ຂ່າວຫຼ້າສຸດ

ຮັບຮອງເອົາຮ່າງກົດໝາຍອາຊີວະສຶກສາ ສະບັບປັບປຸງ

856 13 ມິ.ຖ. 2019 ຂ່າວໜ້າ​ໜຶ່ງ
ຮັບຮອງເອົາຮ່າງກົດໝາຍອາຊີວະສຶກສາ ສະບັບປັບປຸງ

    ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 7 ຂອງ​ສະ­ພາ​ແຫ່ງ​ຊາດ ຊຸດ​ທີ 8 ວັນ​ທີ 12 ມິ­ຖຸ­ນາ 2019 ຢູ່​ສະ­ພາ​ແຫ່ງ​ຊາດ (ຫຼັກ 6) ໂດຍ​ເປັນ​ປະ­ທານ​ຂອງ​ທ່ານ​ນາງ ປາ­ນີ ຢາ​ທໍ່​ຕູ້ ປະ­ທານ​ສະ­ພາ​ແຫ່ງ​ຊາດ ໄດ້​ຮັບ​ຟັງ​ການ​ລາຍ​ງານ​ການ­ຈັດ­ຕັ້ງ​ປະ­ຕິ­ບັດ​ແຜນ­ການ­ເຄື່ອນ­ໄຫວ ວຽກ​ງານ​ຂອງ​ຄະ­ນະ​ປະ­ຈຳ​ສະ­ພາ​ແຫ່ງ​ຊາດ ລະ­ຫວ່າງ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 6 ຫາ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 7 ແລະ ທິດ​ທາງ​ແຜນ­ການ​ຮອດ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 8 ຂອງ​ສະ­ພາ​ແຫ່ງ​ຊາດ ຊຸດ​ທີ 8 ຈາກ​ທ່ານ​ນາງ ສີ­ໃສ ລື​ເດດ​ມູນ​ສອນ ຮອງ​ປະ­ທານ​ສະ­ພາ​ແຫ່ງ​ຊາດ.

    ທ່ານ​ນາງ ສີ­ໃສ ລື​ເດດ​ມູນ​ສອນ ໄດ້​ຍົກ​ໃຫ້​ເຫັນ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ຂອງ​ຄະ­ນະ​ປະ­ຈຳ​ສະ­ພາ​ແຫ່ງ​ຊາດ ໃນ​ການ​ຊີ້​ນຳ​ບັນ­ດາ​ກຳ­ມາ​ທິ​ການ ສົມ­ທົບ​ກັບ​ພາກ­ສ່ວນ​ກ່ຽວ­ຂ້ອງ​ໃນ​ການ​ຄົ້ນ­ຄວ້າ​ບັນ­ດາ​ຮ່າງ​ກົດ­ໝາຍ ແລະ ນິ­ຕິ​ກຳ​ລຸ່ມ​ກົດ­ໝາຍ ເຊັ່ນ: ຮ່າງ​ກົດ­ໝາຍ​ວ່າ​ດ້ວຍ​ການ​ຄຸ້ມ​ຄອງ​ອາ­ວຸດ ແລະ ທາດ​ລະ­ເບີດ ຮ່າງ​ກົດ­ໝາຍ​ວ່າ​ດ້ວຍ​ຊາວ​ໜຸ່ມ​ລາວ ຮ່າງ​ກົດ­ໝາຍ​ວ່າ​ດ້ວຍ​ຄວາມ​ສະ­ເໝີ­ພາບ ຍິງ-ຊາຍ ແລະ ຄົ້ນ­ຄວ້າ​ການ​ປັບ­ປຸງ​ນິ­ຕິ​ກຳ​ລຸ່ມ​ກົດ­ໝາຍ ເປັນ​ຮ່າງ​ລັດ​ຖະ​ບັນ­ຍັດ ເຊິ່ງ​ກວມ​ຂົງ­ເຂດ​ຄ່າ​ທຳ­ນຽມ ແລະ ການ​ບໍ­ລິ­ການ ພາ­ສີ​ທີ່​ດິນ ການ​ປະ­ຕິ­ບັດ​ອາ­ກອນ​ມູນ​ຄ່າ​ເພີ່ມ ໃນ​ຂະ­ແໜງ​ບໍ່​ແຮ່ ແລະ ພະ­ລັງ­ງານ​ໄຟ­ຟ້າ ນອກ​ນີ້ ບັນ­ດາ​ສະ­ມາ­ຊິກ​ສະ­ພາ​ແຫ່ງ​ຊາດ ແລະ ສະ­ມາ­ຊິກ​ສະ­ພາ​ປະ­ຊາ­ຊົນ​ແຂວງ ໄດ້​ຮັບ​ການ​ຍົກ​ລະ­ດັບ​ຢ່າງ​ຕໍ່​ເນື່ອງ ເພື່ອ​ສ້າງ​ຄວາມ​ເຂັ້ມ­ແຂງ ທີ່​ພົວ­ພັນ​ກັບ​ການ​ສ້າງ ປັບ­ປຸງ​ກົດ­ໝາຍ ແລະ ນິ­ຕິ​ກຳ​ລຸ່ມ​ກົດ­ໝາຍ ຍຸດ​ທະ​ສາດ​ການ​ພັດ­ທະ­ນາ​ແບບ​ເຊື່ອມ​ໂຍງ​ເສດ­ຖະ­ກິດ ນະ­ໂຍ­ບາຍ​ທີ່​ດິນ ການ​ສົ່ງ­ເສີມ​ທຸ­ລະ​ກິດ​ຂະ­ໜາດ​ໜ້ອຍ ແລະ ກາງ ລວມ​ທັກ​ສະ­ການ​ຕິດ­ຕາມ​ກວດ­ກາ ການ​ຊັກ​ຖາມ ແລະ ການ​ລົງ​ພົບ​ປະ​ກັບ​ຜູ້​ມີ​ສິດ​ເລືອກ​ຕັ້ງ ເພື່ອ​ຮັບ­ປະ­ກັນ​ໃຫ້​ການ­ເຄື່ອນ­ໄຫວ​ວຽກ​ງານ​ປີ 2019 ໄດ້​ຊີ້​ນຳ​ຢ່າງ​ໃກ້­ຊິດ​ຕໍ່​ຄະ­ນະ​ສະ­ມາ­ຊິກ​ສະ­ພາ​ແຫ່ງ​ຊາດ ປະ­ຈຳ​ເຂດ​ເລືອກ​ຕັ້ງ​ໃຫ້​ເອົາ­ໃຈ­ໃສ່​ປະ­ຕິ­ບັດ​ພາ­ລະ​ບົດ­ບາດ​ຂອງ​ຕົນ 6 ເດືອນ​ຜ່ານ​ມາ 10 ແຂວງ ໄດ້​ອອກ​ນິ­ຕິ​ກຳ​ລຸ່ມ​ກົດ­ໝາຍ ເພື່ອ​ຄຸ້ມ​ຄອງ​ລັດ-ຄຸ້ມ​ຄອງ​ເສດ­ຖະ­ກິດ-ສັງ­ຄົມ​ຂອງ​ທ້ອງ­ຖິ່ນ 15 ສະ­ບັບ ປັບ­ປຸງ​ບຸ​ຄະ­ລາ​ກອນ​ຈຳ­ນວນ​ໜຶ່ງ ຕາມ​ຄວາມ​ຕ້ອງ­ການ​ຂອງ​ໜ້າ­ທີ່​ການ­ເມືອງ ທັງ​ກະ­ກຽມ​ເງື່ອນ­ໄຂ​ໃຫ້­ການ​ປະ­ຕິ­ບັດ​ພາ­ລະ​ບົດ­ບາດ​ຂອງ​ສະ­ພາ​ແຫ່ງ​ຊາດ ຊຸດ​ທີ IX ແລະ ສະ­ພາ​ປະ­ຊາ­ຊົນ​ແຂວງ ຊຸດ​ທີ II ໃຫ້​ມີ​ຜົນ­ສຳ­ເລັດ​ສູງ.

    ນອກ​ນີ້ ທ່ານ​ນາງ ແສງ​ເດືອນ ຫຼ້າ​ຈັນ­ທະ​ບູນ ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ ກໍ​ຂຶ້ນ​ຜ່ານ​ຮ່າງ​ກົດ­ໝາຍ​ວ່າ​ດ້ວຍ​ອາ­ຊີ­ວະ​ສຶກ​ສາ ສະ­ບັບ​ປັບ­ປຸງ ເຊິ່ງ​ກົດ­ໝາຍ​ດັ່ງ­ກ່າວ​ໄດ້​ຖືກ​ຮັບ­ຮອງ​ໃນ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 7 ຂອງ​ສະ­ພາ​ແຫ່ງ​ຊາດ ຊຸດ​ທີ VIII ກົດ­ໝາຍ​ວ່າ​ດ້ວຍ​ອາ­ຊີ­ວະ​ສຶກ​ສາ ໄດ້​ປະ­ກາດ​ໃຊ້​ປີ 2014 ຜ່ານ​ການ­ຈັດ­ຕັ້ງ​ປະ­ຕິ­ບັດ ຍັງ​ມີ​ບາງ​ເນື້ອ​ໃນ​ຊ້ຳ​ຊ້ອນ​ກັບ​ກົດ­ໝາຍ​ວ່າ​ດ້ວຍ​ແຮງ​ງານ ແລະ ບໍ່​ທັງ​ສອດ­ຄ່ອງ ເພື່ອ​ແກ້​ໄຂ​ບັນ­ຫາ ແນ­ໃສ່​ໃຫ້​ມີ​ເນື້ອ​ໃນ​ລະ­ອຽດ ຊັດ​ເຈນ ແລະ ສອດ­ຄ່ອງ​ກັບ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ໃນ​ໄລ­ຍະ​ໃໝ່ ແນ­ໃສ່​ດຶງ​ດູດ​ເອົາ​ການ​ລົງ­ທຶນ​ພາຍ​ໃນ ແລະ ຕ່າງ­ປະ­ເທດ ເຂົ້າ​ໃສ່​ວຽກ​ງານ​ອາ­ຊີ­ວະ​ສຶກ​ສາ​ໃຫ້​ຫຼາຍ​ຂຶ້ນ ເພື່ອ​ສົ່ງ­ເສີມ​ການ​ຮ່ວມ​ມື​ລະ­ຫວ່າງ​ພາກ​ລັດ ແລະ ພາກ​ທຸ­ລະ​ກິດ ໃນ​ວຽກ​ງານ​ອາ­ຊີ­ວະ​ສຶກ​ສາ​ໃຫ້​ແໜ້ນ​ແຟ້ນ ແລະ ກວ້າງ­ຂວາງ​ຂຶ້ນ ຮ່າງ​ກົດ­ໝາຍ​ວ່າ​ດ້ວຍ​ອາ­ຊີ­ວະ​ສຶກ​ສາ​ສະ­ບັບ​ປັບ­ປຸງ ປະ­ກອບ​ມີ 14 ພາກ 17 ໝວດ 98 ມາດ­ຕາ ສົມ​ທຽບ­ໃສ່​ສະ­ບັບ​ປັດ­ຈຸ­ບັນ ໄດ້​ຕື່ມ 1 ພາກ 1 ໝວດ ຫຼຸດ 9 ມາດ­ຕາ ໂດຍ​ເອົາ​ເນື້ອ​ໃນ​ໄປ​ສັບ​ຊ້ອນ​ເຂົ້າ​ມາດ­ຕາ​ອື່ນ ໃນ​ນີ້ ໄດ້​ປັບ­ປຸງ​ເນື້ອ​ໃນ 70 ມາດ­ຕາ ຮັກ­ສາ​ໄວ້ 22 ມາດ­ຕາ ແລະ ເພີ່ມ​ເຂົ້າ​ໃໝ່ 6 ມາດ­ຕາ.

    ຜ່ານ​ການ​ປະ­ກອບ​ຄຳ​ເຫັນ​ຢ່າງ​ກົງ​ໄປ​ກົງ​ມາ​ຂອງ​ສະ­ມາ­ຊິກ​ສະ­ພາ​ແຫ່ງ​ຊາດ ໄດ້​ເຫັນ​ດີ​ເປັນ​ເອ­ກະ​ພາບ​ຮັບ­ຮອງ​ເອົາ​ຮ່າງ​ກົດ­ໝາຍ​ວ່າ​ດ້ວຍ​ອາ­ຊີ­ວະ​ສຶກ​ສາ ສະ­ບັບ​ປັບ­ປຸງ ດ້ວຍ​ຄະ­ແນນ​ສຽງ​ສ່ວນ​ຫຼາຍ.

ຂ່າວທີ່ກ່ຽວຂ້ອງ