ກູ​ບາ​ ຮຽກຮ້ອງ​ການ​ລົງທຶນ​ຈາກ​ຊາວ​ກູ​ບາ​ຕ່າງ​ດ້າວ

279 12 ມິ.ຖ. 2019 ຂ່າວຕ່າງປະເທດ
ກູ​ບາ​ ຮຽກຮ້ອງ​ການ​ລົງທຶນ​ຈາກ​ຊາວ​ກູ​ບາ​ຕ່າງ​ດ້າວ

    ເມື່ອ​ບໍ່​ດົນ​ມາ​ນີ້ ລັດຖະບານ​ກູ​ບາ ໄດ້​ຮຽກຮ້ອງ​ໄປ​ຍັງ​ຊາວ​ກູ​ບາ​ທີ່​ອາ​ໃສ​ຢູ​ຕ່າງປະເທດ (ຊາວ​ກູ​ບາ​ຕ່າງ​ດ້າວ) ໃຫ້​ລົງທຶນ​ເຂົ້າ​ໃນ​ຂົງເຂດ​ຕ່າງໆ​ທີ່​ໃຫ້​ບຸລິມະສິດ​ຢູ່​ໃນ​ກູ​ບາ ທ່າມກາງ​ທີ່​ພື້ນຖານ​ເສດຖະກິດ​ກູ​ບາ ພວມ​ແບກ​ຫາບ​ຄຳ​ສັ່ງ​ປິດ​ລ້ອມ​ທາງ​ດ້ານ​ເສດຖະກິດ​ເທື່ອ​ໃໝ່​ຂອງ ສ ອາ​ເມ​ຣິ​ກາ ແລະ​ສະພາບ​ການ​ເຄັ່ງ​ຕຶງ​ດ້ານ​ການ​ເງິນ​ຢູ່​ພາຍ​ໃນ​ປະເທດ.

    ທ່ານ​ນາງ ເດ​ໂບ​ຣາ ຣີ​ວາ​​ສ ຜູ້ອຳນວຍການ​ຮັບຜິດຊອບ​ດ້ານ​ການ​ລົງທຶນ​ຕ່າງປະເທດ ປະຈຳ​ກະຊວງ​ການ​ຄ້າ​ຕ່າງປະເທດ ແລະ​ການ​ລົງທຶນ​ຂອງ​ກູ​ບາ ເວົ້າ​ວ່າ ຊາວ​ກູ​ບາ​ທີ່​ດຳລົງ​ຊີວິດ​ຢູ່​ຕ່າງປະເທດ ສາມາດ​ເຂົ້າ​ຮ່ວມ​ໃນ 525 ໂຄງການ ທີ່ຢູ່​ໃນ​ລາຍການ​ຂອງ​ໂອກາດ​ການ​ລົງທຶນ​ແຫ່ງ​ຊາດ​ຂອງ​ກູ​ບາ.

ນະໂຍບາຍ​ການ​ລົງທຶນ​ຂອງ​ຕ່າງປະເທດ​ຂອງ​ກູ​ບາ ໄດ້​ກຳນົດ​ບັນດາ​ຂົງເຂດ​ອັນ​ເປັນ​ພື້ນຖານ ທີ່​ຕ້ອງການ​ມີ​ແຫຼ່ງ​ການ​ລົງທຶນ​ຈາກ​ສາກົນ ອັນ​ປະກອບ​ມີ ພະລັງງານ​ໝູນວຽນ ອຸດສາຫະກຳ ການ​ຜະລິດ​ທາງ​ດ້ານ​ກະສິກຳ ແລະ​ສະບຽງ​ອາຫານ ເຕັກ​ໂນ​ໂລ​ຊີ​ຊີວະ​ສາດ ການ​ກໍ່ສ້າງ ການທ່ອງທ່ຽວ ແລະ​ຂະແໜງການ​ອື່ນໆ​ອີກ​ຈຳນວນ​ໜຶ່ງ.

    ທ່ານ​ນາງ ຣີ​ວາ​​ສ ເວົ້າ​ວ່າ ກົດໝາຍ​ວ່າ​ດ້ວຍ​ການ​ລົງທຶນ​ຕ່າງປະເທດ​ຂອງ​ກູ​ບາ ສະບັບ​ປີ 2014 ບໍ່​ໄດ້​ວາງ​ຂີດ​ຈຳກັດ​ໃດໆ ທີ່​ພົວພັນ​ເຖິງ​ຕົ້ນ​ກຳເນີດ​ຂອງ​ນັກ​ລົງທຶນ. ກົດໝາຍ​ໄດ້​ຊີ້​ແຈງ​ຢ່າງ​ຈະ​ແຈ້ງວ່າ ການ​ຮ່ວມ​ທຸລະ​ກິດ​ໃດໆ​ກໍ​ຕາມ ທີ່​ສ້າງ​ຂຶ້ນ​ມາ​ໃນ​ອະນາຄົດ ພ້ອມ​ດ້ວຍ​ແຫຼ່ງ​ທຶນ​ຂອງ​ມັນ ຕ້ອງ​ແມ່ນ​ມາ​ຈາກ​ຕ່າງປະເທດ.

ທ່ານ​ນາງ ຣີ​ວາ​​ສ ໃຫ້​ຮູ້​ວ່າ ກໍ​ຄື​ກັນ​ກັບ​ນັກ​ລົງທຶນ​ສາກົນ​ອື່ນໆ ຊາວ​ກູ​ບາ​ທີ່​ດຳລົງ​ຊີວິດ​ຢູ່​ຕ່າງປະເທດ ກໍ​ສາມາດ​ດຳເນີນ​ການ​ເຮັດ​ທຸລະ​ກິດ​ຮູບ​ແບບ​ໃດໆ​ກໍ​ໄດ້ ເຊັ່ນ​ການ​ຮ່ວມ​ທຸລະ​ກິດ ເຮັດ​ສັນຍາ​ໃຫ້​ແກ່​ບັນດາ​ສະມາຄົມ​ເສດຖະກິດ​ສາກົນ ຫຼື​ສ້າງຕັ້ງ​ບໍລິສັດ​ທີ່​ມີ​ທຶນ​ຕ່າງປະເທດ 100%. ໃນ​ຂະນະ​ດຽວ​ກັນ ສິດທິ​ຂອງ​ບັນດາ​ຊາວ​ກູ​ບາ​ຕ່າງ​ດ້າວ ກໍ​ໄດ້​ຮັບ​ການ​ຮັບປະກັນ ຄື​ກັນ​ກັບ​ບັນດາ​ນັກ​ລົງທຶນ​ສາກົນ.

    ຕົວ​ເລກ​ຢ່າງ​ເປັນ​ທາງ​ການ​ໃຫ້​ຮູ້​ວ່າ 40 ໂຄງການ ທີ່​ເປັນ​ການ​ຮ່ວມ​ທຸລະ​ກິດ ຫຼື​ໂຄງການ​ທີ່​ມີ​ການ​ລົງທຶນ​ໃໝ່​ຂອງ​ຕ່າງປະເທດ​ຢູ່​ໃນ​ກູ​ບາ ໄດ້​ຮັບ​ການ​ອອກ​ໃບ​ອະນຸຍາດ​ໃນ​ປີ 2018 ແລະ​ບັນລຸ​ຍອດ​ມູນ​ຄ່າ​ກວ່າ 1,5 ຕື້​ໂດ​ລາ​ສະຫະລັດ.

ຂ່າວທີ່ກ່ຽວຂ້ອງ