ກວ່າ 1/5 ຂອງ​ຈຳນວນ​ຜູ້​ດຳລົງ​ຊີວິດ​ຢູ່​ໃນ​ເຂດ​ເກີດ​ການ​ພິພາດ ເປັນ​ພະຍາດ​ທາງ​ຈິດ

482 17 ມິ.ຖ. 2019 ຂ່າວຕ່າງປະເທດ
ກວ່າ 1/5 ຂອງ​ຈຳນວນ​ຜູ້​ດຳລົງ​ຊີວິດ​ຢູ່​ໃນ​ເຂດ​ເກີດ​ການ​ພິພາດ ເປັນ​ພະຍາດ​ທາງ​ຈິດ

    ບົດ​ລາຍ​ງານ​ສະບັບ​ໜຶ່ງ ຊຶ່ງ​ແມ່ນ​ສະຫະ​ປະຊາ​ຊາດ​ໃຫ້ການ​ຊ່ວຍເຫຼືອ ແລະ​ນຳ​ອອກ​ມາ​ເປີດເຜີຍ​ເມື່ອ​ບໍ່​ດົນ​ມາ​ນີ້ ໃຫ້​ຮູ້​ວ່າ ມີ​ກວ່າ 1/5 ຂອງ​ຈຳນວນ​ຜູ້​ທີ່​ດຳລົງ​ຊີວິດ​ຢູ່​ໃນ​ເຂດ​ເກີດ​ການ​ພິພາດ​ແຫ່ງ​ຕ່າງໆ ແມ່ນ​ເກີດ​ເປັນ​ພະຍາດ​ທາງ​ຈິດ. ເມື່ອ​ເປັນ​ດັ່ງນັ້ນ ອົງການ​ອະນາໄມ​ໂລກ  (WHO) ຈຶ່ງ​ໄດ້​ຮຽກຮ້ອງ​ໄປ​ຍັງ​ປະຊາ​ຄົມ​ສາກົນ ໃຫ້​ເພີ່ມ​ທະວີ​ການ​ລົງທຶນ ຮັກສາ​ການ​ບໍລິການ​ດູ​ແລ​ສຸຂະພາບ​ທາງ​ຈິດ ຢູ່​ໃນ​ເຂດ​ຕ່າງໆ​ດັ່ງກ່າວ.

    ບົດ​ລາຍ​ງານ​ດັ່ງກ່າວ​ໃຫ້​ຮູ້​ວ່າ ປະມານ 22% ຂອງ​ບັນດາ​ຜູ້​ທີ່​ໄດ້​ຮັບ​ຜົນ​ກະທົບ​ຈາກ​ການ​ພິພາດ​ນັ້ນ ມີ​ອາການ​ຊຶມ​ເສົ້າ ກັງວົນ ຫຼື​ມີ​ຄວາມ​ສັບສົນ ຫຼັງ​ມີ​ອາການ​ບາດເຈັບ.

    ຜົນ​ທີ່​ອອກ​ມາ​ຄື​ດັ່ງກ່າວ ແມ່ນ​ອີງໃສ່​ການ​ວິໄຈ​ຢູ່​ໃນ​ການ​ຄົ້ນຄວ້າ 129 ລາຍການ ທີ່​ໄດ້​ປະກາດ​ຢູ່​ໃນ​ວາລະສານ​ວິທະຍາສາດ The Lancet ຂອງ​ອັງກິດ.

    ການ​ຄົ້ນຄວ້າ​ຍັງ​ຊີ້​ໃຫ້​ເຫັນ​ວ່າ ປະມານ 9% ຂອງ​ຈຳນວນ​ປະຊາກອນ ທີ່​ຖືກ​ຜົນ​ກະທົບ​ຈາກ​ການ​ພິພາດ ແມ່ນ​ມີ​ສະພາບ​ການ​ດ້ານ​ສຸຂະພາບ​ທາງ​ຈິດ ຈາກ​ລະດັບ​ປານ​ກາງ ຫາ​ໜັກ ເປັນ​ຕົວ​ເລກ​ທີ່​ສູງ​ກວ່າ​ຫຼາຍ​ພໍ​ສົມຄວນ ເມື່ອ​ທຽບໃສ່​ການ​ຄາດ​ຄະເນ​ໃນ​ທົ່ວ​ໂລກ ກ່ຽວ​ກັບ​ລະ​ພາບ​ການ​ດ້ານ​ສຸຂະພາບ​ທາງ​ຈິດ​ໂດຍ​ລວມ

     ການ​ຄົ້ນຄວ້າ​ກໍ​ໃຫ້​ຮູ້​ວ່າ ອາການ​ຊຶມ​ເສົ້າ ແລະ​ກັງວົນ ເບິ່ງ​ຄື​ວ່າ​ເພີ່ມ​ຂຶ້ນ​ຕາມ​ເກນ​ອາຍຸ ຢູ່​ໃນ​ສະພາບ​ແວດ​ລ້ອມ​ທີ່​ມີ​ການ​ພິພາດ. ເມື່ອ​ທຽບໃສ່​ເພດ​ຊາຍ​ແລ້ວ ອັດຕາ​ສ່ວນ​ຂອງ​ອາການ​ຊຶມ​ເສົ້າ​ຢູ່​ໃນ​ເພດ​ຍິງ ມັກ​ຈະ​ສູງ​ກວ່າ.

    ການ​ຄົ້ນຄວ້າ​ທີ່​ດຳເນີນ​ໄປ​ນັ້ນ ແມ່ນ​ອີງໃສ່​ຂໍ້​ມູນ​ຈາກ 39 ປະເທດ ທີ່​ໄດ້​ນຳ​ອອກ​ມາ​ເປີດເຜີຍ​ແຕ່​ປີ 1980 ຮອດ​ເດືອນ​ສິງຫາ ປີ 2017 ແລະ​ໄດ້​ຮັບ​ການ​ແບ່ງ​ປະເພດ​ຢູ່​ທີ່​ລະດັບ ເບົາ ປານ​ກາງ ແລະ​ໜັກ. ໃນ​ປີ 2016 ມີ​ການ​ພິພາດ 53 ລາຍ ເກີດ​ຂຶ້ນ​ຢູ່​ໃນ 37 ປະເທດ ນັ້ນ​ກໍ​ໝາຍ​ຄວາມ​ວ່າ 12% ຂອງ​ຈຳນວນ​ປະຊາກອນ​ໂລກ ດຳລົງ​ຊີວິດ​ຢູ່​ໃນ​ເຂດ​ທີ່​ເກີດ​ການ​ພິພາດ ນັບ​ວ່າ​ເປັນ​ລະດັບ​ສູງ​ສຸດ ເທົ່າ​ທີ່​ເຄີຍ​ມີ​ມາ. ຍິ່ງ​ໄປ​ກວ່າ​ນັ້ນ ໃນ​ຄວາມ​ເປັນ​ຈິງ​ແລ້ວ ທົ່ວ​ໂລກ​ມີ​ເກືອບ 69 ລ້ານ​ຄົນ ຕ້ອງ​ໄດ້​ຍ້າຍ​ບ່ອນຢູ່​ຍ້ອນ​ເກີດ​ຄວາມ​ຮຸນ​ແຮງ ແລະ​ການ​ພິພາດ ກາຍເປັນ​ປະລິມານ​ຄົນ​ທີ່​ຕ້ອງ​ໄດ້​ຍົກຍ້າຍ​ຫຼາຍ​ທີ່​ສຸດ ນັບ​ແຕ່​ສົງຄາມ​ໂລກ​ຄັ້ງ​ທີ​ສອງ​ເປັນຕົ້ນ​ມາ.

ຂ່າວທີ່ກ່ຽວຂ້ອງ