ຂ່າວຫຼ້າສຸດ

ຊີ້ແຈງການອອກໃບຕາດິນຊ້ຳຊ້ອນ ແລະ ການຟື້ນຟູປ່າ-ໄມ້ປູກ

1.065 11 ມິ.ຖ. 2019 ຂ່າວໜ້າ​ໜຶ່ງ
ຊີ້ແຈງການອອກໃບຕາດິນຊ້ຳຊ້ອນ ແລະ ການຟື້ນຟູປ່າ-ໄມ້ປູກ

    ທ່ານ ສົມ​ມາດ ພົນ​ເສ­ນາ ລັດ­ຖະ­ມົນ­ຕີ​ກະ­ຊວງ​ຊັບ­ພະ­ຍາ­ກອນ​ທຳ​ມະ​ຊາດ ແລະ ສິ່ງ­ແວ­ດລ້ອມ (ຊສ) ໄດ້​ຊີ້​ແຈງ ໃນ​ກອງ​ປະ­ຊຸມ​ສະ­ໄໝ​ສາ­ມັນ​ເທື່ອ​ທີ 7 ຂອງ​ສະ­ພາ​ແຫ່ງ​ຊາດ ຊຸດ​ທີ VIII ວັນ​ທີ 10 ມິ­ຖຸ­ນາ 2019 ກ່ຽວ​ກັບ​ການ​ຄຸ້ມ​ຄອງ​ການ​ອອກ​ໃບ​ຕາ­ດິນ​ຊ້ຳ​ຊ້ອນ​ໃນ​ໄລ­ຍະ​ຜ່ານ​ມາ ແລະ ການ​ແກ້​ໄຂ​ໃນ​ໄລ­ຍະ​ຕໍ່­ໜ້າ​ວ່າ: ກະ­ຊວງ ຊສ ໄດ້​ປະ­ສານ​ສົມ­ທົບ​ກັບ​ສານ​ປະ­ຊາ­ຊົນ​ສູງ​ສຸດ ອົງ­ການ​ໄອ​ຍະ​ການ​ປະ­ຊາ­ຊົນ​ສູງ​ສຸດ ທະ­ນາ­ຄານ​ແຫ່ງ ສປປ ລາວ ແລະ ພະ​ແນກ ຊສ ຂັ້ນ​ແຂວງ ກວດ­ກາ​ຄືນ​ກໍ­ລະ­ນີ​ໃບ​ຕາ­ດິນ​ມີ​ການ​ຊ້ຳ​ຊ້ອນ ໃນ​ນີ້ ຢູ່​ແຂວງ​ສະ­ຫວັນ​ນະ​ເຂດ ມີ 44 ກໍ­ລະ­ນີ ນະ­ຄອນ­ຫຼວງ​ວຽງ​ຈັນ 17 ກໍ­ລະ­ນີ ຈຳ­ປາ​ສັກ 15 ກໍ­ລະ­ນີ ໄຊ​ຍະ​ບູ​ລີ 10 ກໍ­ລະ­ນີ ສາ­ມາດ​ສະ­ຫຼຸບ​ສາ­ເຫດ​ດັ່ງ­ນີ້: ການ​ແຈ້ງ​ເທັດ​ວ່າ​ໃບ​ຕາ­ດິນ​ເສຍ ແມ່ນ​ກໍ­ລະ­ນີ​ທີ່​ເຈົ້າ​ຂອງ​ສິດ​ນຳ​ໃຊ້​ທີ່​ດິນ​ເອົາ​ໃບ​ຕາ­ດິນ​ໄປ​ຄ້ຳ­ປະ­ກັນ ເພື່ອ​ກູ້​ຢືມ​ເງິນ​ນຳ​ລະ­ຫວ່າງ​ບຸກ­ຄົນ​ກັບ​ບຸກ­ຄົນ ໂດຍ​ບໍ່​ຜ່ານ​ການ​ຈົດ​ທະ­ບຽນ​ທີ່​ດິນ ຕໍ່​ມາ​ຜູ້­ກ່ຽວ​ໄດ້​ສົມ­ຮູ້​ຮ່ວມ​ຄິດ​ກັບ​ເຈົ້າ​ໜ້າ­ທີ່​ດິນ​ໄປ​ແຈ້ງ​ເທັດ​ວ່າ​ໃບ​ຕາ­ດິນ​ເສຍ​ຫາຍ ແລ້ວ​ສະ­ເໜີ​ຫາ​ພະ​ແນກ ຊສ ຂໍ​ສຳ​ເນົາ​ໃບ​ຕາ­ດິນ ຈາກ​ນັ້ນ ພະ​ແນກ​ດັ່ງ­ກ່າວ​ໄດ້​ສະ­ເໜີ​ໃຫ້​ສານ​ຕັດ­ສິນ ຫຼັງ​ຈາກ​ສານ​ຕັດ­ສິນ​ແລ້ວ ກໍ​ໄດ້​ອອກ​ໃບ​ຕາ­ດິນ​ໃໝ່ ແຕ່​ຕົວ​ຈິງ​ແລ້ວ​ໃບ​ຕາ­ດິນ​ສະ­ບັບ​ເດີມ​ຍັງ​ຢູ່​ນຳ​ເຈົ້າ​ໜີ້ ຈາກ​ນັ້ນ ໄດ້​ເອົາ​ໃບ​ຕາ­ດິນ​ໃໝ່​ໄປ​ຄ້ຳ­ປະ­ກັນ​ນຳ​ທະ­ນາ­ຄານ​ອື່ນ​ອີກ ໃບ​ແຈ້ງ​ເສຍ​ພາ­ສີ​ທີ່​ດິນ ແລະ ໃບ​ຕາ­ດິນ​ຊ້ຳ​ຊ້ອນ​ກັນ ເກີດ​ຂຶ້ນ​ເນື່ອງ​ຈາກ​ມີ​ການ​ເອົາ​ໃບ​ແຈ້ງ​ເສຍ​ພາ­ສີ​ທີ່​ດິນ​ໄປ​ຄ້ຳ​ກູ້​ຢືມ​ນຳ​ທະ­ນາ­ຄານ​ໜຶ່ງ ພາຍ­ຫຼັງ​ທີ່​ດິນ​ຕອນ​ດັ່ງ­ກ່າວ​ໄດ້​ມີ​ການ​ອອກ​ໃບ​ຕາ­ດິນ​ແລ້ວ ຜັດ​ເອົາ​ໄປ​ກູ້​ຢືມ​ເງິນ​ນຳ​ທະ­ນາ­ຄານ​ອື່ນ ໃບ​ແຜນ­ທີ່​ດິນ​ຊ້ຳ​ຊ້ອນ​ກັນ ເປັນ​ສາ­ເຫດ​ທີ່​ນຳ­ໄປ​ສູ່​ການ​ເຮັດ​ໃຫ້​ເກີດ​ໃບ​ຕາ­ດິນ​ຊ້ຳ​ຊ້ອນ ເນື່ອງ​ຈາກ​ເຈົ້າ​ຂອງ​ດິນ​ເອົາ​ໃບ​ແຜນ­ທີ່​ດິນ​ຂາຍ​ໃຫ້​ບຸກ­ຄົນ​ອື່ນ ຫຼື ຄ້ຳ­ປະ­ກັນ​ນຳ​ທະ­ນາ­ຄານ ໃບ​ແຈ້ງ​ເສຍ​ພາ­ສີ​ທີ່​ດິນ​ຊ້ຳ​ຊ້ອນ​ກັນ ດິນ​ຕອນ​ດຽວ​ຂາຍ​ໃຫ້​ຫຼາຍ​ຄົນ ແຕ່​ຮັກ­ສາ​ເປັນ​ໃບ​ແຈ້ງ​ພາ­ສີ​ທີ່​ດິນ ໃບ​ຕາ­ດິນ​ລັດ ແລະ ໃບ​ຕາ­ດິນ​ບຸກ­ຄົນ​ຊ້ຳ​ຊ້ອນ​ກັນ ເຊິ່ງ​ຜູ້​ທີ່​ໄດ້​ຮັບ​ສິດ​ນຳ​ໃຊ້​ທີ່​ດິນ​ລັດ ໄດ້​ນຳ​ເອົາ​ໃບ​ຕາ­ດິນ​ລັດ​ໄປ​ຄ້ຳ­ປະ­ກັນ​ນຳ​ທະ­ນາ­ຄານ ຫຼັງ​ຈາກ​ຫັນ​ເປັນ​ໃບ​ຕາ­ດິນ​ບຸກ­ຄົນ​ແລ້ວ ໄດ້​ນຳ­ໄປ​ຄ້ຳ­ປະ­ກັນ​ນຳ​ທະ­ນາ­ຄານ​ອື່ນ​ອີກ.

    ເຫດ­ການ​ດັ່ງ­ກ່າວ ໄດ້​ມີ​ການ​ແກ້​ໄຂ ເຊິ່ງ​ກະ­ຊວງ ຊສ ໄດ້​ອອກ​ຄຳ​ສັ່ງ​ວ່າ​ດ້ວຍ​ການ​ກວດ­ກາ​ຄືນ ບັນ­ຫາ​ການ​ອອກ​ໃບ​ຕາ­ດິນ​ຊ້ຳ​ຊ້ອນ ເລກ​ທີ 1924/ກຊສ ທະ­ນາ­ຄານ​ແຫ່ງ ສປປ ລາວ ໄດ້​ອອກ​ແຈ້ງ​ການ​ໃຫ້​ບັນ­ດາ​ທະ­ນາ­ຄານ​ທຸ­ລະ​ກິດ​ທົ່ວ​ປະ­ເທດ ແຈ້ງ​ໃຫ້​ລູກ​ຄ້າ​ເອົາ​ເອ­ກະ­ສານ​ທີ່​ບໍ່​ແມ່ນ​ໃບ​ຕາ­ດິນ​ທີ່​ໄປ​ຄ້ຳ​ກັບ​ທະ­ນາ­ຄານ​ທຸ­ລະ​ກິດ ໄປ​ພົວ­ພັນ​ກັບ​ຂະ­ແໜງ​ທີ່​ດິນ​ຂຶ້ນ​ທະ­ບຽນ​ອອກ​ໃບ​ຕາ­ດິນ​ຕາມ​ຂັ້ນ​ຕອນ ສະ­ບັບ​ເລກ​ທີ 818/ທຫລ.ຫກ ແລະ ສະ­ບັບ​ເລກ​ທີ 494/ທຫລ.ກຄທ ພ້ອມ​ນີ້ ກະ­ຊວງ ຊສ ຍັງ​ໄດ້​ອອກ​ແຈ້ງ​ການ​ໃຫ້​ພະ​ແນກ ຊສ ແຂວງ ແລະ ນະ­ຄອນ­ຫຼວງ ໃຫ້​ຄວາມ​ສະ­ດວກ​ຕໍ່​ທະ­ນາ­ຄານ​ທຸ­ລະ​ກິດ ກ່ຽວ​ກັບ​ການ​ໃຫ້​ຄຳ​ແນະ­ນຳ​ລູກ​ຄ້າ​ຂອງ​ທະ­ນາ­ຄານ ໃນ​ການ​ເອົາ​ເອ­ກະ­ສານ​ຄ້ຳ­ປະ­ກັນ​ເງິນ​ກູ້​ທີ່​ບໍ່​ແມ່ນ​ໃບ​ຕາ­ດິນ ແລະ ອອກ​ໃບ​ຕາ­ດິນ​ຕາມ​ຂັ້ນ​ຕອນ ສະ­ບັບ​ເລກ​ທີ 4125/ກຊສ.ຫກ ໄດ້​ນຳ​ໃຊ້​ຊອບ​ແວ​ດີ​ຈີ​ຕອນ ລາວ​ແລນ​ເຫຼັກ ແລະ ລະ­ບົບ​ບາ​ໂຄດ ທີ່​ເອົາ​ຄ່າ​ພິ​ກັດ​ຕອນ​ດິນ​ເຂົ້າ​ໃນ​ໃບ​ຕາ­ດິນ ເພື່ອ​ສາ­ມາດ​ຮູ້​ໄດ້​ທີ່​ຕັ້ງ​ຕອນ​ດິນ ເຊິ່ງ​ສາ­ມາດ​ກວດ​ສອບ​ໄດ້​ການ​ປ່ຽນ­ແປງ​ສິດ​ນຳ​ໃຊ້​ທີ່​ດິນ ທີ່​ຈະ​ຊ່ວຍ​ປ້ອງ​ກັນ​ການ​ປອມ​ແປງ​ໃບ​ຕາ­ດິນ ແລະ ອອກ​ໃບ​ຕາ­ດິນ​ຊ້ຳ​ຊ້ອນ.

    ຈາກ​ນັ້ນ ທ່ານ ລຽນ ທິ​ແກ້ວ ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ ແລະ ປ່າ­ໄມ້ ກໍ​ໄດ້​ຊີ້​ແຈງ​ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ​ມະ­ຕິ​ກອງ​ປະ­ຊຸມ​ສະ­ພາ​ແຫ່ງ​ຊາດ ສະ­ບັບ​ເລກ​ທີ 014/ສພຊ ແລະ ບັນ­ດາ​ມະ­ຕິ​ຂອງ​ຄະ­ນະ​ປະ­ຈຳ​ສະ­ພາ​ແຫ່ງ​ຊາດ ກ່ຽວ​ກັບ​ການ​ຟື້ນ​ຟູ​ປ່າ­ໄມ້ ແລະ ປູກ​ປ່າ​ທົດ​ແທນ ທີ່​ຕິດ​ພັນ​ກັບ​ການ​ນຳ​ໃຊ້​ງົບ­ປະ­ມານ​ຈາກ​ໂຄງ­ການ​ພັດ­ທະ­ນາ​ໄຟ­ຟ້າ-ບໍ່​ແຮ່ ແລະ ທຶນ​ຊ່ວຍ­ເຫຼືອ​ຈາກ​ຕ່າງ­ປະ­ເທດ ເຊິ່ງ​ບາງ​ຕອນ​ທ່ານ​ກ່າວ​ວ່າ: ປັດ­ຈຸ­ບັນ ສາ­ມາດ​ກຳ­ນົດ​ເນື້ອ­ທີ່​ດິນ​ປ່າ­ໄມ້​ທຳ​ມະ​ຊາດ​ຕາມ 3 ປະ­ເພດ​ປ່າ (ປ່າ​ປ້ອງ​ກັນ ປ່າ​ສະ­ຫງວນ ແລະ ປ່າ​ຜະ­ລິດ​ແຫ່ງ​ຊາດ) ລະ­ດັບ​ຊາດ ແຂວງ ແລະ ເມືອງ ໄດ້ 15.429.230 ເຮັກ­ຕາ ຖ້າ​ລວມ​ເນື້ອ­ທີ່​ປ່າ​ປູກ​ທີ່​ມີ 486.600 ເຮັກ­ຕາ ພວກ​ເຮົາ​ມີ​ເນື້ອ­ທີ່​ດິນ​ປ່າ­ໄມ້​ທັງ​ໝົດ 15.915.830 ເຮັກ­ຕາ ຫຼື ປະ­ມານ 67,2% ຂອງ​ເນື້ອ­ທີ່​ທົ່ວ​ປະ­ເທດ ທຽບ­ໃສ່​ມະ­ຕິ​ຂອງ​ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ​ເລກ​ທີ 026/ຄບສພ ກໍ​ຄື ມະ­ຕິ​ສະ­ພາ​ແຫ່ງ​ຊາດ ເລກ​ທີ 098/ສພຊ ທີ່​ໄດ້​ກຳ­ນົດ​ເປົ້າ​ໝາຍ​ເນື້ອ­ທີ່​ດິນ​ປ່າ­ໄມ້​ໃຫ້​ໄດ້ 70% ຂອງ​ເນື້ອ­ທີ່​ທົ່ວ​ປະ­ເທດ ຕ້ອງ​ໄດ້​ສືບ­ຕໍ່​ກຳ­ນົດ​ເນື້ອ­ທີ່​ດິນ​ປ່າ­ໄມ້​ເພີ່ມ​ຕື່ມ 2,8% ຂອງ​ເນື້ອ­ທີ່​ທົ່ວ​ປະ­ເທດ ເພື່ອ​ໃຫ້​ບັນ­ລຸ​ເປົ້າ​ໝາຍ​ດັ່ງ­ກ່າວ.

    ສຳ­ລັບ​ການ​ຟື້ນ​ຟູ​ປ່າ ແລະ ປູກ​ໄມ້ ໄດ້​ສຸມ​ໃສ່​ສອງ​ຮູບ​ແບບ​ຄື: ການ​ຟື້ນ​ຟູ​ປ່າ­ໄມ້​ໂດຍ​ທຳ​ມະ​ຊາດ ແລະ ການ​ປູກ​ໄມ້ ຜ່ານ​ການ​ປະ­ຕິ­ບັດ​ຕົວ​ຈິງ​ໄລ­ຍະ​ຜ່ານ​ມາ ສາ­ມາດ​ປະ­ຕິ­ບັດ​ໄດ້ 3.227.000 ເຮັກ­ຕາ ສ່ວນ​ການ​ປູກ​ໄມ້​ປະ­ຕິ­ບັດ​ໄດ້ 486.600 ເຮັກ­ຕາ ໃນ​ນີ້ ປະ­ຊາ­ຊົນ ປູກ 160.660 ເຮັກ­ຕາ ບໍ­ລິ­ສັດ ປູກ 324.143 ເຮັກ­ຕາ ລັດ ປູກ 1.800 ເຮັກ­ຕາ ປະ­ກອບ​ມີ​ຢາງ­ພາ­ລາ 276.130 ເຮັກ­ຕາ ໄມ້​ວິກ 77.420 ເຮັກ­ຕາ ໄມ້​ສັກ 49.340 ເຮັກ­ຕາ ໄມ້​ເກດ­ສະ­ໜາ 31.580 ເຮັກ­ຕາ ແລະ ໄມ້​ພື້ນ­ເມືອງ​ອື່ນໆ 52.130 ເຮັກ­ຕາ.

ຂ່າວທີ່ກ່ຽວຂ້ອງ