ຂ່າວຫຼ້າສຸດ

ແຮງງານລາວ ທີ່ໄປເຮັດວຽກຢູ່ປະເທດໄທ ມີ 278.485 ຄົນ

644 11 ມິ.ຖ. 2019 ຂ່າວໜ້າ​ໜຶ່ງ

    ກອງ​ປະ­ຊຸມ​ລະ­ດັບ​ວິ­ຊາ​ການ​ແຮງ​ງານ ລາວ-ໄທ ຈັດ​ຂຶ້ນ ວັນ​ທີ 4-6 ມິ­ຖຸ­ນາ ຜ່ານ​ມາ ຢູ່​ແຂວງ​ໜອງ​ຄາຍ ປະ­ເທດ​ໄທ ໂດຍ​ເປັນ​ປະ­ທານ​ຂອງ​ທ່ານ​ນາງ ເພັດ​ຊະ​ຮັດ ສິນ​ອວຍ ອະ­ທິ­ບໍ­ດີ​ກົມ​ຈັດ​ຫາ​ງານ ກະ­ຊວງ​ແຮງ​ງານ​ໄທ ແລະ ທ່ານ​ນາງ ອະ­ນຸ­ສອນ ຄຳ​ສິງ​ສະ​ຫວັດ ຫົວ­ໜ້າ​ກົມ​ພັດ­ທະ­ນາ​ສີ­ມື​ແຮງ​ງານ ແລະ ຈັດ​ຫາ​ງານ ກະ­ຊວງ​ແຮງ​ງານ ແລະ ສະ­ຫວັດ­ດີ​ກາ-ສັງ­ຄົມ ມີ​ວິ­ຊາ​ການ​ກ່ຽວ­ຂ້ອງ ເຂົ້າ​ຮ່ວມ.

    ຈຸດ­ປະ­ສົງ ເພື່ອ​ປຶກ­ສາ​ຫາ­ລື​ໃນ​ການ​ກຳ­ນົດ​ວິ­ທີ​ການ​ແກ້​ໄຂ​ແຮງ​ງານ​ລາວ ທີ່​ເຮັດ​ວຽກ​ຢູ່​ປະ­ເທດ​ໄທ ເຊິ່ງ​ໃບ​ອະ­ນຸ­ຍາດ​ເຮັດ​ວຽກ​ຈະ​ໝົດ​ອາ­ຍຸ​ໃນ​ວັນ​ທີ 1 ພະ­ຈິກ 2019 ປະ­ກອບ​ມີ ກຸ່ມ​ປະ­ມົງ​ທະ­ເລ ແລະ ແປ​ຮູບ​ສັດ​ນ້ຳ ແລະ ວັນ​ທີ 31 ມີ­ນາ 2020 ພິ­ຈາ­ລະ­ນາ ປັບ­ປຸງ​ບາງ​ເນື້ອ​ໃນ​ຂອງ​ຂໍ້​ຕົກ­ລົງ​ວ່າ​ດ້ວຍ​ການ​ຈ້າງ​ງານ ແລະ ການ​ປະ­ຕິ­ບັດ​ຕາມ​ບົດ​ບັນ­ທຶກ​ຄວາມ​ເຂົ້າ­ໃຈ ເພື່ອ​ເຮັດ​ໃຫ້­ການ​ແກ້​ໄຂ​ບັນ­ຫາ​ແຮງ​ງານ ເປັນ​ໄປ​ຢ່າງ​ມີ​ປະ​ສິດ­ທິ​ຜົນ ແລະ ສົ່ງ­ເສີມ​ການ​ຄຸ້ມ​ຄອງ​ແຮງ​ງານ ທີ່​ໄດ້​ຮັບ​ອະ­ນຸ­ຍາດ​ໃຫ້​ເຮັດ​ວຽກ​ຢ່າງ​ຖືກ­ຕ້ອງ ຈະ​ໄດ້​ຮັບ​ສິດ ແລະ ຜົນ​ປະ­ໂຫຍດ ສະ­ຫວັດ­ດີ​ການ​ຕ່າງໆ ຕາມ​ກົດ­ໝາຍ​ໄທ.

    ຕາມ​ການ​ລາຍ​ງານ​ຂອງ​ຝ່າຍ​ໄທ ໃຫ້​ຮູ້​ຈຳ­ນວນ​ແຮງ​ງານ​ລາວ​ທີ່​ເຮັດ​ວຽກ​ຢູ່​ປະ­ເທດ​ໄທ​ໃນ​ເດືອນ​ເມ­ສາ 2019 ມີ 278.485 ຄົນ ແບ່ງ​ເປັນ​ກຸ່ມ​ແຮງ​ງານ​ຕາມ​ບົດ​ບັນ­ທຶກ 164.831 ຄົນ ກຸ່ມ​ແຮງ​ງານ​ມະ­ຕິ​ຄະ­ນະ​ລັດ­ຖະ­ມົນ­ຕີ ຄັ້ງ​ທີ 16 ມັງ­ກອນ 2018 ແລະ ວັນ​ທີ 27 ມີ­ນາ 2018 ຈຳ­ນວນ 59.746 ຄົນ ກຸ່ມ​ແຮງ​ງານ​ທີ່​ຜ່ານ​ການ​ປັບ​ສະ­ຖາ­ນະ​ພາບ 53.623 ຄົນ ແລະ ກຸ່ມ​ແຮງ​ງານ​ທີ່​ຂຶ້ນ​ທະ­ບຽນ​ຕາມ​ກົດ­ໝາຍ​ວ່າ​ດ້ວຍ​ການ​ປະ­ມົງ 285 ຄົນ.

ຂ່າວທີ່ກ່ຽວຂ້ອງ