ຂ່າວຫຼ້າສຸດ

ລາວ ສາມາດເຊື່ອມສານ ແລະ ສັງລວມໄດ້ຕົວຊີ້ບອກ ປພຍ 238 ຕົວຊີ້ບອກ

858 12 ມິ.ຖ. 2019 ຂ່າວໜ້າ​ໜຶ່ງ

    ກອງ​ປະ­ຊຸມ​ຄະ­ນະ​ຊີ້​ນຳ​ລະ­ດັບ​ຊາດ ເພື່ອ​ທົບ​ທວນ­ຄືນ​ການ­ຈັດ­ຕັ້ງ​ປະ­ຕິ­ບັດ​ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ (ປພຍ) ຢູ່ ສປປ ລາວ ຈັດ​ຂຶ້ນ​ວັນ​ທີ 11 ມິ­ຖຸ­ນາ 2019 ສູນ​ຮ່ວມ​ມື​ສາ­ກົນ ແລະ ການ​ເຝິກ­ອົບ­ຮົມ (ICTC) ໂດຍ​ເປັນ​ປະ­ທານ​ຂອງ​ທ່ານ ສະ­ເຫຼີມ​ໄຊ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ມີ​ບັນ­ດາ​ລັດ­ຖະ­ມົນ­ຕີ ຮອງ​ລັດ­ຖະ­ມົນ­ຕີ ບັນ­ດາ​ກົມ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ສະ­ເຫຼີມ​ໄຊ ກົມ​ມະ​ສິດ ກ່າວ​ວ່າ: ເພື່ອ​ສະ­ຫຼຸບ​ຕີ​ລາ­ຄາ​ຄືນ ພ້ອມ​ທັງ​ຖອດ​ຖອນ​ບົດ­ຮຽນ​ຈາກ​ການ­ຈັດ­ຕັ້ງ​ປະ­ຕິ­ບັດ​ໃນ​ໄລ­ຍະ​ຜ່ານ​ມາ ແລະ ເພື່ອ​ປະ­ກອບ​ຄຳ​ເຫັນ​ຮັບ­ຮອງ​ເອົາ​ແຜນ​ປະ­ຕິ­ບັດ​ງານ​ແຫ່ງ​ຊາດ ເພື່ອ​ຈັດ​ຕັ້ງ​ປະ­ຕິ­ບັດ​ວາ­ລະ​ປີ 2030 ເພື່ອ​ການ​ພັດ­ທະ­ນາ​ແບບ​ຍືນ​ຍົງ ທີ່​ເປັນ​ເອ­ກະ­ສານ​ພື້ນ­ຖານ​ການ­ຈັດ­ຕັ້ງ​ປະ­ຕິ­ບັດ ປພຍ ຢູ່​ລາວ ເຊິ່ງ​ແຜນ​ດັ່ງ­ກ່າວ​ໄດ້​ກວມ​ເອົາ​ແຜນ​ດຳ­ເນີນ​ງານ​ແຫ່ງ​ຊາດ​ເພື່ອ​ການ​ສື່­ສານ ໂຄ­ສະ­ນາ ແລະ ເຜີຍ­ແຜ່ ປພຍ ພ້ອມ​ນີ້ ກໍ​ຈະ​ໄດ້​ຮັບ­ຮອງ​ເອົາ​ກາ​ສັນ­ຍະ­ລັກ ປພຍ ແຫ່ງ​ຊາດ ແລະ ການ​ແປ​ຄຳ​ຂວັນ ປພຍ ຈາກ​ພາ­ສາ​ອັງ­ກິດ Leaving no one behind ແປ​ເປັນ​ພາ­ສາ​ລາວ ບໍ່​ປະ­ປ່ອຍ​ຜູ້​ໃດ​ໄວ້​ທາງ​ຫຼັງ.

    ກອງ​ປະ­ຊຸມ​ຄັ້ງ​ນີ້ ຍັງ​ໄດ້​ຮັບ​ຟັງ​ການ​ລາຍ​ງານ​ຂອງ​ກອງ​ເລ­ຂາ ປພຍ ກ່ຽວ​ກັບ​ຜົນ­ສຳ­ເລັດ ຄວາມ​ຄືບ​ໜ້າ ຂໍ້​ຫຍຸ້ງ­ຍາກ ແລະ ສິ່ງ​ທ້າ​ທາຍ​ຂອງ​ການ​ປະ­ຕິ­ບັດ​ວຽກ​ງານ ສົກ​ປີ 2018-2019 ໃນ​ປີ­ຜ່ານ­ມາ​ໄດ້​ເອົາ­ໃຈ­ໃສ່​ເຮັດ​ວຽກ​ຢ່າງ​ໃກ້­ຊິດ ກັບ​ຂະ­ແໜງ­ການ​ກ່ຽວ­ຂ້ອງ​ຂອງ​ລັດ ໃນ​ການ​ສືບ­ຕໍ່​ເຊື່ອມ​ສານ​ບັນ­ດາ​ເປົ້າ​ໝາຍ ແລະ ຕົວ​ຊີ້​ບອກ ປພຍ ໃຫ້​ສອດ­ຄ່ອງ ແລະ ແທດ­ເໝາະ​ກັບ​ວຽກ​ແຕ່​ລະ​ຂະ­ແໜງ ໃຫ້​ໄປ​ຄຽງ​ຄູ່​ກັບ​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ 5 ປີ ຄັ້ງ​ທີ 8 ຍຸດ​ທະ​ສາດ​ປີ 2025 ແລະ ວິ­ໄສ​ທັດ 2030 ແນ­ໃສ່​ໃຫ້​ບັນ­ລຸ​ເປົ້າ​ໝາຍ​ອັນ​ດຽວ​ກັນ ປັດ­ຈຸ­ບັນ ລາວ​ສາ­ມາດ​ເຊື່ອມ​ສານ ແລະ ສັງ​ລວມ​ໄດ້​ຕົວ​ຊີ້​ບອກ ປພຍ 238 ຕົວ​ຊີ້​ບອກ ໃນ​ນີ້ 60% ໄດ້​ເຊື່ອມ​ສານ​ເຂົ້າ​ໃນ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ 5 ປີ ຄັ້ງ​ທີ 8 ແລ້ວ.

ຂ່າວທີ່ກ່ຽວຂ້ອງ