ສ ອາ​ເມ​ຣິ​ກາ ປະກາດ​ມາດ​ຕະການ​ປິດ​ລ້ອມ​ຕໍ່​ຂະແໜງການ​ເປ​ໂຕຣ​ເຄ​ມີ​ ຂອງ​ອີ​ຣານ

227 11 ມິ.ຖ. 2019 ຂ່າວຕ່າງປະເທດ
ສ ອາ​ເມ​ຣິ​ກາ ປະກາດ​ມາດ​ຕະການ​ປິດ​ລ້ອມ​ຕໍ່​ຂະແໜງການ​ເປ​ໂຕຣ​ເຄ​ມີ​ ຂອງ​ອີ​ຣານ

    ໃນ​ຖະແຫຼງການ​ທີ່​ມີ​ອອກ​ມາ​ເມື່ອ​ວັນ​ທີ 7 ມິຖຸນາ​ທີ່​ຜ່ານ​ມາ ລັດຖະມົນຕີ​ການ​ເງິນ ສ ອາ​ເມ​ຣິ​ກາ ສະ​ເຕ​ເວນ ມະນູ​ຊິນ ໃຫ້​ຮູ້​ວ່າ ບັນດາ​ມາດ​ຕະການ​ປິດ​ລ້ອມ​ເພີ່ມ​ເຕີມ​ຂອງ ສ ອາ​ເມ​ຣິ​ກາ ທີ່​ແນໃສ່​ກຸ່ມ​ບໍລິສັດ​ເປ​ໂຕຣ​ເຄ​ມີ Persian Gulf Petrochemical Industries Company (PGPIC) ຍ້ອນ​ວ່າ​ບໍລິສັດ​ນີ້​ໃຫ້​ຄວາມ​ຊ່ວຍເຫຼືອ​ການ​ເງິນ​ໃຫ້​ແກ່ ກອງ​ກຳລັງ​ທະຫານ ປ້ອງ​ກັນ​ການ​ປະຕິວັດ​ອິດ​ສະ​ລາມ (IRGC) ຊຶ່ງ​ເປັນ​ກອງ​ກຳລັງ​ຮັບຜິດຊອບ​ໂຄງການ​ພັດທະນາ​ລູກ​ສອນ​ໄຟ ນຳ​ວິຖີ ແລະ​ ນີວ​ເຄລຍ ຂອງ​ອີ​ຣານ.

    ກະຊວງ​ການ​ເງິນ ສ ອາ​ເມ​ຣິ​ກາ ໃຫ້​ຮູ້​ວ່າ PGPIC ປະກອບ​ດ້ວຍ​ເຄືອ​ຂ່າຍ​ທີ່​ປະກອບ​ມີ ບໍລິສັດ​ເປ​ໂຕຣ​ເຄ​ມີ 39 ແຫ່ງ ແລະ ​ບໍລິສັດ​ທີ່​ເປັນ​ຕົວ​ແທນ​ຈຳໜ່າຍ​ສິນຄ້າ​ຫຼາຍ​ແຫ່ງ ຢູ່​ຕ່າງປະເທດ.

    ປະລິມານ​ການ​ຜະລິດ​ຂອງ PGPIC ແລະ ​ບັນດາ​ບໍລິສັດ​ລູກ​ຂອງ​ກຸ່ມ​ບໍລິສັດ​ນີ້ ກວມ​ເອົາ  40% ຂອງ​ການ​ຜະລິດ​ເປ​ໂຕຣ​ເຄ​ມີ​ຂອງ​ອີ​ຣານ ແລະ​ ກວມ​ເອົາ 50% ຂອງ​ຍອດ​ຜະລິດ​ຕະ​ພັນ​ເປ​ໂຕຣ​ເຄ​ມີ ເພື່ອ​ການ​ສົ່ງ​ອອກ​ຂອງ​ອີ​ຣານ.

    ກ່ອນ​ໜ້າ​ນີ້ ເມື່ອ​ເດືອນ​ເມສາ​ທີ່​ຜ່ານ​ມາ ສ ອາ​ເມ​ຣິ​ກາ ໄດ້​ຈັດ​ເອົາ IRGC ເຂົ້າ​ໄປ​ໃນ​ບັນຊີ​ອົງການ​ກໍ່​ການ​ຮ້າຍ​ຕ່າງປະເທດ ຕາມ​ນັ້ນແລ້ວ ຜູ້​ທີ່​ມີ​ການ​ພົວພັນ​ເຮັດ​ທຸລະ​ກິດ​ກັບ IRGC ອາດ​ຈະ​ຮັບ​ໂທດ​ຈຳ​ຄຸກ​ເປັນ​ເວລາ 20 ປີ ຕາມ​ກົດໝາຍ​ຂອງ ສ ອາ​ເມ​ຣິ​ກາ.

ຂ່າວທີ່ກ່ຽວຂ້ອງ