເພີ່ມ ຂຶ້ນ​ຂອງ​ນັກໂທດ ແຕ່​ຢູ່​ໂຮນ​ລັງ​ຜັດ​ກົງກັນຂ້າມ ຄື​ເກີດ​ສະພາບ​ຂາດແຄນ​ນັກໂທດ ຈົນ​ຕ້ອງ​ໄດ້​ປິດ​ຄຸກ​ເປັນ​ຈຳນວນ​ຫຼວງຫຼາຍ ສຳລັບ​ຄຸກ​ທີ່​ຍັງ​ດຳເນີນ​ການ​ຢູ່​ກໍ​ຕ້ອງ​ໄດ້​ຂໍ​ເອົາ​ນັກໂທດ​ຈາກ​ປະເທດ​ນອກ​ແວ ມາ​ຂັງ ເພື່ອ​ໃຫ້​ພະນັກງານ​ທີ່​ເຮັດ​ຢູ່​ລະບົບ​ຄຸກ​ມີ​ວຽກ​ເຮັດ ເຫດ​ທີ່​ປະເທດ​ໂຮນ​ລັງ​ຂາດ​ນັກໂທດ​ຕິດ​ຄຸກ ກໍ​ຍ້ອນ​ວ່າ ປະເທດ​ນີ້​ມີ​ວິທີ​ການ​ທີ່​ດີ ເພື່ອ​ປ້ອງ​ກັນ​ບໍ່​ໃຫ້​ຄົນ​ເຮັດ​ຜິດ ພ້ອມໆ​ກັບ​ມີ​ນະໂຍບາຍ ຂ້າ​ພະຍາດ​ເອົາ​ຄົນ ຫຼາຍ​ຮູບ​ແບບ​ທີ່​ຖືກ​ຈຸດ ເຮັດ​ໃຫ້​ຈຳນວນ​ນັກໂທດ​ຂັ້ນ​ຖືກ​ຕັດ​ອິດສະຫຼະພາບ ຫຼຸດ​ລົງ​ເຖິງ 43%      (ເວັບ​ໄຊ BBC   

10/11/2016) ຕົວຢ່າງ: ນັກໂທດ​ທີ່​ມີ​ຄວາມ​ຜິດ​ຍ້ອນ​ເສບ​ຢາ​ເສບ​ຕິດ ທາງ​ການ​ກໍ​ຈະ​ສົ່ງ​ໄປ​ຮັບ​ການ​ບຳບັດ ຢູ່​ສູນ​ສະເພາະ ນັກໂທດ​ທີ່​ກໍ່​ອາ​ຊະ​ຍາ​ກຳ​ຍ້ອນ​ມີ​ໜີ້​ສິນ​ຄຸມ​ເຄືອ ກໍ​ຖືກ​ສົ່ງ​ໄປ​ຮັບ​ການ​ປຶກສາ​ກັບ​ຊ່ຽວຊານ ກ່ຽວ​ກັບ​ວິທີ​ຈັດການ​ກັບ​ໜີ້​ສິນ ນັກໂທດ​ທີ່​ມີ​ບັນຫາ​ທາງ​ອາລົມ ກໍ​ຈະ​ຖືກ​ສົ່ງ​ເຂົ້າ​ສູນ​ບຳບັດ​ທາງ​ອາລົມ ກັບ​ຊ່ຽວຊານ​ດ້ານ​ຈິດ​ຕະ​ແພດ ນອກຈາກ​ນັ້ນ ນັກໂທດ​ຍັງ​ມີ​ໂອກາດ​ໄດ້​ຮັບ​ການ​ເຝິກ​ອາຊີບ ເຊັ່ນ​ການ​ຄົວກິນ ເປັນຕົ້ນ ນັກໂທດ​ທີ່​ເຮັດ​ຜິດ​ໃນ​ຄະດີ​ເກົ່າ ຈະ​ຖືກ​ຈຳ​ຄຸກ​ຕື່ມ 2 ປີ ຈາກ​ນັ້ນ ຈະ​ຖືກ​ສົ່ງ​ເຂົ້າ​ສູນ​ເຝິກອົບຮົມ​ວິຊາ​ຊີບ ດ້ວຍ​ວິທີ​ນີ້ ຈຳນວນ​ນັກໂທດ​ທີ່​ເຮັດ​ຜິດ​ໃນ​ຄະດີ​ເກົ່າ ຈຶ່ງ​ຫຼຸດ​ລົງ​ໜ້ອຍ​ກວ່າ 10% ຂ່າວ​ບອກ​ວ່າ: ບັນດາ​ຄຸກ​ທີ່​ຖືກ​ປິດ​ລົງ​ນັ້ນ ໄດ້​ປ່ຽນ​ຄາບ​ມາ​ເປັນ​ໂຮງແຮມ ແລະ ໂຮງໝໍ ສ່ວນ​ທີ່​ຍັງ​ດຳເນີນ​ງານ​ຢູ່​ກໍ​ຕ້ອງ​ໄດ້​ນຳ​ເຂົ້າ​ນັກໂທດ​ຈາກ​ປະເທດ​ນອກ​ແວ ເຊິ່ງ​ມີ​ຈຳນວນ 234 ຄົນ.

     ທີ່ ​ສປ ຈີນ: ມີ​ຂ່າວ​ວ່າ ໃນ 5 ປີ​ຕໍ່ໜ້າ ທາງ​ການ​ຈີນ​ມີ​ແຜນການ​ປັບປຸງ ເພື່ອ​ຍົກ​ສູງ​ຄຸນ​ນະ​ພາບ ແລະ ປະສິດທິພາບ​ໃນ​ການ​ຄຸ້ມ​ຄອງ​ກວດກາ​ຊັບ​ສິນ​ທາງ​ປັນຍາ​ດ້ວຍ​ມາດ​ຕະການ​ຕົວ​ຈິງ ຄື: ຈະ​ຫຍໍ້​ເວລາ​ກວດ ກາ​ເຄື່ອງໝາຍ​ການ​ຄ້າ​ໃຫ້​ຖີ່​ເຂົ້າ ຈາກ 8 ເດືອນ ໃນ​ເມື່ອ​ກ່ອນ​ມາ​ເປັນ 4 ເດືອນ ສ່ວນ​ໄລຍະ​ກວດກາ​ລິ​ຂະ ສິດ​ທີ່​ມີ​ມູນ​ຄ່າ​ສູງ​ກໍ​ຈະ​ໃຫ້​ຫຼຸດ​ລົງ​ເຄິ່ງ​ໜຶ່ງ ເລີ່ມ​ແຕ່​ປີ 2018 ເປັນຕົ້ນ​ມາ ທາງ​ການ​ຈີນ​ໄດ້​ເພີ່ມ​ທະວີ​ການ​ສ້າງ​ພະນັກງານ ນັກ​ກວດກາ​ຊັບ​ສິນ​ທາງ​ປັນຍາ ນຳ​ໃຊ້​ລະບົບ​ກວດກາ​ແບບ​ອັດ​ສະ​ລິ​ຍະ ຫຼຸດ​ຂັ້ນ​ຕອນ​ທີ່​ບໍ່​ຈຳເປັນ​ໃນ​ການ​ກວດກາ ແລະ ອື່ນໆ.

ຂ່າວທີ່ກ່ຽວຂ້ອງ