ພາຍຸ​ຄັ້ງ​ໃຫຍ່ ຈະພັດ​ຂຶ້ນ​ຝັ່ງ​ພາກ​ຕາ​ເວັນ​ຕົກ​ຂອງ​ອິນ​ເດຍ

404 13 ມິ.ຖ. 2019 ຂ່າວຕ່າງປະເທດ
ພາຍຸ​ຄັ້ງ​ໃຫຍ່ ຈະພັດ​ຂຶ້ນ​ຝັ່ງ​ພາກ​ຕາ​ເວັນ​ຕົກ​ຂອງ​ອິນ​ເດຍ

    ເຈົ້າ​ໜ້າທີ່​ອິນ​ເດຍ ແຈ້ງ​ໃຫ້​ຮູ້ເມື່ອ ວັນ​ທີ 11 ມິຖຸນາ​ນີ້​ວ່າ ໄດ້​ກະກຽມ​ການ​ອົບ​ພະ​ຍົບ​ປະຊາຊົນ 300.000 ຄົນ​ທີ່​ອາ​ໃສ​ຢູ່​ໃນ​ເຂດ​ແຄມ​ຝັ່ງ​ທະເລ​ທິດຕາເວັນຕົກ​ຂອງ​ປະເທດ​ນີ້ ທ່າມກາງ​ຄວາມ​ສ່ຽງ​ທີ່​ພາຍຸ​ຈະ​ພັດ​ຂຶ້ນ​ຝັ່ງ​ໃນ​ລັດ ກຸ​ຈະ​ຣາດ ໃນ​ວັນ​ທີ 13 ມິຖຸນາ.

    ອົງການ​ອຸຕຸນິຍົມ​ຂອງ​ອິນ​ເດຍ ແຈ້ງ​ໃຫ້​ຮູ້​ຢູ່​ໃນ​ແຈ້ງ​ການ​ສະບັບ​ໜຶ່ງ​ວ່າ ພາຍຸ ວາ​ຢູ  (Vayu) ທີ່​ກໍ່​ຕົວ​ຢູ່​ໃນ​ເຂດ​ທະເລ​ອາ​ຣັບ ນັ້ນ​ມີ​ຄວາມ​ເປັນ​ໄປ​ໄດ້​ຫຼາຍ ທີ່​ຈະ​ພັດ​ເຂົ້າ​ໄປ​ໃນ​ເຂດ​ແຄມ​ຝັ່ງ​ທະເລ​ລັດ​ກຸ​ຈະ​ຣາດ ດ້ວຍ​ຄວາມ​ແຮງ​ລົມ​ສູງ​ເຖິງ 135 ​ກມ/ຊົ່ວໂມງ.

    ຕໍ່​ສະພາບ​ການ​ຄື​ດັ່ງກ່າວ ລັດຖະບານ​ອິນ​ເດຍ ໄດ້​ຂຶ້ນ​ແຜນການ​ເລີ່ມ​ອົບ​ພະ​ຍົບ​ປະຊາຊົນ ປະມານ 300.000 ຄົນ ອອກ​ໄປ​ຈາກ​ເຂດ​ທີ່​ຮັບ​ຜົນ​ກະທົບ​ໄດ້​ງ່າຍ​ຈາກ​ພາຍຸ ໄປ​ຍັງ​ເຂດ​ທີ່​ມີ​ຄວາມ​ໄພ ໂດຍ​ທີ່​ການ​ອົບ​ພະ​ຍົບ​ປະຊາຊົນ​ນີ້ ຈະ​ເລີ່ມ​ມີ​ຂຶ້ນ​ໃນ​ວັນ​ທີ 12 ມິຖຸນາ.

    ຢ້ອນ​ຄືນ​ຫຼັງ ເມື່ອ​ເດືອນ​ພຶດສະພາ​ທີ່​ຜ່ານ​ມາ ພາຍຸ ຟາ​ນີ ທີ່​ພັດ​ຂຶ້ນ​ຝັ່ງ​ໃນ​ເຂດ​ແຄມ​ຝັ່ງ​ທະເລ​ທິດຕາເວັນອອກ​ຂອງ​ອິນ​ໄດ້ ໄດ້​ສົ່ງ​ຜົນ​ໃຫ້​ມີ​ຜູ້​ເສຍ​ຊີວິດ​ຢ່າງ​ໜ້ອຍ 34 ຄົນ ແລະ ທຳລາຍ​ເຮືອນ​ຊານ​ຂອງ​ປະຊາຊົນ ເປັນ​ຈຳນວນ​ຫຼາຍ. ໃນ​ຂະນະ​ດຽວ​ກັນ ເມື່ອ​ກ່ອນ​ໜ້າ​ນີ້ 20 ປີ ພາຍຸ​ຮ້າຍ​ແຮງ​ຫົວ​ໜຶ່ງ ໄດ້​ພັດ​ເຂົ້າ​ແຄມ​ຝັ່ງ​ທະເລ​ໃນ​ລັດ ໂອ​ດິ​ສາ ແກ່ຍາວ​ເປັນ​ເວລາ 30 ຊົ່ວໂມງ ໄດ້​ເຮັດ​ໃຫ້​ມີ​ຜູ້​ເສຍ​ຊີວິດ 10.000 ຄົນ.

ຂ່າວທີ່ກ່ຽວຂ້ອງ