Prambanan ວັດຮິນດູ ໃນໂຢກຢາ

923 14 ມິ.ຖ. 2019 ຫົວຂໍ້ຂ່າວອື່ນໆ
Prambanan ວັດຮິນດູ ໃນໂຢກຢາ

    ປັດ­ຈຸ­ບັນ ອຸດ­ສາ­ຫະ­ກຳ​ທ່ອງ​ທ່ຽວ​ນັບ​ມື້​ເຕີບ​ໃຫຍ່​ຂະ­ຫຍາຍ­ຕົວ ໃນ​ນັ້ນ​ປັດ​ໄຈ​ທີ່​ຂາດ​ບໍ່​ໄດ້​ຂອງ​ການ​ເຕີບ​ໃຫຍ່​ດັ່ງ­ກ່າວ​ແມ່ນ​ສະ­ຖານ­ທີ່​ທ່ອງ​ທ່ຽວ ທັງ​ດ້ານ​ສະ­ຖານ­ທີ່​ທ່ອງ​ທ່ຽວ​ທາງ​ປະ­ຫວັດ­ສາດ ວັດ​ທະ ນະ​ທຳ ທຳ​ມະ​ຊາດ ແລະ ອື່ນໆ ເຮັດ​ໃຫ້​ຫຼາຍ​ປະ­ເທດ​ໄດ້​ອີງ­ໃສ່​ທ່າ­ແຮງ​ທີ່​ຕົນ​ມີ ກາຍ­ເປັນ​ປາຍ­ທາງ​ຂອງ​ນັກ​ທ່ອງ​ທ່ຽວ​ຈາກ​ທຸກ​ສາ­ລະ​ທິດ​ໃນ​ທົ່ວ​ໂລກ.

    ອິນ​ໂດ​ເນ​ເຊຍ ກໍ​ເປັນ​ອີກ​ປະ­ເທດ​ໜຶ່ງ​ທີ່​ເປັນ​ປາຍ­ທາງ​ອັນ​ດັບ​ຕົ້ນໆ​ຂອງ​ນັກ​ທ່ອງ​ທ່ຽວ ແລະ ແຕ່​ລະ​ແຂວງ ແຕ່​ລະ​ເຂດ​ກໍ​ມີ​ທ່າ­ແຮງ​ດ້ານ​ການ­ທ່ອງ­ທ່ຽວ​ທີ່​ແຕກ​ຕ່າງ​ກັນ​ໄປ ເຊັ່ນ​ຢູ່​ໃນ ເຂດ​ປົກ­ຄອງ​ພິ­ເສດ ໂຢກ​ຢາ​ກາ​ຕາ ຫຼື ໂຢກ​ຢາ ມີ​ສະ­ຖານ­ທີ່​ທ່ອງ​ທ່ຽວ​ທາງ​ດ້ານ​ປະ­ຫວັດ­ສາດ​ໄດ້​ຖື​ຮັບ­ຮອງ​ເປັນ​ມໍ­ລະ­ດົກ​ໂລກ ໃນ​ນັ້ນ ມີ Prambanan ຫຼື Roro Jonggrang ວັດ​ຂອງ​ສາ­ສະ­ໜາ​ຮິນ​ດູ ວັດ​ດັ່ງ­ກ່າວ​ຕັ້ງ​ຫ່າງ​ຈາກ​ຕົວ​ເມືອງ​ໄປ​ທາງ​ຕາ­ເວັນ​ອອກ​ສ່ຽງ​ເໜືອ​ປະ­ມານ 17 ກີ​ໂລ​ແມັດ ວັດ​ດັ່ງ­ກ່າວ​ຖືກ​ສ້າງ​ຂຶ້ນ​ໃນ​ສັດ ຕະ​ວັດ​ທີ 9 ໂດຍ​ການ​ເຫຼື້ອມ​ໃສ​ສັດ­ທາ​ຂອງ​ຜູ້​ຖື​ສາ­ສະ­ໜາ​ຮິນ​ດູ ຕາມ​ການ​ຄົ້ນ­ຄວ້າ​ຂອງ​ຄະ­ນະ​ນັກ­ວິ­ຊາ­ການ ເຫັນ​ໄດ້​ວ່າ ວັດ​ດັ່ງ­ກ່າວ​ປະ­ກອບ​ມີ ເຈ­ດີ ທັງ​ໝົດ 224 ໜ່ວຍ (ແຕ່​ຕາມ​ຄົນ​ໃນ​ທ້ອງ­ຖິ່ນ​ແມ່ນ 224 ວັດ) ທີ່​ຕັ້ງ​ຢູ່​ໃນ​ເນື້ອ­ທີ່ 39,8 ເຮັກ­ຕາ ວັດ​ດັ່ງ­ກ່າວ​ໄດ້​ຖືກ​ຮອງ​ຮັບ​ເປັນ​ມໍ­ລະ­ດົກ​ໂລກ​ຈາກ ອົງ­ການ ອຸຍ​ແນ​ສ​ໂກ ໃນ​ປີ 1991.

    ເນື່ອງ​ຈາກ​ວັດ​ດັ່ງ­ກ່າວ​ໄດ້​ສ້າງ​ຂຶ້ນ​ມາ​ຫຼາຍ​ກວ່າ 1.000 ປີ ຮັດ​ໃຫ້​ຫຼາຍໆ​ເຂດ​ມີ​ການ​ຊຸມ​ໂຊມ ເພ­ພັງ ເຫຼືອ​ໄວ້​ແຕ່​ສ້ວນ​ຫຼັກ​ຂອງ​ວັດ ໃນ​ນັ້ນ​ປະ­ກອບ​ມີ ເຈ­ດີ​ຂອງ Brahma Vishnu ແລະ Shiva ແລະ ພະ­ທາດ​ທີ່​ສູງ​ທີ່​ສຸດ ແມ່ນ​ສູງ​ເຖິງ 47 ແມັດ ປັດ­ຈຸ­ບັນ​ທາງ​ລັດ­ຖະ­ບານ ກໍ​ຄື ອົງ­ການ​ປົກ­ຄອງ​ຂອງ​ເຂດ​ດັ່ງ­ກ່າວ ແລະ ອົງ­ການ​ອຸຍ​ແນ​ສ​ໂກ ພວມ​ເລັ່ງ​ມື​ໃນ​ການ​ບຸ­ລະ­ນະ​ຄືນ­ໃໝ່ ເພື່ອ​ໃຫ້​ສົມ­ບູນ​ຕາມ​ປະ­ຫວັດ​ຄວາມ​ເປັນ​ມາ​ຂອງ​ວັດ​ດັ່ງ­ກ່າວ ນັ້ນ​ກໍ​ຄື ກໍ່­ສ້າງ​ເຈ­ດີ ໃຫ້​ເປັນ​ເອ­ກະ­ລັກ​ຂອງ​ຊາວ​ຮິນ​ດູ ເພື່ອ​ໃຫ້​ຄົບ​ຕາມ​ຈຳ­ນວນ 224 ໜ່ວຍ ເຊິ່ງ​ຕ້ອງ​ໃຊ້​ເວ­ລາ 1 ປີ ຕໍ່ ເຈ­ດີ 1 ໜ່ວຍ ດັ່ງ­ນັ້ນ​ຖ້າ​ໃຫ້​ສົມ­ບູນ​ກໍ​ຕ້ອງ​ໃຊ້​ເວ­ລາ​ຫຼາຍ​ກວ່າ 1 ສັດ­ຕະ­ວັດ.

    ຢ່າງ­ໃດ​ກໍ​ຕາມ ເຖິງ​ແມ່ນ​ວ່າ​ສະ­ພາບ​ຂອງ​ວັດ​ເປ່​ເພ​ເປັນ​ບໍ­ລິ­ເວນ​ກວ້າງ​ກໍ​ຕາມ ແຕ່​ກໍ​ຍັງ​ຖື​ກັບ​ເງື່ອນ­ໄຂ​ໃນ​ການ​ຮັບ­ຮອງ​ເປັນ ມໍ­ລະ­ດົກ​ໂລກ ຂອງ​ອົງ­ການ​ອຸຍ​ແນ​ສ​ໂກ ມາ​ຮອດ​ປັດ­ຈຸ­ບັນ ສະ­ຖານ­ທີ່​ດັ່ງ­ກ່າວ​ຍັງ​ຢູ່​ແຖວ​ໜ້າ​ຂອງ​ບັນ­ຊີ​ລາຍ​ຊື່​ສະ­ຖານ­ທີ່​ທ່ອງ​ທ່ຽວ​ໃນ​ອິນ​ໂດ​ເນ​ເຊຍ ໂດຍ​ສະ­ເພາະ​ໂຢກ​ຢາ​ກາ​ຕາ ເຊິ່ງ​ໃນ​ແຕ່​ລະ​ວັນ​ມີ​ນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງ­ປະ­ເທດ​ເຂົ້າ​ມາ​ທ່ຽວ​ຊົມ​ຫຼາຍ​ຮ້ອຍ​ເທື່ອ​ຄົນ ແລະ ໃນ​ລະ­ດູ​ການ­ທ່ອງ­ທ່ຽວ ອາດ​ຈະ​ສູງ​ເຖິງ​ຫຼາຍ​ພັນ​ເທື່ອ​ຄົນ​ຕໍ່​ວັນ.

    ຈາກ​ເປັນ​ສະ­ຖານ­ທີ່ ທີ່​ເຫຼື້ອມ​ໃສ ເປັນ​ສະ­ຖານ­ທີ່​ສັດ­ທາ​ຂອງ​ຊາວ​ຮິນ​ດູ​ນັບ​ແຕ່​ອະ­ດີດ ຈົນ​ເຖິງ​ປັດ­ຈຸ­ບັນ ວັດ​ດັ່ງ­ກ່າວ ຍັງ​ເປັນ​ສະ­ຖານ­ທີ່​ສຶກ​ສາ​ຮຽນ​ຮູ້​ທາງ​ດ້ານ​ປະ­ຫວັດ­ສາດ​ຂອງ​ຄົນ​ຮຸ່ນ​ໃໝ່ ທັງ​ໃນ​ພາກ​ພື້ນ ແລະ ສາ­ກົນ ເຊິ່ງ​ຜູ້​ຂຽນ​ເອງ​ໄດ້​ມີ​ໂອ­ກາດ​ໄປ​ສຳ​ພັດ​ບັນ­ຍາ­ກາດ​ຕົວ​ຈິງ ຍິ່ງ​ສ້າງ​ຄວາມ​ປະ​ທັບ​ໃຈ​ຫຼາຍ ນອກ­ຈາກ​ສະ​ຖາ​ປະ­ຕິ​ຍະ​ກຳ​ຂອງ​ຊາວ​ຮິນ​ດູ ທີ່​ຕັ້ງ​ສະ­ຫງ່າ​ໃນ​ເນື້ອ­ທີ່​ຫຼາຍ​ກວ່າ 30 ເຮັກ­ຕາ​ແລ້ວ ສິ່ງ​ທີ່​ປະ​ທັບ​ໃຈ​ອີກ​ຢ່າງ​ໜຶ່ງ​ກໍ​ຄື​ຄວາມ​ເປັນ​ລະ­ບຽບ​ຮຽບ​ຮ້ອຍ ກໍ​ຄື ການ​ຮັກ­ສາ​ຄວາມ​ສະ­ອາດ​ໃນ​ສະ­ຖານ­ທີ່​ທ່ອງ​ທ່ຽວ ເຫັນ​ໄດ້​ວ່າ​ມີ​ຄວາມ​ສະ­ອາດ​ຈົບ­ງາມ ເບິ່ງ​ແລ້ວ​ຄວນ​ເອົາ​ມາ​ເປັນ​ບົດ­ຮຽນ​ໃນ​ການ​ສົ່ງ­ເສີມ​ການ­ທ່ອງ­ທ່ຽວ​ໃນ​ບ້ານ​ເຮົາ.

ຂ່າວທີ່ກ່ຽວຂ້ອງ