ຂ່າວຫຼ້າສຸດ

ໄທ ຫວັງເປັນສູນກາງດ້ານອຸດສາຫະກຳ ການຈັດກອງປະຊຸມ-ທ່ອງທ່ຽວ

862 13 ມິ.ຖ. 2019 ຂ່າວໜ້າ​ໜຶ່ງ
ໄທ ຫວັງເປັນສູນກາງດ້ານອຸດສາຫະກຳ ການຈັດກອງປະຊຸມ-ທ່ອງທ່ຽວ

    ສຳ­ນັກ­ງານ​ສົ່ງ­ເສີມ​ການ​ຈັດ​ປະ­ຊຸມ ແລະ ນິ​ທັດ​ສະ­ການ (ອົງ­ການ​ມະ­ຫາ­ຊົນ) ປະ­ເທດ​ໄທ (TCEB) ຮ່ວມ​ກັບ​ສາຍ​ການ­ບິນ Bangkok Airways ເຊີນ​ບັນ­ດາ​ສື່​ມວນ​ຊົນ​ປະ­ເທດ​ລຸ່ມ​ແມ່­ນ້ຳ​ຂອງ (ກຳ­ປູ­ເຈຍ ລາວ ມຽນ​ມາ ແລະ ຫວຽດ­ນາມ) ເຂົ້າ​ຮ່ວມ​ສຳ​ມະ​ນາ​ຫົວ­ຂໍ້ “ການ​ບໍ­ລິ­ການ​ດ້ານ​ອຸດ­ສາ­ຫະ­ກຳ​ປະ­ຊຸມ​ໃນ​ປະ­ເທດ” ວັນ​ທີ 10-14 ຢູ່​ປະ­ເທດ​ໄທ ໂດຍ​ເປັນ​ປະ­ທານ​ຂອງ​ທ່ານ​ນາງ ນິ​ຊາ​ປາ ຢົດ​ສະ​ວີ ຮອງ​ປະ­ທານ​ສະ­ພາ​ບໍ­ລິ­ຫານ TCEB ມີ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ເພື່ອ​ເປັນ​ການ​ປະ­ຊາ­ສຳ­ພັນ ແລະ ໂຄ­ສະ­ນາ​ການ​ຈັດ​ກອງ​ປະ­ຊຸມ ຄຽງ​ຄູ່​ກັບ​ການ­ທ່ອງ­ທ່ຽວ​ຂອງ​ປະ­ເທດ​ໄທ ເວົ້າ​ສະ­ເພາະ ຢູ່​ບາງ­ກອກ ແລະ ພັດ​ທະ​ຍາ ໃຫ້​ບັນ­ດາ​ສື່​ມວນ​ຊົນ​ປະ­ເທດ​ລຸ່ມ​ແມ່­ນ້ຳ​ຂອງ​ໄດ້​ຮັບ​ຮູ້ ແລະ ເຂົ້າ­ໃຈ ເພື່ອ​ນຳ­ໄປ​ເຜີຍ­ແຜ່​ຂໍ້​ມູນ​ຂ່າວ­ສານ​ກ່ຽວ​ກັບ​ຄວາມ​ສາ­ມາດ​ຂອງ​ປະ­ເທດ​ໄທ ໃນ​ການ​ຈັດ​ກອງ​ປະ­ຊຸມ​ລະ­ດັບ​ພາກ​ພື້ນ ແລະ ສາ­ກົນ ປັດ­ຈຸ­ບັນ​ໄທ​ສາ­ມາດ​ຈັດ​ປະ­ຊຸມ​ລະ­ດັບ​ກາງ​ຫາ​ສູງ ເຊິ່ງ​ຮອງ​ຮັບ­ແຂກ​ເຂົ້າ​ຮ່ວມ​ໄດ້ 500-2.000 ຄົນ ພ້ອມ​ນີ້ ປະ­ເທດ​ໄທ​ຍັງ​ມີ​ຄວາມ​ສະ­ດວກ​ຫຼາຍ​ດ້ານ​ເຊັ່ນ: ການ​ເດີນ­ທາງ ທີ່​ພັກ ອາ­ຫານ ແຫຼ່ງ​ຊື້​ສິນ­ຄ້າ ສະ­ຖານ­ທີ່​ທ່ອງ​ທ່ຽວ ແລະ ອື່ນໆ ເຊິ່ງ​ເປັນ​ເງື່ອນ­ໄຂ​ທີ່​ດີ​ໃຫ້​ຜູ້​ທີ່​ເດີນ­ທາງ​ເຂົ້າ​ມາ​ຮ່ວມ​ປະ­ຊຸມ​ແລ້ວ​ທ່ອງ​ທ່ຽວ​ໄປ​ພ້ອມໆ​ກັນ.

    TCEB ເປັນ​ໜ່ວຍ​ງານ​ລັດ­ຖະ­ບານ​ໄທ ທີ່​ຈັດ​ຕັ້ງ​ຂຶ້ນ​ເພື່ອ​ສົ່ງ­ເສີມ​ການ​ຈັດ​ກອງ​ປະ­ຊຸມ (MICE) ເພື່ອ​ອຳ­ນວຍ​ຄວາມ​ສະ­ດວກ ແລະ ພັດ­ທະ­ນາ​ມາດ­ຕະ­ຖານ​ການ​ຈັດ​ງານ​ໃຫ້​ສອດ­ຄ່ອງ​ກັບ​ບົດ­ບາດ​ຂອງ​ປະ­ເທດ​ໄທ ທີ່​ມີ​ຄວາມ​ສຳ­ຄັນ​ຫຼາຍ​ຂຶ້ນ ໃນ​ຖາ­ນະ​ທີ່​ເປັນ​ປະ­ເທດ​ທີ່​ສາ­ມາດ​ຈັດ​ປະ­ຊຸມ​ລະ­ດັບ​ພາກ​ພື້ນ​ໄດ້​ຢ່າງ​ມີ​ປະ​ສິດ­ທິ​ຜົນ ແລະ ມີ​ຄວາມ​ມຸ່ງ​ຫວັງ​ທີ່​ຈະ​ໃຫ້​ເປັນ​ປະ­ເທດ ເປັນ​ສູນ​ກາງ​ຈັດ​ກອງ​ປະ­ຊຸມ-ການ­ທ່ອງ­ທ່ຽວ ແລະ ການ​ຈັດ​ນິ​ທັດ​ສະ­ການ​ລະ­ດັບ​ໂລກ​ຢູ່​ພາກ​ພື້ນ​ອາ­ຊີ ເພື່ອ​ຜົນ​ປະ­ໂຫຍດ​ໃນ​ການ​ເພີ່ມ​ລາຍ​ໄດ້​ເຂົ້າ​ປະ­ເທດ ແລະ ສ້າງ​ປະ​ສິດ­ທິ​ຜົນ​ໃນ​ອຸດ­ສາ­ຫະ­ກຳ​ຈັດ​ກອງ​ປະ­ຊຸມ MICE ໃຫ້​ສາ­ມາດ​ແຂ່ງ­ຂັນ​ໃນ​ຕະ­ຫຼາດ​ໂລກ.

ຂ່າວທີ່ກ່ຽວຂ້ອງ