ຂ່າວຫຼ້າສຸດ

ໂມນ​ໂດ​ວາ ປະ​ເຊີນ​ກັບ​ວິ​ກິດ​ການ​ທາງການເມືອງ

243 11 ມິ.ຖ. 2019 ຂ່າວຕ່າງປະເທດ
ໂມນ​ໂດ​ວາ ປະ​ເຊີນ​ກັບ​ວິ​ກິດ​ການ​ທາງການເມືອງ

    ທ່ານ ປາ​ແວນ ຟີ​ລິບ ຮັກສາ​ການ​ນາຍົກລັດຖະມົນຕີ​ຂອງ​ໂມນ​ໂດ​ວາ ຜູ້​ຊຶ່ງ​ໄດ້​ຮັບ​ການ​ບົ່ງ​ຕົວ​ໃຫ້​ເປັນ​ປະທານາທິບໍດີ ໃນ​ວັນ​ທີ 9 ມິຖຸນາ​ນີ້ ໄດ້​ລົງ​ນາມ​ໃນ​ດຳລັດ ວ່າ​ດ້ວຍ​ການ​ຍຸບ​ສະພາ​ແຫ່ງ​ຊາດ  ແລະ​ກຳນົດ​ການຈັດຕັ້ງ​ການ​ເລືອກ​ຕັ້ງ​ກ່ອນ​ກຳນົດ ໃນ​ວັນ​ທີ 6 ກັນຍາ​ໜ້າ​ນີ້.

    ຫຼັງ​ຈາກ​ນັ້ນ ສະພາ​ແຫ່ງ​ຊາດ​ໂມນ​ໂດ​ວາ ໄດ້​ຮັບຮອງ​ຖະແຫຼງການ ໂດຍ​ຖື​ວ່າ ລັດຖະບານ​ພາຍ​ໃຕ້​ການ​ນຳພາ​ຂອງ​ທ່ານ ປາ​ແວນ ຟີ​ລິບ ເປັນ​ເລື່ອງ​ທີ່ “ບໍ່​ຖືກຕ້ອງ​ຕາມ​ລັດ​ຖະ​ທຳ​ມະນູນ” ພ້ອມ​ທັງ​ຖື​ວ່າ ພັກ​ປະຊາທິປະໄຕ ມີ​ການ​ກະທຳ “ສວມ​ອຳນາດ” ແລະ ​ສະເໜີ​ໃຫ້​ສະພາ​ຄວາມ​ໝັ້ນຄົງ ສະຫະ​ປະຊາ​ຊາດ ພິຈາລະນາ​ບັນຫາ​ນີ້.

    ທ່ານ ປາ​ແວນ ຟີ​ລິບ ມີ​ການ​ກະທຳ​ດັ່ງກ່າວ​ອອກ​ມາ ຫຼັງ​ຈາກ​ທີ່​ກ່ອນ​ໜ້າ​ນັ້ນ ສານ​ລັດ​ຖະ​ທຳ​ມະນູນ​ຂອງ​ໂມນ​ໂດ​ວາ ໄດ້​ຕັດສິນ​ໃຫ້​ງົດ​ໜ້າທີ່​ຕຳແໜ່ງ​ຂອງ​ປະທານາທິບໍດີ ອີ​ກໍ ໂດ​ດອນ ແລະ​ບົ່ງ​ຕົວ​ໃຫ້​ທ່ານ ປາ​ແວນ ຟີ​ລິບ ເປັນ​ປະທານາທິບໍດີ​ຊົ່ວຄາວ.

    ໂມນ​ໂດ​ວາ ຕົກ​ຢູ່​ໃນ​ວິ​ກິດ​ການທາງ​ການເມືອງ ຫຼັງ​ຈາກ​ການ​ເລືອກ​ຕັ້ງ​ສະພາ​ແຫ່ງ​ຊາດ​ເມື່ອ​ວັນ​ທີ 24 ກຸມພາ​ທີ່​ຜ່ານ​ມາ ຊຶ່ງ​ຜົນ​ການ​ເລືອກ​ຕັ້ງ​ທີ່​ອອກ​ມາ ຊີ້​ໃຫ້​ເຫັນ​ວ່າ ບໍ່​ມີ​ພັກ​ການເມືອງ​ໃດ ກວມ​ທີ່​ນັ່ງ​ສ່ວນ​ຫຼາຍ ຢູ່​ໃນ​ອົງການ​ນິຕິບັນຍັດ​ຂອງ​ໂມນ​ໂດ​ວາ.

    ໃນ​ການ​ເລືອກ​ຕັ້ງ​ນັ້ນ ພັກ​ສັງຄົມ​ນິຍົມ ໂມນ​ໂດ​ວາ (PSRM) ຍາດ​ໄດ້​ບັດ​ຄະແນນ​ສຽງ​ສະໜັບສະໜູນ​ສູງ​ສຸດ ໂດຍ​ໄດ້ 35 ທີ່​ນັ່ງ ຈາກ​ທັງ​ໝົດ 101 ທີ່​ນັ່ງ​ໃນ​ສະພາ​ແຫ່ງ​ຊາດ​ຊຸດ​ໃໝ່ ຮອງ​ລົງ​ມາ​ແມ່ນ​ພັກ​ປະຊາທິປະໄຕ​ໂມນ​ໂດ​ວາ (DPM) ທີ່​ເປັນ​ພັກ​ກຳ​ອຳນາດ ແລະ ເປັນ​ມິດ​ກັບ​ຝ່າຍ​ຕາເວັນຕົກ ຍາດ​ໄດ້  30 ທີ່​ນັ່ງ ອັນ​ດັບ​ຕໍ່​ມາ​ກໍ​ແມ່ນ​ສະຫະພາບ​ຝ່າຍ​ຂວາ ASUM ທີ່​ເປັນ​ຝ່າຍ​ຄ້ານ ຍາດ​ໄດ້ 26 ທີ່​ນັ່ງ ແລະ​ພັກ “Sor” ຍາດ​ໄດ້ 7 ທີ່​ນັ່ງ ໃນ​ຂະນະ​ທີ່ 3 ທີ່​ນັ່ງ​ທີ່​ຍັງ​ເຫຼືອ ເປັນ​ຂອງ​ບັນດາ​ຜູ້​ສະໝັກ​ຮັບ​ເລືອກ​ຕັ້ງ​ເອກະລາດ.

    ຫຼັງ​ຈາກ​ທີ່​ໄດ້​ເຈລະຈາ​ມາ​ເປັນ​ເວລາ​ຫຼາຍ​ເດືອນ PSRM ທີ່​ມີ​ແນວທາງ​ສະໜັບສະໜູນ​ການ​ພົວພັນ​ທີ່​ແໜ້ນ​ແຟ້ນ​ກັບ​ຣັດ​ເຊຍ ແລະ ASUM ທີ່​ໃຫ້ການ​ສະໜັບສະໜູນ​ສະຫະພາບ​ເອີ​ຣົບ (EU) ກໍ​ໄດ້​ເຫັນ​ດີ​ສ້າງຕັ້ງ​ພັນທະ​ພາບ​ນຳ​ກັນ ໂດຍ​ມີ​ເປົ້າ​ໝາຍ​ກໍ​ແມ່ນ​ປະ​ເຊີນ​ໜ້າ​ກັບ DPM ຊຶ່ງ​ມີ​ຂະໜາດ​ໃຫຍ່​ເປັນ​ອັນ​ດັບ​ສອງ​ໃນ​ສະພາ​ແຫ່ງ​ຊາດ.

    ສະພາ​ແຫ່ງ​ຊາດ​ໂມນ​ໂດ​ວາ ໄດ້​ຮັບຮອງ​ພັນທະ​ພາບ​ດັ່ງກ່າວ ເມື່ອ​ວັນ​ທີ 8 ມິຖຸນາ​ທີ່​ຜ່ານ​ມາ ການ​ດຳເນີນ​ການ​ດັ່ງກ່າວ ຖືກ​ຖື​ວ່າ​ຈະ​ເປັນ​ການ​ເປີດ​ທາງ​ໃຫ້​ແກ່​ການ​ແກ້​ໄຂ​ວິ​ກິດ​ການ​ການເມືອງ ແຕ່​ແລ້ວ DPM ໄດ້​ສະເໜີ​ໄປ​ຍັງ​ສານ​ລັດ​ຖະ​ທຳ​ມະນູນ ໃຫ້​ງົດ​ໜ້າທີ່​ຕຳແໜ່ງ​ຂອງ​ປະທານາທິບໍດີ ໂດ​ດອນ.

ຂ່າວທີ່ກ່ຽວຂ້ອງ