ຂ່າວຫຼ້າສຸດ

ກ້າເບ້ຍໄມ້ຂາຍ ສ້າງລາຍຮັບ 30 ລ້ານກີບຕໍ່ປີ

523 11 ມິ.ຖ. 2019 ຂ່າວໜ້າ​ໜຶ່ງ
ກ້າເບ້ຍໄມ້ຂາຍ ສ້າງລາຍຮັບ 30 ລ້ານກີບຕໍ່ປີ

    ການ​ກ້າ​ເບ້ຍ​ໄມ້​ຂາຍ​ເປັນ​ອາ­ຊີບ​ໜຶ່ງ​ທີ່​ຖືກ­ຕ້ອງ​ຕາມ​ກົດ­ໝາຍ ແລະ ຕ້ອງ​ເປັນ​ບຸກ­ຄົນ​ທີ່​ດຸ­ໝັ່ນ ມັກ​ຮັກ​ໃນ​ການ​ປູກ­ຝັງ ເຊິ່ງ​ນາງ ນຸດ ເໝືອນ​ສິດ­ທິ​ດາ ບ້ານ​ຕາດ​ທອງ ເມືອງ​ສີ​ໂຄດ​ຕະ­ບອງ ນະ­ຄອນ­ຫຼວງ​ວຽງ​ຈັນ ເປັນ​ບຸກ­ຄົນ​ໜຶ່ງ​ທີ່​ຢຶດ​ອາ­ຊີບ​ກ້າ​ເບ້ຍ​ໄມ້​ຂາຍ ເພື່ອ​ສ້າງ​ລາຍ​ຮັບ​ໃຫ້​ກັບ​ຄອບ­ຄົວ ແລະ ນຳ­ພາ​ຕົນ​ເອງ​ຫຼຸດ​ພົ້ນ​ອອກ​ຈາກ​ຄວາມ­ທຸກ​ຍາກ​ເທື່ອ​ລະ​ກ້າວ.

    ນາງ ນຸດ ເໝືອນ​ສິດ­ທິ​ດາ ໃຫ້​ສຳ­ພາດ​ວັນ​ທີ 5 ມິ­ຖຸ­ນາ 2019 ໂອ­ກາດ​ທີ່​ເຂົ້າ​ຮ່ວມ​ງານ​ວາງ­ສະ­ແດງ​ຕົ້ນ­ໄມ້ ແລະ ເບ້ຍ​ໄມ້ ປະ­ຈຳ​ປີ 2019 ຈັດ​ຂຶ້ນ​ທີ່​ເດີ່ນ​ພະ​ທາດ­ຫຼວງ​ວຽງ​ຈັນ​ວ່າ: ຕົນ​ເອງ​ໄດ້​ເລີ່ມ​ກ້າ​ເບ້ຍ​ໄມ້​ຂາຍ​ມາ​ແຕ່​ປີ 2014 ເປັນ­ຕົ້ນ​ມາ ໂດຍ​ໄດ້​ສືບ​ທອດ​ວິ­ທີ​ການ​ກ້າ​ເບ້ຍ​ໄມ້​ມາ​ຈາກ​ແມ່​ຍ່າ ມີ​ເນື້ອ­ທີ່​ປະ­ມານ 1 ເຮັກ­ຕາ ປະ­ກອບ​ມີ​ປະ­ເພດ​ເບ້ຍ​ຜັກ ພືດ​ສວນ​ຄົວ ໄມ້​ໃຫ້​ໝາກ ແລະ ເບ້ຍ​ໄມ້​ອຸດ­ສາ­ຫະ­ກຳ ປະ­ມານ 40-50 ຊະ­ນິດ ມີ​ລາ­ຄາ​ຂາຍ​ແຕ່ 2.000-100.000 ກີບ ສາ­ມາດ​ສ້າງ​ລາຍ​ຮັບ​ໃຫ້​ກັບ​ຄອບ­ຄົວ ສະ­ເລ່ຍ 30 ລ້ານ​ກີບ​ຕໍ່​ປີ ແລະ ໃນ​ງານ​ວາງ­ສະ­ແດງ​ເບ້ຍ​ໄມ້ ແລະ ຕົ້ນ­ໄມ້​ຄັ້ງ​ນີ້​ໄດ້​ນຳ​ເບ້ຍ​ໄມ້ ແລະ ຕົ້ນ­ໄມ້​ມາ​ວາງ­ສະ­ແດງ​ຈຳ­ໜ່າຍ​ມູນ​ຄ່າ​ຫຼາຍ​ກວ່າ 10 ລ້ານ​ກີບ.

    ນາງ ນຸດ ເໝືອນ​ສິດ­ທິ​ດາ ໃຫ້​ຮູ້​ຕື່ມ​ອີ​ກວ່າ: ໃນ​ໄລ­ຍະ​ຜ່ານ​ມາ ກໍ​ຄື ປັດ­ຈຸ­ບັນ ພະ​ແນກ​ກະ­ສິ­ກຳ ແລະ ປ່າ­ໄມ້​ນະ­ຄອນ­ຫຼວງ​ວຽງ​ຈັນ ກໍ​ຄື ຫ້ອງ­ການ​ກະ­ສິ­ກຳ ແລະ ປ່າ­ໄມ້ ເມືອງ​ສີ​ໂຄດ​ຕະ­ບອງ ໄດ້​ໃຫ້​ທິດ​ຊີ້​ນຳ​ກ້າ​ປະ­ເພດ​ເບ້ຍ​ໄມ້​ທີ່​ຊາວ​ກະ­ສິ­ກອນ ກໍ​ຄື ຊາວ​ສວນ ແລະ ປະ­ຊາ­ຊົນ​ທົ່ວ​ໄປ​ກຳ­ລັງ​ນິ­ຍົມ​ກັນ​ປູກ ພ້ອມ​ນັ້ນ​ຍັງ​ໄດ້​ເຊີນ​ເຂົ້າ​ຮ່ວມ​ງານ​ວາງ­ສະ­ແດງ​ເບ້ຍ​ໄມ້​ໃນ​ແຕ່​ລະ​ປີ ຫຼື ແຕ່​ລະ​ໄລ­ຍະ​ທີ່​ພາກ­ສ່ວນ​ກ່ຽວ­ຂ້ອງ​ຈັດ​ຂຶ້ນ ເຊິ່ງ​ໄດ້​ເຮັດ​ໃຫ້​ຮ້ານ​ຂາຍ​ເບ້ຍ​ໄມ້​ຂອງ​ຕົນ ໄດ້​ເປັນ​ທີ່​ຮູ້­ຈັກ​ຂອງ​ສັງ­ຄົມ​ຢູ່​ນະ­ຄອນ­ຫຼວງ​ວຽງ​ຈັນ​ຢ່າງ​ກວ້າງ­ຂວາງ ແລະ ທ່ານ​ໃດ​ມີ​ຄວາມ​ສົນ­ໃຈ​ຢາກ​ໄດ້​ເບ້ຍ​ໄມ້ ໄປ​ປູກ​ສາ­ມາດ​ຊື້​ໄດ້​ຢູ່​ຮ້ານ​ຈຳ­ໜ່າຍ​ປ້າ​ຄຳ​ຫຼ້າ ທີ່​ບ້ານ​ໜອງ​ດາ ແລະ ຢູ່​ສວນ​ຕາດ​ທອງ ເມືອງ​ສີ​ໂຄດ​ຕະ­ບອງ ນະ­ຄອນ­ຫຼວງ​ວຽງ​ຈັນ ມີ​ເບ້ຍ​ໄມ້​ຫຼາຍ​ຊະ­ນິດ​ໃຫ້​ເລືອກ​ຊື້​ເພື່ອ​ນຳ­ໄປ​ປູກ.

ຂ່າວທີ່ກ່ຽວຂ້ອງ