ຂ່າວຫຼ້າສຸດ

ເຊີດຊູແບບແຜນວິທີເຮັດວຽກ ແບບປະຕິບັດຕາມຫຼັກການ

1.142 10 ມິ.ຖ. 2019 ນານາສາລະ

    ເຫດ­ຜົນ​ທີ່​ຜູ້​ຂຽນ​ຍົກ​ຫົວ­ຂໍ້​ນີ້​ຂຶ້ນ​ມາ ກໍ​ເພື່ອ​ແລກ­ປ່ຽນ​ທັດ­ສະ­ນະ​ແບບ­ແຜນ​ວິ­ທີ​ເຮັດ​ວຽກ ຫຼື ການ​ຄຸ້ມ​ຄອງ​ພະ­ນັກ­ງານ​ໃຫ້​ຖືກ​ຕາມ​ຫຼັກ­ການ​ຂອງ​ລັດ ແລະ ນະ­ໂຍ­ບາຍ​ຂອງ​ພັກ ໝາຍ​ຄວາມ​ວ່າ ບໍ່​ອີງ­ໃສ່​ອັດ​ຕະ​ວິ­ໄສ ຫຼື ອະ­ຄະ­ຕິ​ຄວາມ​ມັກ​ຄວາມ​ຊັງ​ສ່ວນ​ຕົວ ເພາະ​ຖ້າ­ວ່າ​ຫົວ­ໜ້າ​ໜ່ວຍ​ງານ ຫຼື ຜູ້​ບໍ­ລິ­ຫານ​ຫາກ​ເຮັດ​ແນວ​ນີ້ ຍ່ອມ​ເຮັດ​ໃຫ້​ເສຍ​ທັງ​ຄົນ​ດີ ແລະ ຜົນ­ງານ​ຂອງ​ອົງ­ການ​ທີ່​ຄວນ​ຈະ​ໄດ້ ນີ້​ແຫຼະ​ເອີ້ນ​ວ່າ​ຖືກ​ໃຈ​ຕົນ ແຕ່​ບໍ່​ຖືກ​ຫຼັກ­ການ​ທີ່​ຄວນ​ຈະ​ເປັນ.

    ຂ່າວ​ທີ່​ສັງ­ຄົມ​ໄດ້​ຮັບ​ຮູ້​ນຳ​ກັນ ເລື່ອງ​ລັດ­ຖະ­ບານ​ມີ​ນະ­ໂຍ­ບາຍ​ຄັດ​ສັນ ແລະ ຈຳ­ກັດ​ຕົວ​ເລກ​ລັດ­ຖະ­ກອນ​ນັ້ນ ກໍ​ເພື່ອ​ຢາກ​ໃຫ້​ອົງ­ການ​ຂອງ​ລັດ ໄດ້​ນຳ​ໃຊ້​ພະ­ນັກ­ງານ​ທີ່​ຈຳ­ເປັນ​ຕໍ່­ໜ້າ​ວຽກ​ແທ້​ຈິງ ແລະ ໃຫ້​ເກີດ​ປະ­ສິດ­ທິ­ພາບ​ຂອງ​ວຽກ​ງານ ການ​ຫັນ​ໄປ​ສູ່​ການ​ຄັດ​ສັນ​ເອົາ​ພະ­ນັກ­ງານ (ຊັບ­ພະ­ຍາ­ກອນ​ມະ­ນຸດ) ທີ່​ມີ​ຄຸນ​ນະ​ພາບ​ສູງ​ມາ​ຮັບ​ໃຊ້​ວຽກ ຖື​ເປັນ​ນະ­ໂຍ­ບາຍ​ປົກ­ກະ­ຕິ​ຂອງ​ທຸກ​ໜ່ວຍ​ງານ ທັງ​ພາກ​ລັດ ແລະ ເອ­ກະ​ຊົນ ດັ່ງ­ນັ້ນ ຈຶ່ງ​ສະ­ທ້ອນ​ກັບ​ໄປ​ຫາ​ຂະ​ບວນ​ການ​ສຶກ​ສາ ກໍ່­ສ້າງ​ທີ່​ມີ​ຄຸນ​ນະ​ພາບ ວາ­ລະ­ສານ​ກອມ​ມູ​ນິດ​ຂອງ​ຫວຽດ­ນາມ ສະ­ບັບ​ລົງ​ວັນ​ທີ 17/8/2018 ໄດ້​ຕີ​ພິມ​ບົດ​ຂຽນ​ຂອງ ຮສ ປອ ດວ່ານ​ມິງ​ຫວນ ກຳ­ມະ­ການ​ສຳ­ຮອງ​ສູນ​ກາງ​ພັກ ເຊິ່ງ​ເປັນ​ບົດ​ຂຽນ​ກ່ຽວ​ກັບ​ແບບ­ແຜນ​ເປັນ​ວິ­ທະ­ຍາ­ສາດ ມື​ອາ­ຊີບ ປະ­ຊາ­ທິ­ປະ­ໄຕ​ຂອງ​ພະ­ນັກ­ງານ​ຄຸ້ມ​ຄອງ ໃນ​ການ​ກໍ່­ສ້າງ​ປັບ­ປຸງ​ພັກ ຜູ້​ຂຽນ​ຂໍ​ຍົກ​ເອົາ​ບາງ​ເນື້ອ​ໃນ​ມາ​ສະ­ເໜີ​ບາງ​ປະ­ເດັນ ເຊັ່ນ: ເພິ່ນ​ຂຽນ​ວ່າ ເມື່ອ​ສະ­ມາ­ຊິກ​ພັກ ພະ­ນັກ­ງານ​ອ່ອນ­ແອ​ທາງ​ດ້ານ​ແບບ­ແຜນ​ວິ­ທີ​ເຮັດ​ວຽກ ກໍ​ຈະ​ນຳ­ໄປ​ສູ່​ຜົນ​ກະ­ທົບ​ຫຼາຍ​ຢ່າງ ມີ​ຄວາມ​ສ່ຽງ​ທີ່​ຈະ​ປ່ຽນ​ທາດ​ແທ້​ຂອງ​ພັກ... ພະ­ນັກ­ງານ​ຄົນ​ໜຶ່ງ​ຖ້າ​ມີ​ທ່າ​ທີ​ອາດ­ຍາ​ສິດ ກໍ່​ຄວາມ​ຫຍຸ້ງ­ຍາກ ຫຼື ໝິ່ນ­ປະ­ໝາດ​ມະ­ຫາ­ຊົນ ກໍ​ຈະ​ກະ­ທົບ​ທັນ­ທີ​ຕໍ່​ຜົນ​ລົບ​ເຖິງ​ກຽດ​ສັກ​ສີ​ຂອງ​ພັກ.

    ຮສ ປອ ດວ່ານ​ມິງ​ຫວນ ຂຽນ​ຕື່ມ​ວ່າ: ການ​ເຮັດ​ວຽກ​ແບບ​ຕາມ­ໃຈ ຖື​ຄວາມ​ສຳ­ຄັນ​ທາງ​ອາ­ລົມ ຫຼື ຄວາມ​ຄຸ້ນ​ເຄີຍ​ສູງ​ກວ່າ​ຫຼັກ­ການ ລະ­ບຽບ​ວິ­ໄນ ເຮັດ​ແຕ່​ວຽກ​ງ່າຍ ປະ​ວຽກ​ຍາກ ຫຼື ລ່ວງ​ເກີນ​ອຳ­ນາດ​ຂອງ​ຜູ້​ອື່ນ ຫຼື ໜ່ວຍ​ງານ​ອື່ນ ເມື່ອ​ເຫັນ​ວ່າ​ມີ​ຜົນ​ປະ­ໂຫຍດ ບັນ­ຫາ​ດັ່ງ­ກ່າວ​ມັນ​ນຳ​ມາ​ເຊິ່ງ​ການ​ມ້າງ­ເພ​ຫຼັກ­ການ ແລະ ລະ­ບຽບ​ວິ­ໄນ​ຂອງ​ການ­ຈັດ­ຕັ້ງ... ບົດ​ຂຽນ​ດັ່ງ­ກ່າວ ຍັງ​ໄດ້​ເນັ້ນ​ໃຫ້​ພະ­ນັກ­ງານ​ເຊີດ​ຊູ​ວິ­ທີ​ເຮັດ​ວຽກ​ແບບ​ປະ­ຕິ­ບັດ​ຕາມ​ຫຼັກ­ການ ລະ­ບຽບ​ວິ­ໄນ​ຂອງ​ພັກ ຮັບ​ຟັງ​ຄວາມ​ຄິດ​ເຫັນ​ຂອງ​ມະ­ຫາ­ຊົນ​ຂອງ​ຜູ້​ຊ່ຽວ­ຊານ ແລະ ນັກ​ວິ​ທະ ຍາ​ສາດ​ໃຫ້​ຄວາມ​ສຳ­ຄັນ​ແກ່​ການ​ກວດ­ກາ ຕິດ­ຕາມ​ພະ­ນັກ­ງານ​ຄຸ້ມ​ຄອງ​ນຳ­ພາ ພິ­ເສດ​ແມ່ນ​ການ​ພົວ­ພັນ​ກັບ​ປະ­ຊາ­ຊົນ​ກັບ​ຂັ້ນ​ລຸ່ມ ແລະ ກັບ​ຜູ້​ຮ່ວມ​ງານ​ຂັ້ນ​ດຽວ​ກັນ... ຜູ້​ຂຽນ​ຈຶ່ງ​ເຫັນ​ວ່າ ການ​ເປັນ​ພະ­ນັກ­ງານ​ຂອງ​ລັດ​ຕັ້ງ­ແຕ່​ຂັ້ນ​ລຸ່ມ​ຮອດ​ຂັ້ນ​ເທິງ ຍາມ​ໃດ​ຕ້ອງ​ເອົາ­ໃຈ­ໃສ່​ຫຼັກ­ການ ແລະ ແບບ­ແຜນ​ວິ­ທີ​ເຮັດ​ວຽກ​ເພື່ອ​ໃຫ້​ຖືກ​ຕາມ​ລະ­ບຽບ​ວິ­ໄນ ແລະ ນະ­ໂຍ­ບາຍ​ຂອງ​ພັກ ຫຼີກ­ເວັ້ນ​ອີງ​ເອື່ອຍ​ອາ­ໄສ​ຄວາມ​ຄຸ້ນ​ເຄີຍ​ສ່ວນ​ຕົວ​ຈົນ​ເສຍ​ຫຼັກ­ການ ແລະ ຜົນ​ປະ­ໂຫຍດ​ຂອງ​ສ່ວນ​ລວມ.

    ເພື່ອ​ເປັນ​ການ​ເນັ້ນ​ໜັກ​ຕື່ມ ກ່ຽວ​ກັບ​ການ​ຮັບ​ຟັງ​ຫາງ​ສຽງ​ມະ­ຫາ­ຊົນ ໃນ​ການ​ດຳ­ເນີນ​ສົ່ງ​ຂ່າວ​ໃນ​ການ​ເຮັດ​ວຽກ ກົດ­ໝາຍ​ວ່າ​ດ້ວຍ​ລັດ­ຖະ­ບານ ສະ­ບັບ​ປັບ­ປຸງ (2017) ມາດ­ຕາ 10 ຂຽນ​ວ່າ: ໃຫ້­ການ​ບໍ­ລິ­ການ​ຮັບ​ໃຊ້​ປະ­ຊາ­ຊົນ ຮັບ​ຟັງ​ຄຳ​ຄິດ​ຄຳ​ເຫັນ ຄຳ​ຮ້ອງ​ຄຳ​ສະ­ເໜີ​ຂອງ​ບຸກ­ຄົນ ນິ­ຕິ­ບຸກ­ຄົນ ແລະ ການ­ຈັດ­ຕັ້ງ​ກ່ຽວ​ກັບ​ບັນ­ຫາ​ທີ່­ຢູ່​ໃນ​ຄວາມ​ຮັບ­ຜິດ­ຊອບ​ຂອງ​ຕົນ ເພື່ອ​ຄົ້ນ­ຄວ້າ​ແກ້​ໄຂ ຫຼື ສະ­ເໜີ​ພາກ­ສ່ວນ​ກ່ຽວ­ຂ້ອງ​ພິ­ຈາ­ລະ­ນາ​ຕາມ​ກົດ­ໝາຍ ແລະ ລະ­ບຽບ​ຫຼັກ­ການ ສະ­ນັ້ນ ການ​ເຊີດ​ຊູ​ຮູບ​ແບບ​ການ​ເຮັດ​ວຽກ​ຕາມ​ຫຼັກ­ການ​ນັ້ນ ຍາມ​ໃດ​ກໍ​ຖື​ເປັນ​ແນວ­ທາງ​ປະ­ກອບ​ພິ­ຈາ­ລະ­ນາ​ໃນ​ໜ້າ​ວຽກ​ເພື່ອ​ສ່ວນ​ລວມ ບໍ່​ສູນ​ເສຍ​ຜົນ​ປະ­ໂຫຍດ !.

ຂ່າວທີ່ກ່ຽວຂ້ອງ