ຂ່າວຫຼ້າສຸດ

ລາວ ສົ່ງ 5 ປະເພດ ເຂົ້າຮ່ວມກີລານັກຮຽນອາຊຽນ

1.220 14 ມິ.ຖ. 2019 ວົງຈອນກີລາ
ລາວ ສົ່ງ 5 ປະເພດ ເຂົ້າຮ່ວມກີລານັກຮຽນອາຊຽນ

    ທ່ານ ບຸນ​ສຸກ ທິ​ລະ​ສັກ ຫົວ­ໜ້າ​ກົມ​ພະ­ລະ ແລະ ສີ​ລະ​ປະ​ສຶກ​ສາ ກະ­ຊວງ​ສຶກ​ສາ​ທິ​ການ ແລະ ກີ­ລາ ໃຫ້​ສຳ­ພາດ​ວັນ​ທີ 11 ມິ­ຖຸ­ນາ ຜ່ານ​ມາ​ວ່າ: ປັດ­ຈຸ­ບັນ​ພວກ​ເຮົາ​ໄດ້​ຄັດ​ເລືອກ​ນັກ­ກີ­ລາ 5 ປະ­ເພດ ເພື່ອ​ສົ່ງ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ​ນັກ­ຮຽນ​ອາ​ຊຽນ ຄັ້ງ​ທີ XI ຢູ່​ປະ­ເທດ​ອິນ​ໂດ​ເນ​ເຊຍ ວັນ​ທີ 19-23 ກໍ­ລະ­ກົດ 2019 ໃນ​ນີ້​ມີ: ລອຍ­ນ້ຳ ແລ່ນ-ລານ ກະ­ຕໍ້ ດອກ​ປີກ​ໄກ່ ແລະ ປັນ​ຈັກ​ສີ​ລັດ ເຊິ່ງ​ບາງ​ປະ­ເພດ ສາ­ມາດ​ຄັດ​ເລືອກ​ນັກ­ກີ­ລາ​ສຳ­ເລັດ ແລະ ໄດ້​ເຂົ້າ​ນອນ​ສູນ​ເຝິກ­ຊ້ອມ​ແລ້ວ ແລະ ຄາດ​ວ່າ​ມໍ້ໆ​ນີ້ ຈະ​ສຳ­ເລັດ​ການ​ຄັດ​ເລືອກ​ບາງ​ປະ­ເພດ​ກີ­ລາ​ທີ່​ຍັງ​ເຫຼືອ.

    ສຳ­ລັບ​ສູນ​ເຝິກ­ຊ້ອມ ໄດ້​ກຳ­ນົດ​ເອົາ​ສູນ​ເຝິກ​ກີ­ລາ​ແຫ່ງ​ຊາດ (ສີ​ເກີດ) ສະ­ໂມ­ສອນ​ກີ­ລາ​ໃນ​ຮົ່ມ​ໂອ​ແລມ​ປາ​ເຊຍ ວິ­ທະ­ຍາ​ເຂດ​ດົງ​ໂດກ ແລະ ສະ​ລອຍ­ນ້ຳ​ສະ­ໜາມ​ກີ­ລາ​ລອຍ­ນ້ຳ​ແຫ່ງ​ຊາດ (ຫຼັກ 16).

    ລາວ ຈະ​ສົ່ງ​ຄະ­ນະ​ນຳ​ແພດ ນັກ​ຂ່າວ ຄູ​ເຝິກ ແລະ ນັກ­ກີ­ລາ ເຂົ້າ​ຮ່ວມ​ມະ​ຫະ​ກຳ​ກີ­ລາ​ນັກ­ຮຽນ​ອາ​ຊຽນ ຄັ້ງ​ທີ XI ຈຳ­ນວນ 80 ຄົນ ໃນ​ນີ້​ນັກ­ກີ­ລາ 60 ຄົນ ຈະ​ເດີນ­ທາງ​ວັນ​ທີ 16 ກໍ­ລະ­ກົດ 2019.

ຂ່າວທີ່ກ່ຽວຂ້ອງ