ເດັກນ້ອຍ​ເພດ​ຊາຍ​ປະມານ 115 ລ້ານ​ຄົນ​ໃນ​ທົ່ວ​ໂລກ ​ແຕ່ງດອງ​ແຕ່​ອາຍຸ​ຍັງ​ນ້ອຍ

518 13 ມິ.ຖ. 2019 ຂ່າວຕ່າງປະເທດ
ເດັກນ້ອຍ​ເພດ​ຊາຍ​ປະມານ 115 ລ້ານ​ຄົນ​ໃນ​ທົ່ວ​ໂລກ ​ແຕ່ງດອງ​ແຕ່​ອາຍຸ​ຍັງ​ນ້ອຍ

   ອົງການ​ກອງ​ທຶນ​ສຳລັບ​ເດັກນ້ອຍ ຂອງ​ສະຫະ​ປະຊາ​ຊາດ (UNICEF) ໃຫ້​ຮູ້​ວ່າ ເດັກນ້ອຍ​ເພດ​ຊາຍ​ປະມານ 115 ລ້ານ​ຄົນ​ໃນ​ທົ່ວ​ໂລກ ໄດ້​ແຕ່ງດອງ​ຕັ້ງແຕ່​ອາຍຸ​ຍັງ​ນ້ອຍ. ດັ່ງນັ້ນ ເດັກນ້ອຍ​ເພດ​ຊາຍ 5 ຄົນ​ໃດ ແມ່ນ​ມີ 1 ຄົນ ແຕ່ງດອງ (ມີ​ເມຍ) ກ່ອນ​ອາຍຸ​ກ້າວ​ເຂົ້າ​ສູ່ 15 ປີ.

    UNICEF ໄດ້​ວິໄຈ​ຂໍ້​ມູນ​ກ່ຽວ​ກັບ​ປະຊາກອນ ແລະ​ສະພາບ​ການ​ແຕ່ງດອງ ຢູ່​ໃນ 82 ປະເທດ​ໃນ​ໂລກ ໂດຍ​ມີ​ຜົນ​ອອກ​ມາ​ວ່າ ສາທາລະນະ​ລັດ ອາ​ຟະ​ຣິກ​ກາ​ກາງ ມີ​ອັດຕາ​ສ່ວນ​ເດັກນ້ອຍ​ແຕ່ງດອງ​ສູງ​ສຸດ​ທີ່ 28% ຖັດ​ລົງ​ມາ​ກໍ​ແມ່ນ ນີ​ກາ​ຣາ​ກົວ ທີ່ 19% ແລະ ມາ​ດາກ​​ັສ​ກາ ທີ່ 13%.

    ບົດ​ລາຍ​ງານ​ຈາກ​ການ​ວິໄຈ​ດັ່ງກ່າວ ກໍ​ຊີ້​ໃຫ້​ເຫັນ​ວ່າ ປັ​​ດ​ຈຸ​ບັນ​ນີ້ ມີ​ເດັກນ້ອຍ​ເພດ​ຊາຍ ແລະ​ເພດ​ຍິງ ປະມານ 765 ລ້ານ​ຄົນ ໄດ້​ແຕ່ງດອງ ຈາກ​ຈຳນວນ​ເດັກນ້ອຍ​ທົ່ວ​ໂລກ 2,2 ຕື້ ຄົນ. ເມື່ອ​ໄລ່​ໃນ​ຂອບ​ເຂດ​ທົ່ວ​ໂລກ​ແລ້ວ ແມ່ຍິງ 5 ຄົນ​ໃດ ແມ່ນ​ມີ 1 ຄົນ ທີ່ຢູ່​ໃນ​ໄວ 20-24 ປີ ໄດ້​ແຕ່ງດອງ ກ່ອນ​ເຖິງ​ອາຍຸ 18 ປີ ທຽບໃສ່​ເພດ​ຊາຍ​ທີ່​ວ່າ 30 ຄົນ​ໃດ ແມ່ນ​ມີ 1 ຄົນ.

    UNICEF ເຫັນ​ວ່າ ພວກ​ເດັກນ້ອຍ​ທີ່​ແຕ່ງດອງ​ໄວ ມີ​ທ່າ​ອ່ຽງ​ປະລະ​ການ​ຮຽນ ໂອກາດ​ດ້ານ​ເສດຖະກິດ​ຄັບແຄບ ແລະ ​ຖືກ​ສວາຍ​ໃຊ້​ໄດ້​ງ່າຍ ພ້ອມ​ທັງ​ພົບ​ກັບ​ບັນຫາ​ດ້ານ​ສຸຂະພາບ​ໄດ້​ງ່າຍ​ກວ່າ ເມື່ອ​ທຽບໃສ່​ເດັກນ້ອຍ​ຄົນ​ອື່ນໆ.

ຂ່າວທີ່ກ່ຽວຂ້ອງ