ປາກລາຍວາງເປົ້າໝາຍ ປະກາດຈົບຊັ້ນມັດທະຍົມຕອນຕົ້ນບຳລຸງ ໃນປີ 2015

2.397 23 ກ.ພ. 2011 ສຶກສາ

<p style="text-align: justify;">      ທ່ານ ສົມ​ໃຈ ຄຳ​ມູນ​ທາ ຫົວ­ໜ້າ​ຫ້ອງ­ການ​ສຶກ​ສາ​ທິ​ການ ເມືອງ​ປາກ​ລາຍ ເປີດ­ເຜີຍ​ໃນ​ໂອ­ກາດ​ເຂົ້າ​ຮ່ວມ​ກອງ​ປະ­ຊຸມ ຖອດ​ຖອນ​ບົດ­ຮຽນ​ວຽກ​ງານ​ສຶກ​ສາ​ທົ່ວ​ແຂວງ ປະ­ຈຳ​ພາກ­ຮຽນ​ທີ​ໜຶ່ງ ສົກ­ຮຽນ 2010-2011 ວ່າ: ເມືອງ​ປາກ​ລາຍ ແມ່ນ​ເມືອງ​ໜຶ່ງ​ທີ່​ຖື​ສຳ­ຄັນ ແລະ ເອົາ­ໃຈ­ໃສ່​ໃນ​ການ​ພັດ­ທະ­ນາ​ຄຸນ​ນະ​ພາບ​ການ​ສຶກ​ສາ ແນ­ໃສ່​ສົ່ງ­ເສີມ​ໃຫ້​ພົນ­ລະ­ເມືອງ​ທຸກ​ຄົນ ມີ​ລະ­ດັບ​ການ​ສຶກ​ສາ​ທີ່​ດີ ມີ​ຄວາມ​ຮູ້​ທີ່​ແນ່­ນອນ ປະ­ກອບ­ສ່ວນ​ເຂົ້າ​ໃນ​ການ​ປົກ​ປັກ​ຮັກ­ສາ ສ້າງ­ສາ ແລະ ພັດ­ທະ­ນາ​ປະ­ເທດ​ຊາດ ກໍ​ຄື​ພັດ­ທະ­ນາ​ຄຸນ​ນະ​ພາບ​ຊີ­ວິດ​ຂອງ​ຕົນ​ໃຫ້​ດີ​ຂຶ້ນ ນອກ­ຈາກ​ເອົາ­ໃຈ­ໃສ່​ໃນ​ການ​ປັບ­ປຸງ​ຄຸນ​ນະ­ພາ​ບວຽກ​ງານ​ສາ­ມັນ​ສຶກ​ສາ​ແລ້ວ ຫ້ອງ­ການ​ສຶກ​ສາ​ທິ​ການ­ເມືອງ ຍັງ​ໄດ້​ສົມ­ທົບ​ກັບ​ອຳ­ນາດ​ການ​ປົກ­ຄອງ​ເມືອງ ແລະ ພາກ­ສ່ວນ​ກ່ຽວ­ຂ້ອງ ຈັດ​ຕັ້ງ​ຮ່ຳ­ຮຽນ​ບຳ­ລຸງ ຍົກ​ລະ­ດັບ​ການ​ສຶກ​ສາ​ໃຫ້​ປະ­ຊາ­ຊົນ ໃນ​ກຸ່ມ​ເປົ້າ​ໝາຍ​ເກນ​ອາ­ຍຸ 15-45 ປີ  ໄດ້​ຮັບ​ຜົນ­ສຳ­ເລັດ ແລະ ສາ­ມາດ​ປະ­ກາດ​ການ​ຮ່ຳ­ຮຽນ​ຈົບ​ຊັ້ນ​ປະ­ຖົມ​ບຳ­ລຸງ​ທົ່ວ​ເມືອງ ໃນ​ວັນ​ທີ 26 ພຶດ­ສະ­ພາ 2005 ປັດ­ຈຸ­ບັນ ພວມ​ສືບ­ຕໍ່​ເປີດ​ຂະ​ບວນ​ການ​ຮ່ຳ­ຮຽນ​ບຳ­ລຸງ ຍົກ​ລະ­ດັບ​ການ​ສຶກ​ສາ​ຊັ້ນ​ມັດ­ທະ­ຍົມ​ຕອນ​ຕົ້ນ ໃຫ້​ປະ­ຊາ­ຊົນ​ໃນ​ກຸ່ມ​ເປົ້າ​ໝາຍ ເຊິ່ງ​ສາ­ມາດ​ຈັດ​ຕັ້ງ​ປະ­ຕິ­ບັດ​ໄດ້​ແລ້ວ 6 ບ້ານ​ຄື: ບ້ານ​ບວມ​ເລົາ ປ່າ​ໄລ່ ນ້ຳ​ຊົ້ງ ບ້ານ​ເມືອງ​ປາ ບ້ານ​ມ່ວງ ແລະ ບ້ານ​ລາດ​ສະ­ຫວ່າງ ມີ​ຜູ້​ເຂົ້າ​ຮ່ວມ​ຮ່ຳ­ຮຽນ​ທັງ​ໝົດ 711 ຄົນ ຍິງ 410 ຄົນ ໃນ​ນີ້​ບ້ານ​ປ່າ​ໄລ່ ສາ­ມາດ​ສອບ­ເສັງ​ສຳ­ເລັດ​ເປັນ​ບ້ານ​ທຳ​ອິດ​ຂອງ​ເມືອງ ຜ່ານ​ການ­ຈັດ­ຕັ້ງ​ປະ­ຕິ­ບັດ​ຕົວ​ຈິງ ເຫັນ​ວ່າ​ວຽກ​ງານ​ດັ່ງ­ກ່າວ ໄດ້​ຮັບ​ຄວາມ​ເອົາ­ໃຈ­ໃສ່​ຈາກ​ຄະ­ນະ​ພັກ ອຳ­ນາດ​ການ​ປົກ­ຄອງ​ເມືອງ ຄະ­ນະ​ພັກ​ຮາກ​ຖານ​ກຸ່ມ​ບ້ານ ອຳ­ນາດ​ການ​ປົກ­ຄອງ​ບ້ານ ຜູ້​ບໍ­ລິ­ຫານ​ການ​ສຶກ​ສາ​ແຕ່​ລະ​ຂັ້ນ ຕະ­ຫຼອດ​ຮອດ​ພະ­ນັກ­ງານ​ວິ­ຊາ​ການ ແລະ ປະ­ຊາ­ຊົນ​ບັນ­ດາ­ເຜົ່າ​ພາຍ​ໃນ​ເມືອງ ຈຶ່ງ​ເຮັດ​ໃຫ້​ຂະ​ບວນ​ການ​ຮຽນ- ການ​ສອນ ດຳ­ເນີນ​ໄປ​ດ້ວຍ​ດີ ນັກ­ຮຽນ​ໃນ​ກຸ່ມ​ເປົ້າ​ໝາຍ​ມີ​ຄວາມ​ສະ­ໝັກ​ໃຈ ຕື່ນ​ຕົວ​ເຂົ້າ​ຮ່ວມ​ຮ່ຳ­ຮຽນ​ເປັນ​ປົກ­ກະ­ຕິ​ຕໍ່​ເນື່ອງ ເດັ່ນ​ກ່ວ​າ​ໝູ່​ແມ່ນ​ບ້ານ​ລາດ​ສະ­ຫວ່າງ ກາຍ­ເປັນ​ບ້ານ​ແບບ­ຢ່າງ ໃນ​ຂະ​ບວນ​ການ​ຮ່ຳ­ຮຽນ​ບຳ­ລຸງ​ມັດ­ທະ­ຍົມ​ຕອນ​ຕົ້ນ ສະ­ແດງ​ອອກ​ປະ­ຊາ­ຊົນ​ໃນ​ເກນ​ອາ­ຍຸ​ກຸ່ມ​ເປົ້າ​ໝາຍ ສະ­ໝັກ​ໃຈ​ເຂົ້າ​ຮ່ວມ​ຮ່ຳ­ຮຽນ 100% ການ​ຮຽນ-ການ​ສອນ​ເປັນ​ຂະ​ບວນ​ຟົດ­ຟື້ນ​ດີ ທ່ານ​ຫົວ­ໜ້າ​ຫ້ອງ­ການ​ສຶກ​ສາ​ທິ​ການ­ເມືອງ​ປາກ​ລາຍ ກ່າວ​ວ່າ: ຕາມ​ແຜນ­ການ​ແລ້ວ ເມືອງ​ປາກ​ລາຍ ວາງ​ເປົ້າ​ໝາຍ​ຈະ​ປະ­ກາດ​ລົບ​ລ້າງ ການ​ຮ່ຳ­ຮຽນ​ມັດ­ທະ­ຍົມ​ຕອນ​ຕົ້ນ​ບຳ­ລຸງ​ປີ 2015 ໃນ​ຈຳ­ນວນ 71ບ້ານ​ທົ່ວ​ເມືອງ ໂດຍ​ຈະ​ສືບ­ຕໍ່​ຈັດ​ຕັ້ງ​ການ​ຮຽນ- ການ​ສອນ​ບ້ານ​ທີ່​ມີ​ເງື່ອນ­ໄຂ ຕາມ​ເຂດ​ຈຸດ​ສຸມ​ກຸ່ມ​ບ້ານ​ພັດ­ທະ­ນາ ຫຼື ບ້ານ​ທີ່​ມີ​ໂຮງ­ຮຽນ​ມັດ­ທະ­ຍົມ ພ້ອມ​ນີ້​ກໍ​ຈະ​ເພີ່ມ​ຄວາມ​ເອົາ­ໃຈ­ໃສ່​ໃນ​ການ​ຊີ້​ນຳ-ນຳ­ພາ ສະ­ໜອງ​ງົບ­ປະ­ມານ ອຸ­ປະ­ກອນ ແລະ ປຸກ­ລະ­ດົມ​ອຳ­ນາດ​ການ​ປົກ­ຄອງ ປະ­ຊາ­ຊົນ​ໃນ​ກຸ່ມ​ເປົ້າ​ໝາຍ ໃຫ້​ມີ​ສ່ວນ​ຮ່ວມ​ວຽກ​ງານ​ນີ້​ຫຼາຍ​ຂຶ້ນ​ກ່ວ​າ​ເກົ່າ.</p>

ຂ່າວທີ່ກ່ຽວຂ້ອງ