ກຳນົດເອົາ 3 ສິງຫາ 2019 ເປັນວັນສອບເສັງເຂົ້າສຶກສາຢູ່ ມຊ

1.034 14 ມິ.ຖ. 2019 ຂ່າວໜ້າ​ໜຶ່ງ
ກຳນົດເອົາ 3 ສິງຫາ 2019 ເປັນວັນສອບເສັງເຂົ້າສຶກສາຢູ່ ມຊ

    ມະ­ຫາ­ວິ­ທະ­ຍາ­ໄລ​ແຫ່ງ​ຊາດ (ມຊ) ກຳ­ນົດ​ວັນ​ສອບ­ເສັງ​ເຂົ້າ​ສຶກ​ສາ​ຢູ່ ມຊ ສົກ​ສຶກ​ສາ 2019-2020 ວັນ​ທີ 3 ສິງ­ຫາ 2019 ພ້ອມ​ທັງ​ໄດ້​ແນະ­ນຳ​ການ​ກະ­ກຽມ​ກ່ອນ​ສະ­ໝັກ​ເຂົ້າ​ສອບ­ເສັງ ເພື່ອ​ຮັບ­ປະ­ກັນ​ດ້ານ​ຄວາມ​ພ້ອມ ແລະ ເຮັດ​ໃຫ້­ການ​ສອບ­ເສັງ​ມີ​ປະ​ສິດ­ທິ​ຜົນ​ສູງ.

    ອີງ​ຕາມ​ໜັງ­ສື​ແຈ້ງ​ການ​ສະ­ບັບ​ເລກ​ທີ 1735/ມຊ ນະ­ຄອນ­ຫຼວງ​ວຽງ​ຈັນ ລົງ​ວັນ​ທີ 3 ມິ­ຖຸ­ນາ 2019 ເລື່ອງ​ການ­ຈັດ­ຕັ້ງ​ປະ­ຕິ­ບັດ​ການ​ລົງ­ທະ­ບຽນ ເພື່ອ​ຮັບ​ສະ­ໝັກ​ສອບ­ເສັງ​ຄັດ​ເລືອກ​ເອົາ​ນັກ​ສຶກ​ສາ​ເຂົ້າ​ຮຽນ​ຢູ່ ມຊ ສົກ​ສຶກ​ສາ 2019-2020 ໂດຍ​ການ​ລົງ­ທະ­ບຽນ​ສອບ­ເສັງ​ປີ​ນີ້ ມຊ ຈະ​ໄດ້​ປະ­ຕິ­ບັດ​ການ​ສອບ­ເສັງ​ຄັດ​ເລືອກ​ເອົາ​ນັກ­ຮຽນ ເພື່ອ​ເຂົ້າ​ສຶກ​ສາ​ຕໍ່​ຢູ່ ມຊ ໂດຍ​ໄດ້​ກຳ­ນົດ​ວັນ​ສອບ­ເສັງ ວັນ​ທີ 3 ສິງ­ຫາ 2019 ເຊິ່ງ​ເປີດ​ລົງ­ທະ­ບຽນ​ອອນ​ລາຍ ເລີ່ມ​ແຕ່​ວັນ​ທີ 1-30 ກໍ­ລະ­ກົດ 2019 ແລະ ນຳ​ເອ­ກະ­ສານ​ມາ​ສະ­ເໜີ ຮັບ​ບັດ​ອະ­ນຸ­ຍາດ​ເຂົ້າ​ຫ້ອງ​ສອບ­ເສັງ​ຈາກ​ການ​ລົງ​ອອນ​ລາຍ ແຕ່​ວັນ​ທີ 8-30 ກໍ­ລະ­ກົດ 2019 ຢູ່ ມຊ (ສະ­ໂມ­ສອນ​ໃຫຍ່) ກໍ­ລະ­ນີ​ຜູ້​ບໍ່​ສາ­ມາດ​ລົງ­ທະ­ບຽນ​ເອງ​ໄດ້ ແລະ ບໍ່​ເຂົ້າ­ໃຈ ສາ­ມາດ​ລົງ­ທະ­ບຽນ​ທາງ​ອອນ​ລາຍ ຢູ່ ມຊ ແຕ່​ວັນ​ທີ 8-30 ກໍ­ລະ­ກົດ 2019.

    ເວ­ລາ​ສອບ­ເສັງ ວັນ​ທີ 3 ສິງ­ຫາ 2019 ກຸ່ມA ເວ­ລາ 9:00-11:00 ໂມງ ສອບ­ເສັງ​ວິ­ຊາ​ຄະ­ນິດ­ສາດ ກຸ່ມA+ ພາ­ສາ​ລາວ-ວັນ­ນະ­ຄະ­ດີ ເວ­ລາ 14:00-16:00ໂມງ ສອບ­ເສັງ​ວິ­ຊາ​ຟີ​ຊິກ​ສາດ+ເຄ​ມີ​ສາດ+ຊີ­ວະ​ສາດ ກຸ່ມ​ສອບ­ເສັງ ກຸ່ມB ເວ­ລາ 14:00-16:00 ໂມງ ສອບ­ເສັງ​ວິ­ຊາ​ຟີ​ຊິກ​ສາດ+ເຄ​ມີ​ສາດ+ຊີ­ວະ​ສາດ ເວ­ລາ 9:00-11:00 ໂມງ ສອບ­ເສັງ​ວິ­ຊາ​ຄະ­ນິດ­ສາດ ກຸ່ມB+ ພາ­ສາ​ລາວ+ວັນ­ນະ­ຄະ­ດີ ເວ­ລາ 14:00-15:30 ໂມງ ສອບ­ເສັງ​ວິ­ຊາ​ພູມ​ສາດ+ປະ​ຫັວດ​ສາດ ກຸ່ມC ເວ­ລາ 9:00-11:00 ໂມງ ສອບ­ເສັງ​ວິ­ຊາ​ຄະ­ນິດ­ສາດ ກຸ່ມC+ ເຄ​ມີ​ສາດ+ຊີ­ວະ​ສາດ ເວ­ລາ 14:00-15:30 ໂມງ ສອບ­ເສັງ​ວິ­ຊາ​ພູມ​ສາດ+ປະ­ຫວັດ­ສາດ+ພາ­ສາ​ລາວ+ວັນ­ນະ­ຄະ­ດີ.

    ສຳ­ລັບ​ເອ­ກະ­ສານ​ທີ່​ນັກ­ຮຽນ​ຕ້ອງ​ປະ­ກອບ​ຄັດ​ຕິດ​ໃສ່​ເອ­ກະ­ສານ​ສະ­ໝັກ​ສອບ­ເສັງ ປະ­ກອບ​ມີ​ສຳ​ເນົາ​ບັດ​ເຂົ້າ​ຫ້ອງ​ເສັງ ມ7 ສົກ­ຮຽນ 2018-2019 (1 ສະ­ບັບ) ສຳ​ເນົາ​ປະ​ກາ​ສະ​ນິ​ຍະ​ບັດ ມ7 ກ່ອນ​ສົກ­ຮຽນ 2018-2019 (1 ສະ­ບັບ) ສຳ​ເນົາ​ບັດ­ປະ­ຈຳ­ຕົວ ຫຼື ສຳ​ເນົາ​ປື້ມ​ສຳ­ມະ­ໂນ​ຄົວ​ທີ່​ມີ​ຮູບ​ຜູ້​ສະ­ໝັກ​ຕິດ​ຢູ່ (1 ສະ­ບັບ) ຮູບ 3X4 (ຖ່າຍ​ບໍ່​ເກີນ 3 ເດືອນ) 2 ໃບ ສຳ­ລັບ​ນັກ­ຮຽນ ມ7 ສົກ­ຮຽນ 2018-2019 ໃຫ້​ເອົາ​ຮູບ​ດຽວ​ກັນ​ກັບ​ຮູບ​ໃນ​ບັດ​ເຂົ້າ​ຫ້ອງ​ສອບ­ເສັງ ມ7 ໂດຍ​ເອ­ກະ­ສານ​ທຸກ​ຊະ­ນິດ​ຕ້ອງ​ມີ​ຕົ້ນ​ສະ­ບັບ​ມາ​ຢັ້ງ­ຢືນ ເພື່ອ​ກວດ​ສອບ​ຄວາມ​ຖືກ­ຕ້ອງ ນັກ​ສຶກ​ສາ​ສາ­ມາດ​ຕິດ­ຕາມ​ລາຍ​ຊື່ ແລະ ສະ­ຖານ­ທີ່​ສອບ­ເສັງ ໃນ​ວັນ​ທີ 2 ສິງ­ຫາ 2019 ໂດຍ​ລາຍ​ລະ­ອຽດ​ເພີ່ມ​ເຕີມ ສາ­ມາດ​ເຂົ້າ​ເບິ່ງ​ໄດ້​ທີ່ http://entrance.nuol.edu.la.

ຂ່າວທີ່ກ່ຽວຂ້ອງ