ລາວ ໄດ້ຊະນະເລີດ ສີມືແຮງງານສາຂາຊ່າງຕັດຫຍິບ

907 14 ມິ.ຖ. 2019 ຂ່າວໜ້າ​ໜຶ່ງ
ລາວ ໄດ້ຊະນະເລີດ ສີມືແຮງງານສາຂາຊ່າງຕັດຫຍິບ

    ສປປ ລາວ ສົ່ງ​ນັກ​ແຂ່ງ­ຂັນ 2 ຄົນ ເຂົ້າ​ຮ່ວມ​ແຂ່ງ­ຂັນ​ສາ­ຂາ​ຊ່າງ​ປຸງ​ແຕ່ງ­ອາ­ຫານ ແລະ ຊ່າງ​ຕັດ­ຫຍິບ ໃນ​ງານ​ແຂ່ງ­ຂັນ​ສີ­ມື​ແຮງ​ງານ​ສາ­ກົນ “ໜຶ່ງ​ແລວ ໜຶ່ງ​ເສັ້ນ­ທາງ” ວັນ​ທີ 25-31 ພຶດ­ສະ­ພາ 2019 ຢູ່ ສປ ຈີນ ໂດຍ​ມີ 44 ປະ­ເທດ​ເຂົ້າ​ຮ່ວມ ເຊິ່ງ​ງານ​ດັ່ງ­ກ່າວ​ມີ​ການ​ແຂ່ງ­ຂັນ 18 ສາ­ຂາ​ວິ­ຊາ​ຊ່າງ ມີ​ນັກ​ແຂ່ງ­ຂັນ​ເກືອບ 700 ຄົນ ສຳ­ລັບ ສປປ ລາວ ນຳ­ພາ​ໂດຍ​ທ່ານ ທາ ທອງ​ພາດ ຮອງ​ຫົວ­ໜ້າ​ພະ​ແນກ​ພັດ­ທະ­ນາ​ມາດ­ຕະ­ຖານ​ສີ­ມື​ແຮງ​ງານ ກະ­ຊວງ​ແຮງ​ງານ ແລະ ສະ­ຫວັດ­ດີ​ການ-ສັງ­ຄົມ.

    ການ​ກຳ­ນົດ​ເອົາ 2 ສາ­ຂາ​ຊ່າງ​ເຂົ້າ​ຮ່ວມ​ແຂ່ງ­ຂັນ​ຄັ້ງ​ນີ້ ເນື່ອງ​ຈາກ​ເປັນ​ສາ­ຂາ​ທີ່​ມີ​ຜົນ­ງານ​ດີ​ໃນ​ໄລ­ຍະ​ຜ່ານ​ມາ ແລະ ເປັນ​ສາ­ຂາ​ວິ­ຊາ​ຊ່າງ​ທີ່​ນອນ​ໃນ 18 ສາ­ຂາ​ທີ່​ເຈົ້າ­ພາບ​ກຳ­ນົດ ເຊິ່ງ​ຜ່ານ​ການ​ແຂ່ງ­ຂັນ ນາງ ທອງ​ດີ ອິນ​ທະ​ວົງ ຈາກ​ສູນ​ພັດ­ທະ­ນາ​ສີ­ມື​ຕັດ­ຫຍິບ ສາ­ມາດ​ຍາດ​ມາ​ໄດ້​ໃບ­ຢັ້ງ­ຢືນ​ສີ­ມື​ແຮງ​ງານ​ດີ­ເລີດ ສາ­ຂາ​ວິ­ຊາ​ຊ່າງ​ຕັດ­ຫຍິບ​ເຄື່ອງ­ນຸ່ງ ໄດ້​ຄະ­ແນນ 700 ຕາມ​ມາດ­ຕະ­ຖານ ຈັດ​ຢູ່​ອັນ​ດັບ​ທີ 7 ຈາກ​ນັກ​ແຂ່ງ­ຂັນ 13 ຄົນ ຈາກ 13 ປະ­ເທດ ສາ­ຂາ​ວິ­ຊາ​ປຸງ​ແຕ່ງ­ອາ­ຫານ ມີ​ນັກ​ແຂ່ງ­ຂັນ​ເຂົ້າ​ຮ່ວມ 17 ຄົນ ຈາກ 17 ປະ­ເທດ ທ້າວ ວັນ­ເພັງ ຈັນ­ທະ​ວົງ ຈາກ​ສະ​ຖາ​ບັນ​ການ​ໂຮງ­ແຮມ ແລະ ການ­ທ່ອງ­ທ່ຽວ​ແຫ່ງ​ຊາດ ຍາດ​ໄດ້​ຄະ­ແນນ 699.1 ໄດ້​ໃບ­ຢັ້ງ­ຢືນ​ການ​ເຂົ້າ​ຮ່ວມ​ແຂ່ງ­ຂັນ.

    ການ​ສົ່ງ​ນັກ​ແຂ່ງ­ຂັນ​ສີ­ມື​ແຮງ​ງານ​ເຂົ້າ​ຮ່ວມ​ຄັ້ງ​ນີ້ ເພື່ອ​ຈັດ​ຕັ້ງ​ຜັນ​ຂະ­ຫຍາຍ​ແນວ​ຄິດ​ລິ​ເລີ່ມ ໃນ​ການ​ສົ່ງ­ເສີມ​ການ​ຮ່ວມ​ມື​ກັບ​ສາ­ກົນ​ຂອງ ສປ ຈີນ ເພີ່ມ​ທະ­ວີ​ຄວາມ​ສາ­ມັກ­ຄີ ບົນ​ພື້ນ­ຖານ​ຄວາມ​ເປັນ​ມິດ­ຕະ­ພາບ​ເດີນ​ຕາມ​ເສັ້ນ­ທາງ “ໜຶ່ງ​ແລວ ໜຶ່ງ​ເສັ້ນ­ທາງ” ແລະ ເພີ່ມ​ການ​ຮ່ວມ​ມື​ຄວາມ​ສາ­ມາດ​ດ້ານ​ທັກ​ສະ­ສີ​ມື​ແຮງ​ງານ ແນ­ໃສ່​ຍົກ​ລະ­ດັບ​ສີ­ມື​ແຮງ​ງານ​ລາວ​ໃຫ້​ນັບ​ມື້​ດີ​ຂຶ້ນ​ທຽບ​ທັນ​ກັບ​ສາ­ກົນ ໂດຍ​ສະ­ເພາະ​ປະ­ເທດ​ທີ່​ເຂົ້າ​ຮ່ວມ​ແຂ່ງ­ຂັນ​ຄັ້ງ​ນີ້.

ຂ່າວທີ່ກ່ຽວຂ້ອງ