ຂ່າວຫຼ້າສຸດ

ໄຂນຳໃຊ້ໂຮງງານຜະລິດລິບລາວ

1.027 11 ມິ.ຖ. 2019 ຂ່າວໜ້າ​ໜຶ່ງ
ໄຂນຳໃຊ້ໂຮງງານຜະລິດລິບລາວ

    ສອງ​ນັກ­ທຸ­ລະ­ກິດ​ລາວ ຮ່ວມ​ທຶນ​ສ້າງ­ຕັ້ງ​ໂຮງ­ງານ​ຜະ­ລິດ​ລິບ​ລາວ (ໂຮງ­ງານ​ຜະ­ລິດ​ລິບ​ແຫ່ງ​ທຳ​ອິດ ໃນ ສປປ ລາວ) ທີ່​ນຳ​ໃຊ້​ສ່ວນ​ປະ­ກອບ ແລະ ເຕັກ​ໂນ​ໂລ​ຊີ​ຈາກ​ເອີ​ຣົບ ມໍ​ເຕີ​ຈາກ​ປະ­ເທດ​ອີ​ຕາ​ລີ ລະ­ບົບ​ປະ­ຕູ​ຈາກ​ປະ­ເທດ​ແອັດ​ສະ​ປາຍ ແລະ ເຕັກ​ໂນ​ໂລ​ຊີ​ລະ­ບົບ​ຄວບ​ຄຸມ​ລິບ​ຂຶ້ນ-ລົງ​ຈາກ​ປະ­ເທດ​ຝຣັ່ງ ລະ­ບົບ​ປ້ອງ​ກັນ​ປະ­ຕູ​ໜີບ​ຜູ້­ໂດຍ­ສານ ຫຼື ສິ່ງ​ຂອງ ດ້ວຍ​ແຖບ​ເຊັນ​ເຊີ​ຢູ່​ບານ​ປະ­ຕູ​ທັງ​ສອງ​ຂ້າງ ເພື່ອ​ຜະ­ລິດ​ລິບ​ໂດຍ­ສານ ລິບ​ຂົນ­ສົ່ງ ລິບ​ໂຮງ­ໝໍ ນອກ​ນີ້ ຍັງ​ສາ­ມາດ​ຜະ­ລິດ​ຂັ້ນ­ໄດ​ເລື່ອນ ຕັ່ງ​ຍົກ​ສຳ­ລັບ​ຄົນ​ພິ­ການ-ຄົນ​ອາ­ຍຸ​ສູງ ຕອບ​ສະ­ໜອງ​ຄວາມ​ຕ້ອງ­ການ​ຂອງ​ລູກ​ຄ້າ ສປປ ລາວ.

    ທ່ານ ສີ​ສະ­ຫຼຽວ ສະ­ແຫວງ​ສຶກ​ສາ ປະ­ທານ​ໂຮງ­ງານ​ຜະ­ລິດ​ລິບ​ລາວ ກ່າວ​ໃນ​ພິ­ທີ​ໄຂ​ໂຮງ­ງານ​ຜະ­ລິດ​ລິບ​ລາວ ວ່າ: ການ​ສ້າງ­ຕັ້ງ​ໂຮງ­ງານ​ນີ້ ເກີດ​ຂຶ້ນ​ຈາກ​ການ​ສຶກ​ສາ​ຄົ້ນ­ຄວ້າ​ນະ­ໂຍ­ບາຍ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ໃນ​ໄລ­ຍະ​ໃໝ່​ຢູ່ ສປປ ລາວ ນະ­ໂຍ­ບາຍ​ການ​ຫັນ​ເປັນ​ອຸດ­ສາ­ຫະ­ກຳ ແລະ ທັນ​ສະ­ໄໝ ນະ­ໂຍ­ບາຍ​ຂົນ­ຂວາຍ ຮຽກ​ເອີ້ນ​ເອົາ​ນັກ­ທຸ­ລະ­ກິດ​ລາວ​ຢູ່​ຕ່າງ­ປະ­ເທດ ໃຫ້​ກັບ​ມາ​ພັດ­ທະ­ນາ​ບ້ານ​ເກີດ​ເມືອງ​ນອນ ນະ­ໂຍ­ບາຍ​ເຊື່ອມ​ໂຍງ​ພາກ​ພື້ນ ແລະ ນະ­ໂຍ­ບາຍ​ສະ­ກັດ​ກັ້ນ​ການ​ຮົ່ວ​ໄຫຼ​ຂອງ​ເງິນ­ຕາ​ອອກ​ຕ່າງ­ປະ­ເທດ ນອກ​ນີ້​ຍັງ​ອີງ­ໃສ່​ການ​ຂະ­ຫຍາຍ­ຕົວ ແລະ ຄວາມ​ຕ້ອງ­ການ​ໃນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແລະ ຄວາມ​ມຸ່ງ​ໝັ້ນ​ທີ່​ຢາກ​ນຳ​ເອົາ​ເຕັກ​ໂນ​ໂລ​ຊີ​ຂັ້ນ​ສູງ ມາ​ພັດ­ທະ­ນາ​ປະ­ເທດ​ຊາດ ຈຶ່ງ​ໄດ້​ຮ່ວມ​ມື​ກັບ​ທ່ານ ພູ​ວົງ ສີ​ຫາ​ປັນ­ຍາ ວິ­ສະ­ວະ­ກອນ​ໂຮງ­ງານ​ຜະ­ລິດ​ລິບ ຍີ່­ຫໍ້​ໂອ​ເລ​ໂອ​ດິນ ຢູ່​ປະ­ເທດ​ຝຣັ່ງ ຫຼາຍ​ກວ່າ 30 ປີ ຜູ້­ອຳ­ນວຍ­ການ​ໂຮງ­ງານ​ຜະ­ລິດ​ລິບ​ໂອ​ເລ​ໂອ​ດິນ ລາວ-ເອ​ເຊຍ ຢູ່​ປະ­ເທດ​ໄທ ຫຼາຍ​ກວ່າ 10 ປີ ສ້າງ­ຕັ້ງ​ໂຮງ­ງານ​ແຫ່ງ​ນີ້​ຂຶ້ນ.

    ພິ­ທີ​ໄຂ​ໂຮງ­ງານ​ຜະ­ລິດ​ລິບ​ລາວ ຈັດ​ຂຶ້ນ​ວັນ​ທີ 9 ມິ­ຖຸ­ນາ 2019 ຢູ່​ໂຮງ­ງານ​ດັ່ງ­ກ່າວ ບ້ານ​ໂນນ​ແສງ​ຈັນ ເມືອງ​ໄຊ​ທາ­ນີ ນະ­ຄອນ­ຫຼວງ​ວຽງ​ຈັນ ໂດຍ​ມີ​ທ່ານ​ນາງ ນາ­ລີ ສີ​ສຸ​ລິດ ພັນ​ລະ​ຍາ​ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ພ້ອມ​ດ້ວຍ​ທ່ານ​ຮອງ​ລັດ­ຖະ­ມົນ­ຕີ​ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ເຈົ້າ­ເມືອງ​ໄຊ​ທາ­ນີ ແລະ ແຂກ​ຖືກ​ເຊີນ​ເຂົ້າ​ຮ່ວມ.

ຂ່າວທີ່ກ່ຽວຂ້ອງ