ຂ່າວຫຼ້າສຸດ

ເປຕັງ ຊີງເງິນລາງວັນລວມ 200 ລ້ານກີບ ເລື່ອນຈັດແຂ່ງຂັນໄປທ້າຍປີ

463 11 ມິ.ຖ. 2019 ວົງຈອນກີລາ
ເປຕັງ ຊີງເງິນລາງວັນລວມ 200 ລ້ານກີບ ເລື່ອນຈັດແຂ່ງຂັນໄປທ້າຍປີ

    ພິ­ທີ​ຖະ­ແຫຼງ​ຂ່າວ​ເລື່ອນ​ການ​ແຂ່ງ­ຂັນ​ກີ­ລາ​ເປ​ຕັງ ຊີງ​ຂັນ​ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນະ­ຄອນ­ຫຼວງ​ວຽງ​ຈັນ (ສສກ ນວ) ທ່ານ​ເຈົ້າ­ເມືອງ​ສີ​ໂຄດ​ຕະ­ບອງ ປະ­ທານ​ແນວ​ລາວ​ສ້າງ​ຊາດ ປະ­ທານ​ສະ­ຫະ­ພັນ​ເປ​ຕັງ ນວ ແລະ ບໍ­ລິ­ສັດ ມິ​ດີ​ທອບ​ລາວ ຈຳ­ກັດ ຊີງ​ເງິນ​ລາ­ງວັນ​ລວມ 200 ລ້ານ​ກວ່າ​ກີບ ຈັດ​ຂຶ້ນ​ວັນ​ທີ 7 ມິ­ຖຸ­ນາ 2019 ຢູ່​ສວນ​ອາ­ຫານ​ຕາດ​ປ່າ​ໄລ່ ບ້ານ​ຈຳ­ປາ ເມືອງ​ສີ​ໂຄດ​ຕະ­ບອງ ໂດຍ​ມີ​ທ່ານ ສົມ​ພອນ ສອນ​ດາ­ລາ ຮອງ​ຫົວ­ໜ້າ​ພະ​ແນກ ສສກ ນວ ທ່ານ ຈ້າວ​ຂາຍ​ເຈີ ປະ­ທານ​ບໍ­ລິ­ສັດ ມິ​ດີ​ທອບ​ລາວ ຈຳ­ກັດ ພ້ອມ​ດ້ວຍ​ທີ່​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ຈ້າວ​ຂາຍ​ເຈີ ກ່າວ​ວ່າ: ເຫດ­ຜົນ​ໃນ​ການ​ເລື່ອນ​ການ​ແຂ່ງ­ຂັນ​ຄັ້ງ​ນີ້ ຍ້ອນ​ຕົນ​ເອງ​ບໍ່​ເຂົ້າ­ໃຈ ກ່ຽວ​ກັບ​ສະ­ພາບ​ອາ­ກາດ​ຢູ່ ສປປ ລາວ ອີກ​ດ້ານ​ໜຶ່ງ​ກໍ​ຫາ​ຈະ​ມາ​ສຳ​ປະ­ທານ​ສວນ​ອາ­ຫານ​ແຫ່ງ​ນີ້ ຈຶ່ງ​ຕ້ອງ­ການ​ປັບ­ປຸງ​ຫຼາຍ​ດ້ານ ເພື່ອ​ເຮັດ​ໃຫ້​ປະ­ຊາ­ຊົນ​ພາ​ຄອບ­ຄົວ​ມາ​ຫຼິ້ນ​ມາ​ທ່ຽວ ແລະ ພັກ­ຜ່ອນ​ໄດ້​ມີ​ຄວາມ​ສະ­ໜຸກ​ສະ​ໜານ​ມ່ວນ­ຊື່ນ ຈຶ່ງ​ໄດ້​ປືກ​ສາ​ຫາ­ລື​ກັນ​ເລື່ອນ​ການ​ແຂ່ງ­ຂັນ ໄປ​ຈັດ​ໃນ​ເດືອນ​ທັນ­ວາ 2019 ເຊິ່ງ​ມື້​ນັ້ນ​ຈະ​ຈັດ​ຫຼາຍໆ​ກິດ­ຈະ­ກຳ ເປັນ­ຕົ້ນ​ການ­ສະ­ແດງ​ສິ­ລະ​ປະ ຮ້ອງ­ເພງ ແລະ ກິດ­ຈະ­ກຳ​ອື່ນໆ ເພື່ອ​ເປັນ​ສ້າງ​ຂະ​ບວນ​ການ​ສະ­ເຫຼີມ­ສະ­ຫຼອງ​ປີ​ທ່ອງ​ທ່ຽວ ລາວ-ຈີນ 2019 ແລະ ວັນ​ສຳ­ຄັນ​ຕ່າງໆ​ຂອງ​ຊາດ ເວົ້າ​ສະ­ເພາະ​ວັນ­ຊາດ​ທີ 2 ທັນ­ວາ 2019.

    ການ​ແຂ່ງ­ຂັນ​ລາຍ­ການ​ດັ່ງ­ກ່າວ ມີ 5 ລາຍ­ການ ຄື: ປະ­ເພດ​ທີມ​ຊຸດ​ຊາຍ​ທົ່ວ​ໄປ ຊີງ​ຂັນ​ປະ­ທານ​ບໍ­ລິ­ສັດ ມິ​ດີ​ທອບ​ລາວ ພ້ອມ​ເງິນ​ລາ­ງວັນ 100 ລ້ານ​ກີບ ເຊິ່ງ​ຫ້າມ​ບໍ່​ໃຫ້​ທີມ​ຊາດ ແລະ ນັກ­ກີ­ລາ​ເຂົ້າ​ຮ່ວມ​ອຸ­ດົມ​ໄຊ ເກມ 2014 ເຂົ້າ​ຮ່ວມ ທີ 2 ໄດ້​ຮັບ​ລາ­ງວັນ 50 ລ້ານ​ກີບ ທີ 3 ໄດ້​ຮັບ​ລາ­ງວັນ 30 ລ້ານ​ກີບ ປະ­ເພດ​ທີມ​ຍິງ ຮຸ່ນ​ທົ່ວ​ໄປ ຊີງ​ຂັນ​ເຈົ້າ­ເມືອງ​ສີ​ໂຄດ​ຕະ­ບອງ ພ້ອມ​ເງິນ​ລາ­ງວັນ 10 ລ້ານ​ກີບ ທີ 2 ໄດ້​ຮັບ​ລາ­ງວັນ 5 ລ້ານ​ກີບ ທີ 3 ໄດ້​ຮັບ​ລາ­ງວັນ 3 ລ້ານ​ກີບ ປະ­ເພດ​ທີມ​ຊາຍ​ຮຸ່ນ​ອາ­ຍຸ​ບໍ່​ເກີນ 18 ປີ ຊີງ​ຂັນ​ຫົວ­ໜ້າ​ພະ​ແນກ ສສກ ນວ ທີ 1 ໄດ້​ຮັບ​ລາ­ງວັນ 10 ລ້ານ​ກີບ ທີ 2 ໄດ້​ຮັບ​ລາ­ງວັນ 5 ລ້ານ​ກີບ ທີ 3 ໄດ້​ຮັບ​ລາ­ງວັນ 3 ລ້ານ​ກີບ.

    ສ່ວນ​ປະ­ເພດ​ທີມ​ຊາດ ແລະ ສາຍ​ກີ­ລາ​ແຫ່ງ​ຊາດ ຊີງ​ຂັນ​ປະ­ທານ​ສະ­ຫະ­ພັນ​ເປ​ຕັງ ນວ ທີ 1 ໄດ້​ຮັບ​ລາ­ງວັນ 10 ລ້ານ​ກີບ ທີ 2 ໄດ້​ຮັບ​ລາ­ງວັນ 5 ລ້ານ​ກີບ ທີ 3 ໄດ້​ຮັບ​ລາ­ງວັນ 3 ລ້ານ​ກີບ ແລະ ຮຸ່ນ​ອາ­ວຸ­ໂສ ອາ­ຍຸ 50 ປີ ຂຶ້ນ​ໄປ ຊີງ​ຂັນ​ປະ­ທານ​ແນວ​ລາວ​ສ້າງ​ຊາດ ນວ ທີ 1 ໄດ້​ຮັບ​ລາ­ງວັນ 10 ລ້ານ​ກີບ ທີ 2 ໄດ້​ຮັບ​ລາ­ງວັນ 5 ລ້ານ​ກີບ ທີ 3 ໄດ້​ລາ­ງວັນ 3 ລ້ານ​ກີບ.

ຂ່າວທີ່ກ່ຽວຂ້ອງ