ກຽມມອບລາງວັນໃຫ້ຄູດີເດັ່ນຂອງລາວໃນທ້າຍປີນີ້

1.295 18 ມິ.ຖ. 2019 ຂ່າວໜ້າ​ໜຶ່ງ

    ວັນ​ທີ 13 ມິ­ຖຸ­ນາ 2019 ມູນ​ນິ­ທິ​ລາ­ງວັນ​ສົມ­ເດັດ ເຈົ້າ­ຟ້າ​ມະ­ຫາ​ຈັກ​ກຣີ ແຫ່ງ ລາ­ຊະ​ອາ­ນາ­ຈັກ​ໄທ ໄດ້​ຢ້ຽມ­ຢາມ​ລາວ​ເພື່ອ​ພົບ​ປະ​ແລກ ປ່ຽນ​ບົດ­ຮຽນ​ປະ­ສົບ​ການ​ເຊິ່ງ​ກັນ ແລະ ກັນ​ກັບ​ຜູ້​ທີ່​ໄດ້​ຮັບ​ລາ­ງວັນ​ນີ້ ຢູ່​ທີ່​ສະ­ຖານ­ທູດ​ໄທ ປະ­ຈຳ​ລາວ ແລະ ການ​ຢ້ຽມ­ຢາມ​ພົບ​ປະ​ຄູ-ອາ­ຈານ​ໂຮງ­ຮຽນ​ສັນ­ຕິ­ພາບ​ແຂວງ​ຫຼວງ​ພະ​ບາງ ໃຫ້​ຂໍ້​ມູນ​ແກ່​ກະ­ຊວງ​ສຶກ​ສາ​ທິ​ການ ແລະ ກີ­ລາ​ພ້ອມ​ທັງ​ກຽມ​ພິ­ທີ​ມອບ​ລາ­ງວັນ​ໃຫ້​ຄູ​ດີ­ເດັ່ນ​ຂອງ​ລາວ ເຊິ່ງ​ລາ­ງວັນ​ສົມ­ເດັດ​ເຈົ້າ­ຟ້າ​ມະ­ຫາ­ລາ­ຊາ​ທີ​ສາມ​ຈະ​ຈັດ​ຂຶ້ນ​ວັນ​ທີ 15-18 ຕຸ­ລາ​ນີ້ ຢູ່​ແຂວງ​ຫຼວງ​ພະ​ບາງ ພ້ອມ​ຈະ​ມີ​ກິດ­ຈະ­ກຳ​ອື່ນໆ​ອີກ​ດ້ວຍ.

    ທ່ານ​ນາງ ເບັນ​ຈະ​ລັກ ນາມ​ຟ້າ ຄະ­ນະ​ມູນ​ນິ­ທິ​ລາ­ງວັນ​ສົມ­ເດັດ​ເຈົ້າ­ຟ້າ​ມະ­ຫາ​ຈັກ​ກຣີ ໄດ້​ກ່າວ​ວ່າ: ມູນ​ນິ­ທິ​ນີ້​ແມ່ນ​ຜູ້​ສ້າງ​ການ​ປ່ຽນ­ແປງ​ຊີ­ວິດ​ແກ່​ນັກ­ຮຽນ ແລະ ເປັນ​ລາ­ງວັນ​ພະ​ຣາ​ຊະ​ທານ​ລະ­ດັບ​ນາ­ນາ​ຊາດ ເພື່ອ​ເຊີດ​ຊູ​ກຽດ​ສັກ​ສີ​ຂອງ​ຄູ​ດີ­ເດັ່ນ​ໃນ​ລະ­ດັບ​ການ​ສຶກ​ສາ​ຂັ້ນ​ພື້ນ­ຖານ​ຂອງ​ປະ­ເທດ​ໃນ​ອາ​ຊຽນ ແລະ ຕີ​ມໍ​ເລ​ສ​ເຕ 11 ປະ­ເທດ ທັງ​ເປັນ​ການ​ເຊີດ​ຊູ​ອົງ​ພະ​ກຽດ​ສົມ­ເດັດ​ພະ​ກະ​ນິ​ຖາ​ທິ​ຣາດ​ເຈົ້າ ກົມ​ສົມ­ເດັດ​ພະ​ເທບ​ລັດ­ຕະ­ນະ​ຣາ​ຊະ​ສຸ­ດາ ສະ­ຫຍາມ​ບໍ​ຣົມ​ຣາ​ຊະ​ກຸ​ມາ​ຣີ ຜູ້​ທີ່​ມີ​ຄວາມ​ສາ­ມາດ ແລະ ມີ​ຜົນ­ງານ​ຢ່າງ​ຫຼວງ­ຫຼາຍ​ຕໍ່​ການ​ສຶກ​ສາ ທັງ​ພາຍ​ໃນ ແລະ ຕ່າງ­ປະ­ເທດ ໂດຍ​ມູນ​ນິ­ທິ​ລາ­ງວັນ​ສົມ­ເດັດ​ເຈົ້າ­ຟ້າ​ມະ­ຫາ​ຈັກ​ກຣີ ຮ່ວມ​ກັບ​ສຳ­ນັກ­ງານ​ເລ­ຂາ­ທິ­ການ​ຄຸ​ຣຸ​ສະ­ພາ​ກະ­ຊວງ​ສຶກ​ສາ​ທິ​ການ ກະ­ຊວງ​ການ​ຕ່າງ­ປະ­ເທດ ແລະ ໜ່ວຍ​ງານ​ຕ່າງໆ​ຂອງ​ຣາ​ຊະ​ອາ­ນາ­ຈັກ​ໄທ ໂດຍ​ກຳ­ນົດ​ໃຫ້​ມີ​ການ​ພະ​ຣາ​ຊະ​ທານ​ລາ­ງວັນ​ຄັ້ງ​ທຳ​ອິດ ໃນ​ວັນ​ທີ 2 ຕຸ­ລາ 2015 ແລະ ຈັດ​ຂຶ້ນ 2 ປີ​ຕໍ່​ຄັ້ງ ສຳ­ລັບ​ຄູ​ທີ່​ໄດ້​ຮັບ​ລາ­ງວັນ ຕ້ອງ​ໄດ້​ຮັບ​ການ​ຄັດ​ເລືອກ​ຈາກ​ກະ­ຊວງ​ສຶກ​ສາ​ທິ​ການ​ຂອງ​ແຕ່​ລະ​ປະ­ເທດ​ໃນ​ອາ​ຊຽນ ແລະ ຕີ​ມໍ​ເລ​ສ​ເຕ 11 ປະ­ເທດ ໂດຍ​ມີ​ຄຸນ­ສົມ­ບັດ​ເປັນ​ຄູ​ຜູ້​ທີ່​ສ້າງ​ການ​ປ່ຽນ­ແປງ​ແກ່​ຊີ­ວິດ​ຂອງ​ນັກ­ຮຽນ.

    ສ່ວນ​ປີ 2019 ຄູ-ອາ­ຈານ​ລາວ​ດີ­ເດັ່ນ ທີ່​ຈະ​ໄດ້​ຮັບ​ລາ­ງວັນ​ນີ້​ແມ່ນ​ອາ­ຈານ ໄພ​ສະ​ນິດ ປັນ­ຍາ­ສະ​ຫວັດ ຫົວ­ໜ້າ​ສາ­ຂາ​ວິ­ຊາ​ການ​ພາ­ສາ​ລາວ ແລະ ວັນ­ນະ­ຄະ­ດີ ທັງ​ເປັນ​ຮອງ​ຫົວ­ໜ້າ​ຝ່າຍ​ວິ­ຊາ​ການ ໂຮງ­ຮຽນ​ມັດ­ທະ­ຍົມ​ສຶກ​ສາ​ສັນ­ຕິ­ພາບ​ນະ­ຄອນ­ຫຼວງ​ພະ​ບາງ ແຂວງ​ຫຼວງ​ພະ​ບາງ ໃນ​ໄລ­ຍະ​ຜ່ານ​ມາ​ຄູ-ອາ­ຈານ​ດີ­ເດັ່ນ​ຂອງ​ລາວ​ໄດ້​ຮັບ​ລາ­ງວັນ​ນີ້ 2 ຄົນ​ຄື: ປີ 2015 ອາ­ຈານ​ນາງ ຄຳ​ສ້ອຍ ວົງ​ສຳ­ພັນ ອຳ­ນວຍ​ການ​ໂຮງ­ຮຽນ​ມັດ­ທະ­ຍົມ​ສົມ­ບູນ​ວຽງ​ຈັນ ແລະ ປີ 2017 ອາ­ຈານ​ນາງ ຄຸນ​ວິ­ໄລ ເຄນ​ກິ​ຕິ​ສັກ ອຳ­ນວຍ​ການ​ໂຮງ­ຮຽນ​ມັດ­ທະ­ຍົມ​ສົມ­ບູນ​ທົ່ງ​ກາງ ເມືອງ​ສີ​ສັດ­ຕະ​ນາກ ນະ­ຄອນ­ຫຼວງ​ວຽງ​ຈັນ.

ຂ່າວທີ່ກ່ຽວຂ້ອງ