ຂ່າວຫຼ້າສຸດ

ສ ອາ​ເມ​ຣິ​ກາ - ເມັກ​ຊິກ ບັນລຸ​ຂໍ້​ຕົກລົງ​ກ່ຽວ​ກັບ​ຜູ້​ຍ້າຍ​ຖິ່ນ​ຖານ

241 11 ມິ.ຖ. 2019 ຂ່າວຕ່າງປະເທດ
ສ ອາ​ເມ​ຣິ​ກາ - ເມັກ​ຊິກ ບັນລຸ​ຂໍ້​ຕົກລົງ​ກ່ຽວ​ກັບ​ຜູ້​ຍ້າຍ​ຖິ່ນ​ຖານ

  ປະທານາທິບໍດີ ສ ອາ​ເມ​ຣິ​ກາ ໂດ​ນາ​​ລ ທຣຳ ແຈ້ງ​ໃຫ້​ຮູ້ເມື່ອ​ວັນ​ທີ 7 ມິຖຸນາ​ທີ່​ຜ່ານ​ມາ ວ່າ​ທ່ານ​ໄດ້​ງົດ​ແຜນການ​ປະຕິບັດ​ພາສີ​ເພີ່ມ​ເຕີມ​ຕໍ່​ສິນຄ້າ​ຂອງ​ເມັກ​ຊິກ ທີ່​ມີ​ກຳນົດ​ເລີ່ມ​ແຕ່​ວັນ​ທີ 10 ມິຖຸນາ​ນີ້​ເປັນຕົ້ນ​ໄປ ນັ້ນ​ຢ່າງ​ບໍ່​ມີ​ກຳນົດ ຫຼັງ​ຈາກ​ທີ່​ສອງ​ຝ່າຍ​ບັນລຸ​ຂໍ້​ຕົກລົງ​ສະບັບ​ໜຶ່ງ ກ່ຽວ​ກັບ​ຜູ້​ເຂົ້າ​ເມືອງ​ຕັ້ງ​ຖິ່ນ​ຖານ.

    ປະທານາທິບໍດີ ທຣຳ ລົງ​ພິມ​ຂໍ້ຄວາມ​ຜ່ານ​ສື່​ສັງຄົມ Twitter ວ່າ​ທາງ​ຝ່າຍ​ເມັກ​ຊິກ ໄດ້​ເຫັນ​ດີ​ນຳ​ເອົາ​ບັນດາ​ມາດ​ຕະການ​ທີ່​ແຂງ​ແກ່ນ​ອອກ​ມາ ເພື່ອ​ສະກັດ​ກັ້ນ​ກະແສ​ຜູ້​ຍ້າຍ​ຖິ່ນ​ຖານ ທີ່​ເດີນທາງ​ຜ່ານ​ປະເທດ​ເມັກ​ຊິກ ແລະ​ມຸ່ງ​ໜ້າ​ໄປ​ຍັງ​ຊາຍ​ແດນ​ທາງ​ທິດໃຕ້​ຂອງ ສ ອາ​ເມ​ຣິ​ກາ ຂໍ້​ຕົກລົງ​ດັ່ງກ່າວ​ໄດ້​ເຮັດ​ສຳເລັດ ເພື່ອ​ຈຳກັດ​ສ່ວນ​ໃຫຍ່ ຫຼື​ຢຸດຕິ​ການ​ຍ້າຍ​ຖິ່ນ​ຖານ​ຢ່າງ​ຜິດ​ກົດໝາຍ ຈາກ​ເມັກ​ຊິກ ເຂົ້າ​ໄປ ສ ອາ​ເມ​ຣິ​ກາ.

    ກ່ອນ​ໜ້າ​ນັ້ນ ໃນ​ວັນ​ດຽວ​ກັນ ສ ອາ​ເມ​ຣິ​ກາ ແລະ ເມັກ​ຊິກ ໄດ້​ເຊື່ອມ​ຕໍ່​ການ​ເຈລະຈາ​ກ່ຽວ​ກັບ​ຜູ້​ຍ້າຍ​ຖິ່ນ​ຖານ ທ່າມກາງ​ທີ່​ສອງ​ຝ່າຍ​ພວມ​ຄືບ​ໜ້າ​ໄປ​ໃກ້​ຂຶ້ນ ກັບ​ການ​ທີ່​ຈະ​ເກີດ​ສົງຄາມ​ການ​ຄ້າ ທີ່​ອາດ​ເປັນ​ຜົນ​ກະທົບ​ໃນ​ທາງ​ລົບ ຕໍ່​ທັງ​ສອງ​ພື້ນຖານ​ເສດ​ຖະ​ກິດ​​ນຳ້.

    ປະທານາທິບໍດີ ທຣຳ ຖະແຫຼງ​ເມື່ອ​ວັນ​ທີ 30 ພຶດສະພາ​ທີ່​ຜ່ານ​ມາ ວ່າ​ນັບ​ແຕ່​ວັນ​ທີ 10 ມິຖຸນາ​ນີ້​ເປັນຕົ້ນ​ໄປ ສ ອາ​ເມ​ຣິ​ກາ​ຈະ​ເກັບ​ພາສີ 5% ກັບ​ສິນຄ້າ​ທີ່​ນຳ​ເຂົ້າ​ຈາກ​ເມັກ​ຊິກ ແລະ ລະດັບ​ພາສີ​ນີ້ ຈະ​ຂຶ້ນ​ໄປ​ສູ່ 25% ພາຍ​ໃນ​ເດືອນ​ຕຸລາ​ທີ່​ຈະ​ມາ​ເຖິງ ຖ້າ​ຫາ​ກວ່າ​ເມັກ​ຊິກ ບໍ່​ມີ​ມາດ​ຕະການ​ຢ່າງ​ແຂງ​ແກ່ນ​ອອກ​ມາ ເພື່ອ​ສະກັດ​ກັ້ນ​ກະແສ​ຜູ້​ຍ້າຍ​ຖິ່ນ​ຖານ ທີ່​ມຸ່ງ​ໜ້າ​ໄປ​ຍັງ ສ ອາ​ເມ​ຣິ​ກາ.

ຂ່າວທີ່ກ່ຽວຂ້ອງ