ທ່ານ ​ກັສ​ຊິມ-ໂຈ​ມາດ ໂຕ​ກາ​ແຢບ ໄດ້​ຮັບ​ເລືອກ​ຕັ້ງ​ເປັນ​ປະທານາທິບໍດີ​ຂອງ​ກາ​ຊັກ​ສະຖານ

539 12 ມິ.ຖ. 2019 ຂ່າວຕ່າງປະເທດ
ທ່ານ ​ກັສ​ຊິມ-ໂຈ​ມາດ ໂຕ​ກາ​ແຢບ ໄດ້​ຮັບ​ເລືອກ​ຕັ້ງ​ເປັນ​ປະທານາທິບໍດີ​ຂອງ​ກາ​ຊັກ​ສະຖານ

     ຄະນະ​ກຳມະການ​ການ​ເລືອກ​ຕັ້ງ​ສູນ​ກາງຂອງ​ກາ​ຊັກ​ສະຖານ ມີ​ແຈ້ງ​ການ​ອອກ​ມາ​ເມື່ອ​ວັນ​ທີ 10 ມິຖຸນາ​ນີ້ ໃຫ້​ຮູ້​ວ່າ ທ່ານ ​ກັສ​ຊິມ-ໂຈ​ມາດ ໂຕ​ກາ​ແຢບ ປະທານາທິບໍດີ​ຊົ່ວຄາວ ໄດ້​ຮັບ​ໄຊຊະນະ ໃນ​ການ​ເລືອກ​ຕັ້ງ​ປະທານາທິບໍດີ ຊຶ່ງ​ຈັດ​ຂຶ້ນ​ເມື່ອ​ວັນ​ທີ 9 ມິຖຸນາ​ນີ້ ໂດຍ​ທ່ານ​ໄດ້​ຮັບ​ສຽງ ສະໜັບສະໜູນ​ກວ່າ 70% ຂອງ​ຈຳນວນ​ບັດ​ເລືອກ​ຕັ້ງ.

     ຜົນ​ການ​ນັບ​ບັດ​ຄະແນນ​ສຽງ​ເບື້ອງ​ຕົ້ນ ຊີ້​ໃຫ້​ເຫັນ​ວ່າ​ທ່ານ ໂຕ​ກາ​ແຢບ ໄດ້​ຮັບ​ສຽງ​ສະໜັບ ສະ​ໜູນ 70,76% ຂອງ​ຈຳນວນ​ບັດ​ເລືອກ​ຕັ້ງ ໃນ​ຂະນະ​ທີ່​ຄູ່​ແຂ່ງ​ຄົນ​ສຳຄັນ​ຂອງ​ທ່ານ ຄື​ທ່ານ ອາ​ເມຍ​ຊານ ໂກ​ຊາ​ນອບ ຜູ້​ສະໝັກ​ຮັບ​ເລືອກ​ຕັ້ງ​ຈາກ​ຂະ​ບວນ​ການ Ult tagdyry (ຊະ​ຕາ​ກຳ​ຂອງ​ຊາດ) ທີ່​ເປັນ​ຝ່າຍ​ຄ້ານ ໄດ້​ຮັບ​ສຽງ​ສະໜັບສະໜູນ​ຫຼາຍ​ເປັນ​ອັນ​ດັບ​ສອງ ຄື​ໄດ້​ກວ່າ 16% ຂອງ​ຈຳນວນ​ບັດ​ເລືອກ​ຕັ້ງ.

ທ່ານ ໂຕ​ກາ​ແຢບ ເຄີຍ​ດຳລົງ​ຕຳແໜ່ງ​ປະທານ​ສະພາ​ສູງ​ຂອງ​ກາ​ຊັກ​ສະຖານ ແລະ​ໄດ້​ຮັບ ການ​ຄັດ​ເລືອກ​ຈາກ​ອະດີດ​ປະທານາທິບໍດີ ນູ​ຊູນ​ຕານ ນາ​ຊາ​ບາ​ແຢບ ໃຫ້​ເປັນ​ຜູ້​ສືບ​ທອດ​ໜ້າທີ່ ໃນ​ຖານະ​ເປັນ​ປະທານາທິບໍດີ​ຊົ່ວຄາວ ຂອງ​ກາ​ຊັກ​ສະຖານ ເມື່ອ​ເດືອນ​ມີນາ​ທີ່​ຜ່ານ​ມາ ໃນ​ເມື່ອ​ທ່ານ ນູ​ຊູນ​ຕານ ນາ​ຊາ​ບາ​ແຢບ ປະກາດ​ລາ​ອອກ​ຈາກ​ຕຳແໜ່ງ​ຢ່າງ​ບໍ່​ຄາດ​ຝັນ.

ຂ່າວທີ່ກ່ຽວຂ້ອງ