ຂ່າວຫຼ້າສຸດ

ເຊີນເຂົ້າຮ່ວມງານວາງສະແດງເຄື່ອງເຮືອນລາວ 6-14 ກໍລະກົດນີ້

419 13 ມິ.ຖ. 2019 ຂ່າວໜ້າ​ໜຶ່ງ
ເຊີນເຂົ້າຮ່ວມງານວາງສະແດງເຄື່ອງເຮືອນລາວ 6-14 ກໍລະກົດນີ້

    ສະ­ມາ­ຄົມ​ເຟີ​ນີ​ເຈີ​ລາວ (ສຟລ) ຮ່ວມ​ກັບ​ກົມ​ສົ່ງ­ເສີມ​ການ​ຄ້າ ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ ແລະ ສູນ​ການ​ຄ້າ​ລາວ-ໄອ​ເຕັກ ຈັດ​ພິ­ທີ​ຖະ­ແຫຼງ​ຂ່າວ​ງານ​ວາງ­ສະ­ແດງ​ເຄື່ອງ​ເຮືອນ​ລາວ ຄັ້ງ​ທີ 4 ຂຶ້ນ​ວັນ​ທີ 11 ມິ­ຖຸ­ນາ 2019 ຢູ່​ສະ­ພາ​ການ​ຄ້າ ແລະ ອຸດ​ສະ­ຫະ​ກຳ​ແຫ່ງ​ຊາດ​ລາວ ໂດຍ​ມີ​ທ່ານ ຈັນ​ສະ­ໝອນ ສີ​ສະ­ອາດ ຮອງ​ຫົວ­ໜ້າ​ກົມ​ສົ່ງ­ເສີມ​ການ​ຄ້າ ທ່ານ ດາວ​ວອນ ພະ­ຈັນ​ທະ​ວົງ ຮອງ​ປະ­ທານ​ສະ­ພາ​ການ​ຄ້າ ແລະ ອຸດ​ສະ­ຫະ​ກຳ​ແຫ່ງ​ຊາດ​ລາວ ທ່ານ ກອງ​ມາ­ລາ ພົມ­ມາ​ໄລ ຮອງ​ປະ­ທານ ສຟລ ປະ­ທານ​ບໍ­ລິ­ສັດ ເຄ​ແອນ​ບີ​ເຟີ​ນີ​ເຈີ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ກອງ​ມາ­ລາ ພົມ­ມາ​ໄລ ກ່າວ​ວ່າ: ງານ​ວາງ­ສະ­ແດງ​ຄັ້ງ​ນີ້ ຈະ​ຈັດ​ຂຶ້ນ​ວັນ​ທີ 6-14 ກໍ­ລະ­ກົດ ຢູ່​ສູນ​ການ​ຄ້າ​ລາວ-ໄອ​ເຕັກ ໂດຍ​ມີ​ຈຸດ­ປະ­ສົງ ເພື່ອ​ອະ­ນຸ​ຮັກ​ຮັກ­ສາ​ປ່າ­ໄມ້ ນຳ​ໃຊ້​ໄມ້​ໃຫ້​ເກີດ​ປະ­ໂຫຍດ​ສູງ​ສຸດ ແລະ ມີ​ໄມ້​ໄວ້​ໃຊ້​ຢ່າງ​ຍືນ​ຍົງ ໂດຍ​ການ​ປຸງ​ແຕ່ງ​ໃຫ້​ເປັນ​ຜະ­ລິດ​ຕະ​ພັນ​ສຳ­ເລັດ​ຮູບ​ຈາກ​ໄມ້​ຫວາຍ ແລະ ໄມ້­ປ່ອງ ໃຫ້​ມີ​ຫຼາຍ​ຜະ­ລິດ​ຕະ​ພັນ​ຕາມ​ທີ່​ສັງ­ຄົມ​ຕ້ອງ­ການ ດ້ວຍ​ການ​ນຳ​ໃຊ້​ເຕັກ​ໂນ​ໂລ​ຊີ​ທີ່​ທັນ​ສະ­ໄໝ ສ້າງ​ມູນ​ຄ່າ​ເພີ່ມ​ໃຫ້​ກັບ​ຜະ­ລິດ​ຕະ​ພັນ​ເຟີ​ນີ​ເຈີ​ໄມ້​ລາວ ກາຍ­ເປັນ​ສິນ­ຄ້າ​ທີ່​ມີ​ຄຸນ​ນະ​ພາບ ລາ­ຄາ​ສູງ​ຖືກ​ຕາມ​ຄວາມ​ຕ້ອງ­ການ​ຂອງ​ລູກ​ຄ້າ ແລະ ສາ­ມາດ​ສົ່ງ​ອອກ​ຕ່າງ­ປະ­ເທດ​ໄດ້ ທັງ​ເປັນ​ການ​ສ້າງ​ວຽກ​ເຮັດ​ງານ​ທຳ​ໃຫ້​ປະ­ຊາ­ຊົນ ແລະ ຊ່ວຍ​ໃຫ້​ຫຼຸດ​ພົ້ນ​ອອກ​ຈາກ​ຄວາມ­ທຸກ​ຍາກ ນອກ​ນີ້​ຍັງ​ເປັນ​ການ​ສົ່ງ­ເສີມ​ການ​ປູກ​ໄມ້ ຫັນ​ມາ​ໃຊ້​ໄມ້​ປູກ​ທົດ​ໄມ້​ທຳ​ມະ​ຊາດ ແລະ ເພື່ອ​ຜັນ​ຂະ­ຫຍາຍ​ແຈ້ງ​ການ ເລກ​ທີ 15/ນຍ ໃຫ້​ປາ­ກົດ​ຜົນ​ເປັນ​ຈິງ ແລະ ສ້າງ​ຄວາມ​ເຂັ້ມ­ແຂງ​ໃຫ້ ສຟລ ສົ່ງ­ເສີມ​ການ​ຈັດ​ງານ​ວາງ­ສະ­ແດງ​ສິນ­ຄ້າ​ເຟີ​ນີ​ເຈີ​ໃຫ້​ມີ​ຄວາມ​ໂດດ​ເດັ່ນ ແລະ ດຶງ​ດູດ​ເອົາ​ລູກ​ຄ້າ​ເຂົ້າ​ມາ​ຊື້-ຂາຍ​ສິນ­ຄ້າ​ເຟີ​ນີ​ເຈີ​ລາວ ໃຫ້​ຫຼາຍ​ຂຶ້ນ.

    ສຳ­ລັບ​ສິນ­ຄ້າ​ທີ່​ເຂົ້າ​ຮ່ວມ​ງານ​ຄັ້ງ​ນີ້ ປະ­ກອບ​ມີ​ຜະ­ລິດ​ຕະ​ພັນ​ເຟີ​ນີ​ເຈີ​ທີ່​ຜະ­ລິດ​ດ້ວຍ​ໄມ້​ຫວາຍ ໄມ້­ປ່ອງ ແລະ ວັດ​ສະ​ດຸ​ເສດ​ເຫຼືອ​ຕ່າງໆ ທີ່​ເຮັດ​ເປັນ​ເຄື່ອງ​ເຟີ​ນີ​ເຈີ ຜະ­ລິດ​ຕະ​ພັນ​ຫັດ­ຖະ­ກຳ ເຄື່ອງ​ແກະ­ສະ­ຫຼັກ​ຕ່າງໆ ເຄື່ອງ​ປະ­ດັບ​ຕົບ­ແຕ່ງ​ພາຍ​ໃນ​ເຮືອນ ອຸ­ປະ­ກອນ​ປະ­ກອບ​ຮັບ​ໃຊ້ ເຄື່ອງ­ມື ເຄື່ອງ​ຈັກ​ຕ່າງໆ​ທີ່​ກ່ຽວ​ກັບ​ຜະ­ລິດ​ເຟີ​ນີ​ເຈີ​ໄມ້ ເຄື່ອງ­ຮັບ​ໃຊ້​ວຽກ​ງານ​ກໍ່­ສ້າງ ເຄື່ອງ­ໃຊ້​ໄຟ­ຟ້າ​ທົ່ວ​ໄປ ອາ­ຫານ ແລະ ຢາ ເຊິ່ງ​ມີ​ຫ້ອງ​ວາງ­ສະ­ແດງ 191 ຫ້ອງ (ສຳ­ລັບ​ສະ­ມາ­ຊິກ​ສະ­ມາ­ຄົມ) ແລະ 20 ຫ້ອງ ສຳ­ລັບ​ຫົວ­ໜ່ວຍ​ທຸ­ລະ​ກິດ​ໂອ​ດ໊ອບ ປັດ­ຈຸ­ບັນ​ມີ​ຜູ້​ມາ​ຈັບ­ຈອງ​ຫ້ອງ​ແລ້ວ 67% ມີ 47 ຫົວ­ໜ່ວຍ ມາ​ຈາກ​ຕ່າງ​ແຂວງ 18 ຫົວ­ໜ່ວຍ.

ຂ່າວທີ່ກ່ຽວຂ້ອງ