ຮັບຮອງຮ່າງກົດໝາຍການຕອບໂຕ້ການທຸ້ມຕະຫຼາດ ແລະ ການຊ່ວຍໜູນຂອງປະເທດຜູ້ສົ່ງອອກ

1.002 17 ມິ.ຖ. 2019 ຂ່າວໜ້າ​ໜຶ່ງ
ຮັບຮອງຮ່າງກົດໝາຍການຕອບໂຕ້ການທຸ້ມຕະຫຼາດ ແລະ ການຊ່ວຍໜູນຂອງປະເທດຜູ້ສົ່ງອອກ

    ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 7 ຂອງ​ສະ­ພາ​ແຫ່ງ​ຊາດ ຊຸດ​ທີ VIII ວັນ​ທີ 14 ມິ­ຖຸ­ນາ 2019 ທີ່​ສະ­ພາ​ແຫ່ງ​ຊາດ (ຫຼັກ 6) ໄດ້​ສະ­ເໜີ​ຮ່າງ​ກົດ­ໝາຍ​ວ່າ​ດ້ວຍ​ການ​ຕອບ​ໂຕ້​ການ​ທຸ້ມ​ຕະ­ຫຼາດ ແລະ ການ​ຊ່ວຍ​ໜູນ​ຂອງ​ປະ­ເທດ​ຜູ້​ສົ່ງ​ອອກ (ສ້າງ​ໃໝ່) ໂດຍ​ເປັນ​ປະ­ທານ​ຂອງ​ທ່ານ ສົມ​ພັນ ແພງ​ຄຳ​ມີ ຮອງ​ປະ­ທານ​ສະ­ພາ​ແຫ່ງ​ຊາດ ມີ​ອະ­ນຸ​ກຳ­ມະ­ການ​ສ້າງ​ຮ່າງ​ກົດ­ໝາຍ ແລະ ສະ­ມາ­ຊິກ​ສະ­ພາ​ແຫ່ງ​ຊາດ​ເຂົ້າ​ຮ່ວມ.

    ທ່ານ​ນາງ ເຂັມ​ມະ­ນີ ພົນ​ເສ­ນາ ລັດ­ຖະ­ມົນ­ຕີ​ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ໄດ້​ສະ­ເໜີ​ເຫດ­ຜົນ ແລະ ຄວາມ​ຈຳ­ເປັນ​ຂອງ​ການ​ສ້າງ​ຮ່າງ​ກົດ­ໝາຍ​ວ່າ​ດ້ວຍ​ການ​ຕອບ​ໂຕ້​ການ​ທຸ້ມ​ຕະ­ຫຼາດ ແລະ ການ​ຊ່ວຍ​ໜູນ​ຂອງ​ປະ­ເທດ​ຜູ້​ສົ່ງ​ອອກ (ສ້າງ​ໃໝ່) ວ່າ: ການ​ສ້າງ​ກົດ­ໝາຍ​ດັ່ງ­ກ່າວ​ແມ່ນ​ມີ​ຄວາມ​ຈຳ­ເປັນ ເນື່ອງ​ຈາ​ກວ່າ ສປປ ລາວ ຕ້ອງ​ປະ­ຕິ­ບັດ​ຕາມ​ພັນ­ທະ​ສັນ­ຍາ​ຂອງ​ອົງ­ການ​ການ​ຄ້າ​ໂລກ​ທີ່​ໄດ້​ກຳ­ນົດ​ວ່າ: ລັດ​ຖະ ບານ​ລາວ​ຕ້ອງ​ສ້າງ​ກົດ­ໝາຍ​ວ່າ​ດ້ວຍ​ການ​ຕອບ​ໂຕ້​ການ​ທຸ້ມ​ຕະ­ຫຼາດ ແລະ ການ​ຊ່ວຍ​ໜູນ​ຂອງ​ປະ­ເທດ​ຜູ້​ສົ່ງ​ອອກ ເຊິ່ງ​ມີ​ຄວາມ​ແຕກ​ຕ່າງ​ຈາກ​ກົດ­ໝາຍ​ວ່າ​ດ້ວຍ​ການ​ປົກ​ປ້ອງ​ຜູ້​ຜະ­ລິດ​ທີ່​ໄດ້​ຮັບ​ຜົນ​ກະ­ທົບ​ຈາກ​ການ​ນຳ​ເຂົ້າ​ສິນ­ຄ້າ ບ່ອນ​ວ່າ​ກົດ­ໝາຍ​ສະ­ບັບ​ນີ້​ຈະ​ນຳ​ໃຊ້​ກໍ­ລະ­ນີ​ການ​ນຳ​ເຂົ້າ​ສິນ­ຄ້າ​ທີ່​ເພີ່ມ​ຂຶ້ນ​ຢ່າງ​ຫຼວງ­ຫຼາຍ ຍ້ອນ​ຜົນ​ການ​ເປີດ​ເສລີ​ທາງ​ການ​ຄ້າ ແລະ ໄດ້​ສ້າງ​ຄວາມ​ເສຍ​ຫາຍ​ໃຫ້​ແກ່​ຜູ້​ຜະ­ລິດ​ສິນ­ຄ້າ​ພາຍ​ໃນ ເຊິ່ງ​ຖື​ວ່າ​ເປັນ​ທຳ ໃນ​ຄວາມ​ໝາຍ​ຂອງ​ສັນ­ຍາ​ອົງ­ການ​ການ​ຄ້າ​ໂລກ ເນື່ອງ​ຈາກ​ເປັນ​ເຫດ­ການ​ທີ່​ເກີດ​ຂຶ້ນ​ຈາກ​ກົນ​ໄກ​ທຳ​ມະ​ຊາດ​ຂອງ​ການ​ເປີດ​ເສລີ ໂດຍ​ມີ​ມາດ​ຕະ­ການ​ທີ່​ນຳ​ໃຊ້ 2 ຮູບ​ແບບ​ຄື: ການ​ເພີ່ມ​ອັດ­ຕາ​ພາ­ສີ​ນຳ​ເຂົ້າ​ສິນ­ຄ້າ ຫຼື ກຳ­ນົດ​ປະ­ລິ­ມານ​ນຳ​ເຂົ້າ (ໂກ​ຕ້າ).

    ພາຍ­ຫຼັງ​ໄດ້​ຮັບ​ຟັງ​ການ​ສະ­ເໜີ​ຮ່າງ​ກົດ­ໝາຍ​ສະ­ບັບ​ດັ່ງ­ກ່າວ ປະ­ທານ​ກອງ​ປະ­ຊຸມ​ກໍ​ໄດ້​ມີ​ຄຳ​ເຫັນ​ຄຳ​ຖາມ​ເຈາະ​ຈິ້ມ ເພື່ອ​ເປັນ​ບ່ອນ​ອີງ​ໃຫ້​ແກ່​ສະ­ມາ­ຊິກ​ສະ­ພາ​ແຫ່ງ​ຊາດ​ປະ­ກອບ​ຄຳ​ຄິດ​ຄຳ​ເຫັນ ຈາກ​ນັ້ນ ບັນ­ດາ​ສະ­ມາ­ຊິກ​ສະ­ພາ​ແຫ່ງ​ຊາດ​ໄດ້​ຜັດ­ປ່ຽນ​ກັນ​ຂຶ້ນ​ປະ­ກອບ​ຄຳ​ຄິດ​ເຫັນ​ຢ່າງ​ກົງ​ໄປ​ກົງ​ມາ ໃນ​ນີ້ ບັນ­ດາ ສສຊ ໃຫ້​ຄຳ​ເຫັນ​ສ່ວນ​ຫຼາຍ​ແມ່ນ​ຊື່ ແລະ ນິ​ຍາມ​ຂອງ​ກົດ­ໝາຍ ການ​ອະ­ທິ­ບາຍ​ຄຳ​ສັບ​ເຫັນ​ວ່າ​ຍັງ​ມີ​ຄວາມ​ສັບ­ສົນ ພ້ອມ​ທັງ​ໃຫ້​ເບິ່ງ​ຄືນ​ມາດ­ຕາ 12 ການ​ຊ່ວຍ​ໜູນ​ຂອງ​ປະ­ເທດ​ຜູ້​ສົ່ງ​ອອກ ໃນ​ນີ້ ໃຫ້​ໃສ່​ຮູບ​ແບບ​ວິ­ທີ​ການ​ຊ່ວຍ­ເຫຼືອ​ດ້ານ​ການ​ເງິນ ເນື່ອງ​ຈາ​ກວ່າ​ເນື້ອ​ໃນ​ຈະ​ຊ້ຳ​ກັນ​ກັບ​ມາດ­ຕາ​ທີ 15  ໃຫ້​ເອົາ​ມາດ­ຕາ 19 ອອກ ຍ້ອນ​ເນື້ອ​ໃນ​ມາດ­ຕາ​ດັ່ງ­ກ່າວ​ໄດ້​ກຳ­ນົດ​ລະ­ອຽດ​ໃນ​ມາດ­ຕາ 18 ການ​ກຳ­ນົດ​ຄວາມ​ເສຍ​ຫາຍ​ຢ່າງ​ຫຼວງ­ຫຼາຍ.

    ຜ່ານ​ການ​ປະ­ກອບ​ຄຳ​ເຫັນ​ຂອງ ສສຊ ໄດ້​ເປັນ​ເອ­ກະ​ພາບ​ກັນ​ລົງ​ຄະ­ແນນ​ສຽງ​ຮັບ­ຮອງ​ເອົາ​ຮ່າງ​ກົດ­ໝາຍ​ວ່າ​ດ້ວຍ​ການ​ຕອບ​ໂຕ້ ການ​ທຸ້ມ​ຕະ­ຫຼາດ ແລະ ການ​ຊ່ວຍ​ໜູນ​ຂອງ​ປະ­ເທດ​ຜູ້​ສົ່ງ​ອອກ​ດ້ວຍ​ຄະ­ແນນ​ສຽງ​ສ່ວນ​ຫຼາຍ.

ຂ່າວທີ່ກ່ຽວຂ້ອງ