ຂ່າວຫຼ້າສຸດ

ຊີ​ຣີ ໃຫ້​ຣັດ​ເຊຍ​ເຊົ່າ​ທ່າ​ກຳປັ່ນຂະໜາດ​ໃຫຍ່​ສຸດ

580 17 ມິ.ຖ. 2019 ຂ່າວຕ່າງປະເທດ
 ຊີ​ຣີ ໃຫ້​ຣັດ​ເຊຍ​ເຊົ່າ​ທ່າ​ກຳປັ່ນຂະໜາດ​ໃຫຍ່​ສຸດ

   ຂໍ້​ມູນ​ຈາກ​ສຳນັກ​ຂ່າວສານ​ແຫ່ງ​ລັດ​ຊີ​ຣີ (SANA) ທີ່​ມີ​ອອກ​ມາ​ເມື່ອ​ວັນ​ທີ 12 ມິຖຸນາ​ທີ່​ຜ່ານ​ມາ ໃຫ້​ຮູ້​ວ່າ ສະພາ​ແຫ່ງ​ຊາດ​ຊີ​ຣີ ໄດ້​ຮັບຮອງ​ຮ່າງ​ກົດໝາຍ ວ່າ​ດ້ວຍ​ການ​ມອບ​ສິດ​ຄຸ້ມ​ຄອງ​ທ່າ​ກຳປັ່ນ ຕາ​ຕຸ​​ສ (Tartus) ທີ່​ມີ​ຂະໜາດ​ໃຫຍ່​ສຸດ​ໃນ​ຊີ​ຣີ ນັ້ນ ໃຫ້​ແກ່​ບໍລິສັດ  Stroytransgaz (ສ້າງຕັ້ງ​ໃນ​ປີ 1991) ຂອງ​ຣັດ​ເຊຍ ດ້ວຍ​ກຳນົດ​ເວລາ 49 ປີ. ຮ່າງ​ກົດໝາຍ ທີ່​ສະພາ​ແຫ່ງ​ຊາດ​ຊີ​ຣີ ຮັບຮອງ​ໄປ​ນັ້ນ ຍັງ​ຈະ​ຕ້ອງ​ໄດ້​ຮັບ​ການ​ຮັບຮອງ​ຈາກ​ປະທານາທິບໍດີ​ຊີ​ຣີ ບາ​ຊາ ອາ​​ລ-​ອັສ​ຊັດ.

    ຂໍ້​ຕົກລົງ​ລະຫວ່າງ​ຊີ​ຣີ ກັບ​ຣັດ​ເຊຍ ກ່ຽວ​ກັບ​ການ​ຄຸ້ມ​ຄອງ ເປີດ​ກວ້າງ ແລະ​ດຳເນີນ​ການເຄື່ອນໄຫວ​ທ່າ​ກຳປັ່ນ ຕາ​ຕຸ​​ສ ໄດ້​ຮັບ​ການ​ລົງ​ນາມ​ເມື່ອ​ທ້າຍ​ເດືອນ​ເມສາ​ທີ່​ຜ່ານ​ມາ. ນີ້​ເປັນ​ໜຶ່ງ​ໃນ​ສັນຍາ​ຂະໜາດ​ໃຫຍ່​ຫຼາຍ​ສະບັບ ລະຫວ່າງ​ຊີ​ຣີ ກັບ ຣັດ​ເຊຍ ທ່າມກາງ​ທີ່​ຣັດ​ເຊຍ ຊຶ່ງ​ເປັນ​ພັນທະ​ມິດ​ທີ່​ສຳຄັນ​ຂອງ​ທາງ​ການ​ຊີ​ຣີ ນັ້ນ​ໄດ້​ຮັກສາ​ຖານ​ທັບ​ເຮືອ​ແຫ່ງ​ໜຶ່ງ ຢູ່​ໃນ​ບໍລິເວນ​ທ່າ​ກຳປັ່ນ ຕາ​ຕຸ​​ສ.

    ຕາມ​ການ​ຕົກລົງ​ກໍ​ແມ່ນ ຈະ​ໄດ້​ສ້າງຕັ້ງ​ຄະນະ​ອຳນວຍ​ການ​ໜຶ່ງ​ຂຶ້ນ​ມາ ເພື່ອ​ຕິດຕາມ​ກວດກາ​ຂະ​ບວນ​ການ​ຄຸ້ມ​ຄອງ ແລະ​ດຳເນີນ​ການເຄື່ອນໄຫວ​ທ່າ​ກຳປັ່ນ ຕາ​ຕຸ​​ສ ໃນ​ນັ້ນ ຜູ້ອຳນວຍການ 6 ຕຳແໜ່ງ ຈະ​ໄດ້​ຖືກ​ແບ່ງປັນ​ເທົ່າໆ​ກັນ ລະຫວ່າງ​ທາງ​ການ​ຊີ​ຣິ ກັບ​ບໍລິສັດ Stroytransgaz ແຕ່​ວ່າ​ສິດ​ໃນ​ການ​ນຳພາ ຈະ​ເປັນ​ຂອງ​ຝ່າຍ​ບໍລິສັດ​ຂອງ​ຣັດ​ເຊຍ. ຄຽງ​ຄູ່​ກັນ​ນັ້ນ ບໍລິສັດ Stroytransgaz ກໍ​ໄດ້​ຮັບ​ການ​ຍົກເວັ້ນ​ການ​ຈ່າຍ​ຄ່າ​ທຳນຽມ​ດ່ານ​ພາສີ​ອາກອນ ແລະ ​ພາສີ​ນຳ​ເຂົ້າ​ສິນຄ້າ ໃນ​ໄລຍະ​ທີ່​ທ່າ​ກຳປັ່ນ ຕາ​ຕຸ​​ສ ໄດ້​ຮັບ​ການ​ເປີດ​ກວ້າງ ໂດຍ​ຄາດ​ວ່າ​ຈະ​ດຳເນີນ​ໄປ​ໃນ​ເວລາ 6 ປີ.

ຂ່າວທີ່ກ່ຽວຂ້ອງ