ຂ່າວຫຼ້າສຸດ

ບັນຫາສໍ້ລາດບັງຫຼວງ

1.055 12 ມິ.ຖ. 2019 ນານາສາລະ

    ຫາກ​ເພື່ອນ​ຜູ້​ອ່ານ​ຕິດ­ຕາມ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 7 ຂອງ​ສະ­ພາ​ແຫ່ງ​ຊາດ ຊຸດ​ທີ VIII ທີ່​ພວມ​ດຳ­ເນີນ​ຢູ່​ຈະ​ເຫັນ​ວ່າ​ລັດ­ຖະ­ບານ ໂດຍ​ແມ່ນ​ອົງ­ການ​ກວດ­ກາ​ລັດ­ຖະ­ບານ ໄດ້​ຖື​ສຳ­ຄັນ​ວຽກ​ງານ​ກວດ­ກາ-ຕ້ານ​ການ​ສໍ້​ລາດ​ບັງ​ຫຼວງ​ຢ່າງ​ເປັນ​ປະ­ຈຳ ແລະ ເປັນ​ປົກ­ກະ­ຕິ.

    ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ແຫ່ງ ສປປ ລາວ ໄດ້​ຕອບ​ຄຳ​ຊັກ​ຖາມ​ຂອງ​ສະ­ມາ­ຊິກ​ສະ­ພາ​ແຫ່ງ​ຊາດ​ຫຼາຍໆ​ບັນ­ຫາ ໃນ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 7 ສະ­ພາ​ແຫ່ງ​ຊາດ ຊຸດ​ທີ VIII ພ້ອມ​ຍົກ​ໃຫ້​ເຫັນ​ບັນ­ຫາ​ສໍ້​ລາດ​ບັງ​ຫຼວງ ໂດຍ​ທ່ານ​ນາ­ຍົກ­ລັດ­ຖະ­ມົນ­ຕີ​ໄດ້​ກ່າວ​ວ່າ ໃນ​ປີ 2018 ຜ່ານ​ມາ ອົງ­ການ​ກວດ­ກາ​ລັດ­ຖະ­ບານ ໄດ້​ດຳ­ເນີນ​ການ​ຕິດ­ຕາມ​ກວດ­ກາ​ສະ­ເພາະ 1.213 ເປົ້າ​ໝາຍ ກວດ­ກາ​ປົກ­ກະ­ຕິ 408 ເປົ້າ​ໝາຍ ກວດ­ກາ​ຕາມ​ຄຳ​ສັ່ງ 129 ເປົ້າ​ໝາຍ​ກວດ­ກາ​ຕາມ​ຜົນ​ຂອງ​ການ​ກວດ​ສອບ 545 ເປົ້າ​ໝາຍ ກວດ­ກາ​ການ​ລົງ­ທຶນ​ຂອງ​ລັດ 131 ເປົ້າ​ໝາຍ​ພົບ​ເຫັນ​ຜົນ​ເສຍ​ຫາຍ​ທັງ​ໝົດ 999 ຕື້​ກີບ 67 ລ້ານ​ກວ່າ​ໂດ​ລາ ເກັບ​ກູ້​ຄືນ​ມາ​ໄດ້ 26,5 ຕື້​ກີບ 17 ລ້ານ​ໂດ​ລາ.

    ຜ່ານ​ການ​ຕິດ­ຕາມ​ກວດ­ກາ​ພົບ​ເຫັນ​ຜູ້​ມີ​ພຶດ­ຕິ​ກຳ​ສໍ້​ລາດ​ບັງ​ຫຼວງ​ທັງ​ໝົດ 1.285 ລາຍ ໃນ​ນັ້ນ ມີ​ພະ­ນັກ­ງານ​ລັດ​ທັງ​ໝົດ 970 ລາຍ ຜູ້​ປະ­ກອບ​ການ 315 ລາຍ ກຳ­ລັງ​ດຳ­ເນີນ​ມາດ​ຕະ­ການ​ຕາມ​ລະ­ບຽບ​ກົດ­ໝາຍ​ຕໍ່​ໄປ ພະ­ນັກ­ງານ​ລັດ​ຖືກ​ລົງ​ວິ­ໄນ​ແລ້ວ 849 ລາຍ ດຳ­ເນີນ​ການ​ສືບ­ສວນ​ສອບ​ສວນ 153 ຄົນ ສະ­ຫຼຸບ​ສຳ­ນວນ​ຄະ­ດີ​ສົ່ງ​ໄອ​ຍະ​ການ​ແລ້ວ 133 ຄົນ ຕັດ­ສິນ​ລົງ­ໂທດ​ແລ້ວ 55 ຄົນ.

    ສ່ວນ​ຄະ­ນະ​ກວດ­ກາ​ສູນ​ກາງ​ພັກ​ກໍ​ໄດ້​ແຈ້ງ​ໃຫ້​ຊາບ​ວ່າ: ໃນ​ປີ 2018 ຜ່ານ​ມາ ຄະ­ນະ​ພັກ​ສະ­ມາ­ຊິກ​ພັກ​ຈຳ­ນວນ​ໜຶ່ງ ເສື່ອມ​ຖອຍ​ດ້ານ​ຄຸນ​ທາດ​ການ­ເມືອງ ຄຸນ­ສົມ­ບັດ ສິນ​ທຳ​ປະ­ຕິ­ວັດ ແລະ ແບບ­ແຜນ​ດຳ­ລົງ​ຊີ­ວິດ ຂາດ​ຄວາມ​ເປັນ​ແບບ­ຢ່າງ​ທີ່​ດີ ເກີດ​ມີ​ປາ­ກົດ­ການ​ອາດ­ຍາ​ສິດ ເອ­ກະ​ຊົນ ແລະ ສໍ້​ລາດ​ບັງ​ຫຼວງ ລະ­ເມີດ​ກົດ​ລະ­ບຽບ​ຂອງ​ພັກ ກົດ­ໝາຍ​ຂອງ​ລັດ ເຊິ່ງ​ສະ­ແດງ​ອອກ​ມີ​ກຳ­ມະ­ການ​ຄະ­ນະ​ພັກ ແລະ ສະ­ມາ­ຊິກ​ພັກ​ຖືກ​ປະ­ຕິ­ບັດ​ວິ​ໄວ​ດ້ວຍ​ຮູບ​ການ​ຕ່າງໆ 845 ສະ­ຫາຍ ຍິງ 110 ສະ­ຫາຍ ໃນ​ນັ້ນ ໄດ້​ກ່າວ​ເຕືອນ​ຄວາມ​ຜິດ 186 ສະ­ຫາຍ ປົດ​ຕຳ­ແໜ່ງ 30 ສະ­ຫາຍ ໂຈະ​ຮ່ວມ​ຊີ­ວິດ​ພັກ 154 ສະ­ຫາຍ ແລະ ເອົາ​ອອກ​ຈາກ​ພັກ 475 ສະ­ຫາຍ (ອີງ​ຕາມ​ບົດ​ສະ­ຫຼຸບ ເລກ​ທີ 64/ຄກ ສພ ລົງ​ວັນ​ທີ 12 ກຸມ­ພາ 2019).

    ທັງ​ໝົດ​ນັ້ນ​ຄື​ບາງ​ຂໍ້​ມູນ​ທີ່​ຢາກ​ໃຫ້​ເພື່ອນ​ຜູ້​ອ່ານ​ກຳ​ໄດ້.

ຂ່າວທີ່ກ່ຽວຂ້ອງ