ຂ່າວຫຼ້າສຸດ

ສະພາບ​ອາກາດ​ຮ້ອນ​ຫຼາຍ​ຢູ່​ໃນ​ອິນ​ເດຍ

184 11 ມິ.ຖ. 2019 ຂ່າວຕ່າງປະເທດ
ສະພາບ​ອາກາດ​ຮ້ອນ​ຫຼາຍ​ຢູ່​ໃນ​ອິນ​ເດຍ

    ອິນ​ເດຍ ພວມ​ປະ​ເຊີນ​ກັບ​ສະພາບ​ອາກາດ​ຮ້ອນ​ອົບເອົ້າ ແກ່ຍາວ​ມາ​ເປັນ​ເວລາ​ກວ່າ​ໜຶ່ງ​ອາທິດ ໂດຍ​ທີ່​ແທກ​ອຸ່ນ​ຫະ​ພູມ​ໄດ້​ສູງ​ເກີນ 50 ອົງສາ C ຢູ່​ໃນ​ຫຼາຍ​ລັດ ສົ່ງ​ຜົນ​ໃຫ້​ເກີດ​ມີ​ການ​ໃຊ້​ຄວາມ​ຮຸນ​ແຮງ ລະຫວ່າງ​ທີ່​ຍາດ​ແຍ່ງ​ເອົາ​ນ້ຳ.

    ສື່ສານ​ໃນ​ທ້ອງຖິ່ນ​ໃຫ້​ຮູ້​ວ່າ ຢູ່​ໃນ​ນະຄອນ ຈູ​ຣູ ທີ່​ຂຶ້ນ​ກັບ​ລັດ ຣາ​ຊາ​ສະຖານ ແທກ​ອຸ່ນ​ຫະ​ພູມ​ໃນ​ອາກາດ​ໄດ້​ສູງ​ກວ່າ 50 ອົງສາ C ຊຶ່ງ​ເປັນ​ຕົວ​ເລກ​ທີ່​ເກືອບ​ແຕະ​ຂອບ​ສູງ 51 ອົງສາ C ທີ່​ເຄີຍ​ແທກ​ໄດ້​ຢູ່​ໃນ​ອິນ ໃນ​ຂະນະ​ດຽວ​ກັນ ອຸ່ນ​ຫະ​ພູມ​ຢູ່​ໃນ​ລັດ ມັດ​ຢາ ປຣາ​ເດ​​ສ ແທກ​ໄດ້ 46 ອົງສາ C.

    ສະພາບ​ອາກາດ​ຮ້ອນ​ອົບເອົ້າ ແລະ ມີ​ຄວາມ​ຮຸນ​ແຮງ ໄດ້​ເປັນ​ຜົນ​ກະທົບ​ບໍ່​ໜ້ອຍ​ຕໍ່​ການ​ດຳລົງ​ຊີວິດ​ຂອງ​ປະຊາຊົນ ລວມ​ເຖິງ​ສັດ ຢູ່​ໃນ​ອິນ​ເດຍ ມີ​ຂ່າວ​ວ່າ ລີງ​ປະມານ 15 ໂຕ ຢູ່​ໃນ​ຝູງ​ໜຶ່ງ​ທີ່​ປະກອບ​ມີ 30-35 ໂຕ ຢູ່​ໃນ​ພື້ນ​ທີ່​ປ່າ ໂຈ​ຊິ ບາ​ບາ ໃນ​ລັດ ມັດ​ຢາ ປຣາ​ເດ​​ສ ນັ້ນ​ໄດ້​ຕາຍ​ໄປ ບັນດາ​ຊ່ຽວຊານ​ດ້ານ​ສັດຕະວະແພດ ຢືນຢັນ​ວ່າ​ພວກ​ລີງ​ເຫຼົ່ານັ້ນ ອາດ​ຈະ​ຕາຍ​ຍ້ອນ​ເມົາ​ອາກາດ​ຮ້ອນ.

    ອາກາດ​ແຫ້ງ​ຍັງ​ເຮັດ​ໃຫ້​ປະລິມານ​ນ້ຳ​ສະ​ສົມ​ຢູ່​ໃຕ້​ດິນ​ຫຼຸດ​ລົງ ພ້ອມ​ກັນ​ນັ້ນ​ກໍ​ນຳໄປ​ສູ່​ການ​ເກີດ​ເຫດການ​ຮຸນ​ແຮງ ຍ້ອນ​ການ​ພິພາດ​ແຫຼ່ງ​ນ້ຳ ຊາຍ​ຄົນ​ໜຶ່ງ​ອາຍຸ 33 ປີ ຢູ່​ໃນ​ລັດ ທະມິນ ນາ​ດູ ໄດ້​ເສຍ​ຊີວິດ​ລະຫວ່າງ​ທີ່​ເກີດ​ການ​ຍາດ​ແຍ່ງ​ເອົາ​ນ້ຳ ໃນ​ຂະນະ​ດຽວ​ກັນ ຢູ່​ໃນ​ລັດ ຈາ​ຄານ ມີ​ຊາຍ​ຄົນ​ໜຶ່ງ​ໄດ້​ໃຊ້​ຄວາມ​ຮຸນ​ແຮງ ໂດຍ​ໃຊ້​ອາວຸດ​ແທງ​ໃສ່ 6 ຄົນ ໃນ​ເວລາ​ທີ່​ຍາດ​ເອົາ​ນ້ຳ​ຈາກ​ລົດ​ຂົນສົ່ງ​ນ້ຳ​ຄັນ​ໜຶ່ງ.

ຂ່າວທີ່ກ່ຽວຂ້ອງ