ຂ່າວຫຼ້າສຸດ

ເກີດ​ອຸບັດເຫດ​ທາງ​ການບິນ​ຢູ່​ໃນ​ປອກ​ຕຸຍ​ການ ແລະ ສ ອາ​ເມ​ຣິ​ກາ

265 12 ມິ.ຖ. 2019 ຂ່າວຕ່າງປະເທດ
ເກີດ​ອຸບັດເຫດ​ທາງ​ການບິນ​ຢູ່​ໃນ​ປອກ​ຕຸຍ​ການ ແລະ ສ ອາ​ເມ​ຣິ​ກາ

    ຂໍ້​ມູນ​ຈາກ​ອົງການ​ສຸກ​ເສີນ ແລະ ​ສື່ສານ​ໃນ​ທ້ອງຖິ່ນ ແຈ້ງ​ໃຫ້​ຮູ້​ວ່າ ເຮືອບິນ Flyer Pelican ຂະໜາດ​ເບົາ​ລຳ​ໜຶ່ງ ຕ້ອງ​ໄດ້​ບິນ​ລົງ​ຈອດ​ສຸກ​ເສີນ​ຢູ່​ເທິງ​ທາງ​ດ່ວນ ຢູ່​ໃນ​ເຂດ ພິນ​ຮັນ ໂນ​ໂວ ຊຶ່ງ​ຂຶ້ນ​ກັບ​ພື້ນ​ທີ່​ນະຄອນ ລິ​​ສ​ບອນ (ປອກ​ຕຸຍ​ການ)  ໃນ​ຂະນະ​ທີ່​ພວມ​ບິນ​ມຸ່ງ​ໜ້າ​ໄປ​ຍັງ​ເມືອງ ຊິນ​ຕຣາ. ເຫດການ​ດັ່ງກ່າວ ເກີດ​ຂຶ້ນ​ໃນ​ວັນ​ທີ 10 ມິຖຸນາ​ນີ້ ສົ່ງ​ຜົນ​ໃຫ້​ຜູ້ໂດຍສານ​ຜູ້​ໜຶ່ງ ໄດ້​ຮັບ​ບາດເຈັບ ແລະ​ພາຫະນະ​ຢູ່​ຕາມ​ທາງ​ດ່ວນ ໄດ້​ຮັບ​ຄວາມ​ເສຍ​ຫາຍ​ໄປ 3 ຄັນ.

    ໃນ​ວັນ​ດຽວ​ກັນ ກໍ​ໄດ້​ເກີດ​ອຸບັດເຫດ​ກັບ​ເຮືອບິນ​ເອ​ລີ​ກອບ​ແຕ​ລຳ​ໜຶ່ງ ຢູ່​ໃນ​ນະຄອນ​ນີວ​ຢອກ (ສ ອາ​ເມ​ຣິ​ກາ). ຂ່າວ​ແຈ້ງວ່າ ເຮືອບິນ​ດັ່ງກ່າວ ປະສົບ​ເຫດ​ໃນ​ຂະນະ​ທີ່​ບິນ​ລົງ​ຈອດ​ຢູ່​ເທິງ​ຫຼັງຄາ ຂອງ​ອາຄານ AXA Equitable Center ທີ່​ມີ​ຄວາມ​ສູງ​ກວ່າ 50 ຊັ້ນ ຊຶ່ງ​ຕັ້ງ​ຢູ່​ໃນ​ເຂດ​ມິດ​ທາວ ມາ​ຮັດ​ທານ (Midtown Manhattan).

     ໜັງສືພິມ ນີວ​ຢອກ ທາມ ໃຫ້​ຮູ້​ວ່າ ພະ​ແນກ​ດັບ​ເພີງ​ຂອງ​ນະຄອນ​ນີວ​ຢອກ ໄດ້​ລະດົມ​ພະນັກງານ​ມອດ​ໄຟ​ກວ່າ 100 ຄົນ ໄປ​ປະຕິບັດ​ໜ້າທີ່​ຢູ່​ໃນ​ທີ່​ເກີດ​ເຫດ​ດັ່ງກ່າວ. ແຈ້ງ​ການ​ຂອງ​ພະ​ແນກ​ດັບ​ເພີງ ໃຫ້​ຮູ້​ວ່າ ມີ​ຜູ້​ເສຍ​ຊີວິດ 1 ຄົນ ຈາກ​ເຫດການ​ທີ່​ເກີດ​ຂຶ້ນ​ດັ່ງກ່າວ.

ຂ່າວທີ່ກ່ຽວຂ້ອງ