ຂ່າວຫຼ້າສຸດ

ຈັດ​ອັນ​ດັບ​ນະຄອນ 100 ແຫ່ງ​ທີ່​ມີຄ່າ​ຄອງ​ຊີບ​ແພງ​ທີ່​ສຸດ​ສຳລັບ​ຄົນ​ຕ່າງປະເທດ

1.182 17 ມິ.ຖ. 2019 ຂ່າວຕ່າງປະເທດ
ຈັດ​ອັນ​ດັບ​ນະຄອນ 100 ແຫ່ງ​ທີ່​ມີຄ່າ​ຄອງ​ຊີບ​ແພງ​ທີ່​ສຸດ​ສຳລັບ​ຄົນ​ຕ່າງປະເທດ

   ເມື່ອ​ວັນ​ທີ 13 ມິຖຸນາ​ນີ້ ອົງການ​ທີ່​ປຶກສາ​ການ​ຄຸ້ມ​ຄອງ​ສາກົນ ECA International ຊຶ່ງ​ມີ​ສຳນັກງານ​ຕັ້ງ​ຢູ່​ໃນ​ອັງກິດ ໄດ້​ນຳ​ປະກາດ​ຕາຕະລາງ​ການ​ຈັດ​ອັນ​ດັບ​ບັນດາ​ນະຄອນ ທີ່​ມີຄ່າ​ຄອງ​ຊີບ​ແພງ​ທີ່​ສຸດ ສຳລັບ​ຄົນ​ຕ່າງປະເທດ (Cost of Living Index).

    ຢູ່​ໃນ​ແຖວ​ໜ້າ​ຂອງ​ຕາຕະລາງ​ຈັດ​ອັນ​ດັບ​ດັ່ງກ່າວ​ໃນ​ປີ​ນີ້ ກໍ​ແມ່ນ​ນະຄອນຫຼວງ ອາ​​ສ​ຄາ​ບາດ ຂອງ​ຕວກ​ເມ​ນິດ​ສະຖານ. ອັນ​ດັບ​ຮອງ​ລົງ​ມາ​ກໍ​ແມ່ນ​ນະຄອນ ຊູ​ຣິກ ແລະ​ນະຄອນ​ເຊີ​ແນວ ຊຶ່ງ​ທັງ​ສອງ​ນະຄອນ​ນີ້ ເປັນ​ຂອງ​ປະເທດ​ສະ​ວິດ. ບັນດາ​ອັນ​ດັບ​ຮອງ​ລົງ​ມາ​ອີກ ຕາມ​ລຳດັບ​ກໍ​ແມ່ນ ຮົງ​ກົງ (ຈີນ) ບາ​ແຊລ (ສະ​ວິດ) ເບີນ (ສະ​ວິດ) ໂຕ​ກຽວ (ຍີ່ປຸ່ນ) ເຊ​ອູນ (ສ ເກົາຫຼີ) ແຕນ ອາ​ວິບ (ອິດ​ສະ​ຣາ​ແອນ) ແລະ​ ຊຽງ​ໄຮ (ຈີນ). ນະຄອນຫຼວງ ເຕ​ເຮ​ຣານ ຂອງ​ອີ​ຣານ ຖືກ​ຈັດ​ຢູ່​ທ້າຍ​ຕາຕະລາງ. ໃນ​ຂະນະ​ດຽວ​ກັນ ນະຄອນຫຼວງ ກາ​ຣາ​ກາ​​ສ ຂອງ​ເວ​ເນ​ຊູ​ເອ​ລາ ຕົກ​ຈາກ​ອັນ​ດັບ​ນຳ​ໜ້າ​ໃນ​ປີ​ກາຍ ລົງ​ສູ່​ອັນ​ດັບ​ທີ 238 ໃນ​ປີ​ນີ້ ຊຶ່ງ​ມີ​ສາເຫດ​ມາ​ຈາກ​ເງິນ​ເຟີ້​ຖີບ​ຕົວ​ຂຶ້ນ​ເຖິງ 1,3 ລ້ານ​ສ່ວນ​ຮ້ອຍ (1.300.000%) ໃນ​ປີ 2018.

     ໃນ​ການ​ຈັດ​ອັນ​ດັບ​ດັ່ງກ່າວ ECA International ໄດ້​ປຽບທຽບ​ລາຄາ​ຂອງ​ສິນຄ້າ​ຕ່າງໆ ແລະ ​ການ​ບໍລິການ​ທີ່​ຈຳເປັນ​ໃນ​ແຕ່​ລະ​ວັນ ຢູ່​ໃນ 482 ນະຄອນ​ໃນ​ທົ່ວ​ໂລກ ອັນ​ປະກອບ​ດ້ວຍ​ລາຄາ​ສະບຽງ​ອາຫານ ເຄື່ອງໃຊ້​ໃນ​ຄົວ​ເຮືອນ ການ​ບັນເທີງ​ເບົາ​ສະໝອງ ເຄື່ອງນຸ່ງ​ຫົ່ມ ຕະຫຼອດ​ຮອດ​ເຫຼົ້າ​ເບຍ ຢາສູບ ແລະ​ສິນຄ້າ​ອື່ນໆ​ອີກ​ຈຳນວນ​ໜຶ່ງ. ເຖິງ​ຢ່າງໃດ​ກໍ​ຕາມ ຄ່າ​ໃຊ້​ຈ່າຍ​ໃນ​ການ​ດຳລົງ​ຊີວິດ​ຈຳນວນ​ໜຶ່ງ ເຊັ່ນ ການ​ເຊົ່າ​ເຮືອນ​ຢູ່ ແລະ​ ສິ່ງ​ອຳນວຍ​ຄວາມ​ສະດວກ (ໄຟຟ້າ ນ້ຳ ແລະ​ ແກ​​ັສ) ຊື້​ລົດ ແລະ ​ຄ່າ​ຮຽນ ແມ່ນ​ບໍ່​ໄດ້​ຄິດໄລ່.

ຂ່າວທີ່ກ່ຽວຂ້ອງ