ຂ່າວຫຼ້າສຸດ

ຝ່າຍ​ຕ່າງໆ​ໃນ​ຊູ​ດານ​ ເຫັນ​ດີ​ຮື້​ຟື້ນ​ການ​ເຈລະຈາ

429 13 ມິ.ຖ. 2019 ຂ່າວຕ່າງປະເທດ
ຝ່າຍ​ຕ່າງໆ​ໃນ​ຊູ​ດານ​ ເຫັນ​ດີ​ຮື້​ຟື້ນ​ການ​ເຈລະຈາ

 

    ທ່ານ ມາ​ມູ ດີ​ຣີ ທູດ​ພິເສດ​ຂອງ​ນາຍົກລັດຖະມົນຕີ​ເອ​ທີ​ໂອ​ປີ ຊຶ່ງ​ເປັນ​ຜູ້​ທີ່​ມີ​ບົດບາດ​ເປັນ​ຕົວ​ກາງ​ໄກ່​ເກ່ຍ ລະຫວ່າງ​ກອງທັບ ກັບ​ຜູ້​ປະ​ທ້ວງ​ທີ່​ເປັນ​ຝ່າຍ​ຄ້ານ ຢູ່​ໃນ​ປະເທດ​ຊູ​ດານ ໄດ້​ແຈ້ງ​ໃຫ້​ຮູ້ເມື່ອ​ວັນ​ທີ 11 ມິຖຸນາ​ນີ້​ວ່າ ສະຫະພາບ​ເພື່ອ​ເສລີພາບ ແລະ ການ​ປ່ຽນແປງ ທີ່​ເປັນ​ຝ່າຍ​ຄ້ານ​ຢູ່​ໃນ​ຊູ​ດານ ໄດ້​ຍິນ​ດີ​ກັບ​ການ​ຢຸດຕິ​ບັ້ນ​ເຄື່ອນ​ໄຫວ ທີ່​ເອີ້ນ​ວ່າ “ບໍ່​ປະຕິບັດ​ຝ່າຍ​ພົນ​ລະ​ເຮືອນ” ນັບ​ແຕ່​ວັນ​ທີ 12 ມິຖຸນາ​ນີ້​ເປັນຕົ້ນ​ໄປ ແລະ​ ກັບ​ສູ່​ການ​ເຊື່ອມ​ຕໍ່​ການ​ເຈລະຈາ ກ່ຽວ​ກັບ​ການ​ສ້າງຕັ້ງ​ຄະນະ​ກຳມະການ​ຂ້າມ​ຜ່ານ​ສູງ​ສຸດ.

    ທ່ານ ດີ​ຣີ ເວົ້າ​ວ່າ ສະພາ​ການ​ທະຫານ​ຂ້າມ​ຜ່ານ (TMC) ຢູ່​ໃນ​ຊູ​ດານ ໄດ້​ເຫັນ​ດີ​ປ່ອຍ​ຕົວ​ບັນດາ​ນັກໂທດ​ການເມືອງ ຄື​ກັບ​ວ່າ​ເປັນ​ມາດ​ຕະການ​ໜຶ່ງ ເພື່ອ​ສ້າງ​ຄວາມ​ເຊື່ອ​ຖື​ລະຫວ່າງ​ຝ່າຍ​ຕ່າງໆ.

    ການ​ເຈລະຈາ​ລະຫວ່າງ TMC ກັບ​ພັນທະ​ພາບ​ທີ່​ປະກອບ​ດ້ວຍ​ບັນດາ​ກຸ່ມ​ຜູ້​ປະ​ທ້ວງ ແລະ​ຝ່າຍ​ຄ້ານ ໄດ້​ປະສົບ​ຄວາມ​ຫຼົ້ມ​ເຫຼວ ຫຼັງ​ຈາກ​ເກີດ​ການ​ສະຫຼາຍ​ການ​ປະ​ທ້ວງ ດ້ວຍ​ການ​ໃຊ້​ຄວາມ​ຮຸນ​ແຮງ ເມື່ອ​ວັນ​ທີ 3 ມິຖຸນາ​ທີ່​ຜ່ານ​ມາ ສົ່ງ​ຜົນ​ໃຫ້​ມີ​ຜູ້​ເສຍ​ຊີວິດ​ຫຼາຍ​ຮ້ອຍ​ຄົນ.

    ນັບ​ແຕ່​ວັນ​ທີ 8 ມິຖຸນາ​ເປັນຕົ້ນ​ມາ ບັນດາ​ກຸ່ມ​ຜູ້​ປະ​ທ້ວງ​ຢູ່​ໃນ​ຊູ​ດານ ໄດ້​ເປີດ​ບັ້ນ​ທີ່​ເອີ້ນ​ວ່າ “ບໍ່​ປະຕິບັດ​ຝ່າຍ​ພົນ​ລະ​ເຮືອນ” ໃນ​ຂອບ​ເຂດ​ທົ່ວ​ປະເທດ. ຫຼັງ​ຈາກ​ທີ່​ເລີ່ມ​ບັ້ນ​ເຄື່ອນ​ໄຫວ​ດັ່ງກ່າວ ວິ​ສາ​ຫະ​ກິດ​ຢູ່​ໃນ​ຊູ​ດານ​ເກືອບ​ທັງ​ໝົດ ໄດ້​ງົດ​ການເຄື່ອນໄຫວ ແລະ ປະຊາຊົນ​ກໍ​ບໍ່​ເຂົ້າ​ຮ່ວມ​ການເຄື່ອນໄຫວ​ໃດໆທາງ​ສັງຄົມ.

ຂ່າວທີ່ກ່ຽວຂ້ອງ